Kutakita Bwebwe na Bango Bantu
2
1 Mibuto zane, bukatizio bumuli nabo mu Yesu Kristo, Mukota weitu wa lutanuno, tabube ku kukutya bantu. 2 Ku bubuno ndi muntu eli na mpete za olo, nu nsulu nsoga, eingila mu numba za musanganano weinyu nu ndi muzambi nu we eingila nu eli na nsulu mbi; 3 Ndi mwanza wozo uli na nsulu nsoga nu kumubula bunee: “Uwe, ikala gano ga kiziki kisoga!” Nu ndi mwabula ku wozo muzambi bunee: “Uwe, emana gago,” aba “Ikala gansi;” 4 Ndi tamukulundulana, nu tamuli ngatu zili na makengelo mabi? 5 Ungwililazi, mibuto zane batundwa; ndi Kalaga ntasombwede bazambi ba kisi buno babe bagumi mu bukatizio, nu bapieni ba bukota bwabikidwe babo bakumutundaga? 6 Tondo inyuwe, mwabengile bazambi! Ndi ta bagumi u babo bakumubengaga nu kumubuluta ku bisumbi bya lusungio? 7 Ndi ta babo u bakulinga izina lilyo isoga limukumanwa mulyo?
8 Tondo ndi mukuzindilizia mulembe wa bukota, anga bwasanzilwe bunee: “Tunda munyobe anga buwitunda uwenyene, nti mwakita busoga.” 9 Tondo ndi mukukutya bantu, nti mukwaga, nu kusungibwa na mulembe anga bakugukagula. 10 Kubuno ndi muntu anza mulembe unsania, tondo aga mu ikakizio limozi, nti aga mu mansania. 11 Ku bubuno, We watendile bunee: “Ntwite meiga,” atendile lingo bunee: “Ntwite muntu.” Umpanga, ndi ntwita meiga, tondo wita muntu, nti wakagula mulembe. 12 Tendazi nu kitazi anga bantu bakasungibwa ku mulembe gukulusia bukandulwa. 13 Kubuno lusungio taluli na kyombo ku wozo uteli na kyombo, kyombo kikukinda lusungio.
Bukatizio nu Misako
14 Mibuto zane, kuli mutali mukizi, ndi muntu akutenda buno eli na bukatizio nu we nteli na misako misoga? Ndi bubo bukatizio bunamwonia? 15 Ndi mubuto umozi, wamulume aba mukikulu, eli bwasi nu nteli n'idia busi na busi, 16 nu ndi muntu umozi wa kumuli amutenda bunee: “Enda na bubobelelo, ungwe keiya, nu wikute!” Tondo ndi ntamukasa byakwiyanina bya mubili; nti guli mutali mukizi? 17 Bubo ububo, ndi bukatizio tabuli na misako misoga nti bwakua bwobwenyene.
18 Tondo muntu anatenda bunee: “Uwe, uli na bukatizio; nu nne, nili na misako misoga.” Undolesie bukatizio bwobe geteli misako misoga, nu nne, nakulolesie bukatizio bwane ku misako zane misoga. 19 Uwe ndi ukukatizia buno, Kalaga eli umozi? Ukukita busoga; basumbu nu bo bakukatizagia bubo, nu bakugiliminaga. 20 Tondo, uwe muntu buliabulia, ndi ukutunda nu uwe kumenya buno bukatizio ndi tabuli na misako misoga, nti buli buliabulia? 21 Ndi tateiswe, Abrahamu, ntabingizibwe ku misako misoga, ububo gakasenne mwana wage, Isaka, ku kayulo? 22 Ukumona bukatizio bwage bwakitile gamozi na misako zage misoga nu bukatizio bwage bwasililide na misako misoga zaakitile. 23 Nu masanzo mamo mazindilide matendagwa bunee: “Abrahamu akatizizie Kalaga, nu atekwidwe buno eisanana,” nu we amaninwe bunee: “mwida wa Kalaga.” a 24 Mukumona buno, muntu akubingibwa ku misako zage, nu ta ku bukatizio tugu.