Lulami
3
1 Mibuto zane, kumuli takube basozi beingi; kubuno mumenye buno iswe basozi tukasungibwa nunse kutinga. 2 Kubuno iswe tubansania tukwikuka mu bitondo byingi. Ndi muntu ntakwikuka ku kutenda, wono nti u muntu wasililila, nti anavwama kwangata mubili wage unsania. 3 Anga butukubikaga byuma mu tunua twa farasi buno zitwanze, nu ku bubo tukutimbula mibili zabo insania. 4 Lolazi, anga buli maato, meli manene nu makusindikwa na lumpumpu lubibu, makugalukibwa na kyuma kikeke nunse, nu makwenda anga bukutunda musondelezia. 5 Ububo, lulami nulo luli kiganza kikeke, tondo lukwikakaga ku bitondo binene. Lolazi, anga keiya nuko keli kakeke kanavwama kugisia lubanda lunene nunse! 6 Lulami nulo luli keiya kakeke nu kisina kya misako mibi. Lulami lulo lwabikilwe mu biganza byeitu, lukubigia mubili unsania, nu lukubangia keiya mu kalamo keitu mu kisi, nulo lwolwenyene lukugulumizibwa na Jehenamu (mpinga za keiya katanakuzima). 7 Na lukita na lukita lunsania lwa nyama, lwa tuzoni, lwa bikugelegeta nu lwa bili mu kitatenge, bikutugagwa nu byasilile kutugwa na bantu: 8 tondo lulami, takuli muntu wampa unavwama kulutuga; luli lubi talunavwamwa kuzugilwa; lwiyala na buganga bwa kwita. 9 Tukuganuna Mukota Tateiswe nalo; nu tukuswililaga bantu nalo, bakitilwe ku kisusania kya Kalaga. 10 Mu kanua kamozi mukutukaga kuganuna nu kuswilila. Mibuto zane, bubuno tabwatunganana. 11 Ndi kanuabalongo kamozi keli na mazi meli nse nu mazi meli lubaba? 12 Mibuto zane, ndi muti wa figi unakolama kiguma kya mizeituni, aba muzabibu kukolama figi? Kasi kanuabalongo takanatikya mazi ma munkange nu mazi meli nse.
Menge Makutuka Kwigulu
13 Nazi wa kumuli uli na menge nu bumenyinino? Alolesie makitilo mage ku misako zage misoga nu menge mabota. 14 Tondo ndi muli na lugi nunse nu myango mu mitima zeinyu, tamwikake aba tamutende buteligo. 15 Menge mamano ta mamo makutuka kwigulu, tondo meli ma kisi, nu ma lukita lwa bantu, nu lwa Satana. 16 Kubuno gago geli lugi nu myango, nti u kukusakwa nu nti kuli misako mingi mibi. 17 Tondo menge makutukaga kwigulu meli masoga, lingo makutunda bubobelelo nu makusasia kungwa bitondo bya bango bantu nu mabota, meiyala na kyombo nu biguma bisoga, tamakukutya, tameli na misona nu bwengelezi. 18 Biguma bya kwisanana bikuyikwa mu bubobelelo ku babo bakukita bubobelelo.