Bulemba ku Kisi
4
1 Kuni kukutuka bita nu nsake gamusamba? Ndi ta ntundo zeinyu zikutuka munda mweinyu u zikumusakya? 2 Mukutunda, tondo tamuli na kena; muli beiti nu muli na lugi, nu tamukuvwama kumona kena; mukusaka nu mukwitana. Tamuli na kena kubuno tamukusega Kalaga. 3 Mukusegaga nu tamukukasagwa kubuno mukusegaga bubi, kubuno mukutunda kukita anga buli ntundo zeinyu. 4 Inyuwe beiti ba meiga! Ndi tamwizi buno wozo uli kilemba kya kisi nti asomba Kalaga? Umpanga wozo ukutunda kuba kilemba kya kisi nti akutunda kuba musombi wa Kalaga. 5 Ndi mukukengela buno masanzo makutenda bulia? Muuza wabikile Kalaga mutuli guli na lugi nunse. 6 Tondo akutukasa mponga ningi nunse. Umpanga masanzo makutenda bunee: “Kalaga akutobagia beli na lwikotio, tondo akukitaga babo bakwibotya mponga.” a 7 Umpanga anzazi Kalaga; tobyazi Satana, nu we nti amutina bulazi. 8 Kundazi Kalaga, nu We amukunde. Ogazi ku maboko meinyu, inyuwe bagi, engiazi mitima zeinyu, inyuwe beli na mitima ibili. 9 Ibabaziazi; mube na kabebe nu lilazi; kuseka kweinyu kugaluke kabebe, nu mbogimbogi zeinyu zibe kabebe. 10 Ibotyazi lwabusio lwa Mukota, nu We amusakike. Tamusungie Mubuto
11 Mibuto zane. Tamukandikanie bweinyubweinyu. Wozo wakandika mubuto wage, aba akusungia mubuto wage, nti akandika mulembe, nu asungia mulembe. Tondo, ndi wasungia mulembe, uwe nti ntukwanza mulembe, tondo uli ngatu zago. 12 Mubiki wa mulembe nu Ngatu eli umozi tugu, u wozo unavwama konia nu kuzikya; tondo uwe, uli nazi, ukusungia munyobe?
Tamwikake
13 Ku beinyuwe bakutenda bunee: “Lelo aba lubi twende ku ungo mwino mukisiembe, twikale kuko mwaka umozi, twakunze, nu twakunzie nu twabe na mutali.” 14 Inyuwe bateizi bwabe lubi! Buni buli kalamo keinyu? Kubuno inyuwe muli anga muuki ukumonekako nkungu nkeke, nu kusila nti wabomba. 15 Munatunganana kutenda bunee: “Ndi Mukota atunda, twalame, twakite bubuno aba bubo.” 16 Tondo kano kaluma mukwikaka mu lwikotio lweinyu. Kwikaka kunsania kwa lukita luluno kuli kubi. 17 Ububo wozo wizi kukita busoga, nu ntakubukita, nti buli bwagi kweli.