Lusungu ku Bagumi
5
1 Ungwilila kano kaluma, inyuwe bagumi! Lilazi nu lalukazi, kubuno tubebe tukumuvwila. 2 Bikulo byeinyu byabola, nu nsulu zeinyu zalibwa na kagembe. 3 Olo zeinyu nu feza zeinyu zakua na nkisa; nu nkisa zabyo zikamulongekela, nu zo zikalia mibili zeinyu anga keiya. Mwasila kubika bikulo byeinyu bisoga ku bindi bizinda. 4 Lolazi, lukalilo lwa batubuzi batubulaga masoa meinyu, lumwabananinaga nalo ku kubengelela, lukulila; nu idilo lya batubuzi lyungwilwe na Mukota, Mwiya Mayombo. 5 Mukwitananizia mu kisi, nu kwibogiabogia ku lutundo lweinyu, mwikutizie mitima zeinyu ku busi bwa kuseswa. 6 Mwasungizie nu mwitile wozo wisanana, nu we ntasuninwe n'inyuwe. Nkiki nu Masego
7 Ku bubo, mibuto zane, mube na nkiki, aaba nu ku kuvwa kwa Mukota. Lolazi, mulimi akulindila biyikanwa byayikile mu bisogo, bya bukunza bubibu, akubilindila na nkiki, aaba nu galoke mbula ntangi nu nzinda. 8 Nu inyuwe, mube na nkiki, lindiazi mitima zeinyu, kubuno kuvwa kwa Mukota kuse bwigi.
9 Mibuto zane, tamugambane bweinyubweinyu, buno munavwa kusungibwa: lolazi, ngatu emana ku lwibi. 10 Mibuto, kengelazi bwababedwe balengania nu nkiki zibabezaga nazo babo basambalaga mu izina lya Mukota. 11 Lolazi, tukuganuna babo babezaga na nkiki. Mungule musagu wa nkiki za Yobu, nu mwamonine bwatundile Mukota bunee: “Mukota eli na kyombo, nu eli na mponga.” a
12 Tondo lwabusio lwa binsania, mibuto zane, tamulumbile aba ku igulu, aba ku kisi, aba ku kingo kilumbilo kinsania. Tondo kwitabizia kweinyu kube bunee: “Ee,” nti “Ee,” nu kutuna kweinyu kube bunee: “Ta bubo” nti “Ta bubo,” buno munavwa kusungibwa.
13 Ndi umozi wa kumuli akubabalwa? Nti asege. Ndi umozi akubogaboga? Nti eimba nimbo. 14 Ndi umozi wa kumuli akusamba? Nti amane bakulu ba kanisa, nu bo bamusegele nu nti bamubongia mwambo mu izina lya Mukota: 15 Kusega kuko kwa bukatizio kunonia musambi, nu Mukota amuzanzukie; nu ndi akitile misako za bwagi nti zasigililwe. 16 Umpanga igongazi misako za bwagi bweinyubweinyu gamusamba, nu musegelane, buno mwonibwe. Kusega kwa wisanana kuli kusoga nunse, ndi akusega na komanizia. 17 Elia abezaga muntu wa misako anga butuli. Asegile na komanizia buno mbula taziloke nu mbula tazalokile mu kisi myaka isatu nu myezi mutuba. 18 Kusila asegile lingo, nu mbula zalokile, nu kisi kyasizie biyikanwa byage. 19 Mibuto zane, ndi umozi wa kumuli asiga bulili, nu ungo nti amusubye kubo. 20 Menyazi buno, wozo ukusubya mwagi ku nzila zaziminne kuzo, nti amwonia ku lukuo nu misako mingi zage za bwagi nti zakukilwa.