Bakikulu Basongwa nu Bamulume Basonga
3
1 Bubobubo, nu inyuwe bakikulu, anzazi beiba beinyu; buno ndi kuli bamozi batakwanza idagi, balutwe na misako misoga za bakazi babo, kuteli kutendatenda, 2 ku kumona ku lukita lweinyu lwa kulama busoga nunse nu luli na lwanzo. 3 Kuleba kweinyu takube kwa gantata anga kuswikwa nzwili, kwitonda na bya olo, aba kuvwala nsulu nsoga nunse, 4 tondo kwatunganana kuba kuleba kwa mu mutima, mu muntu wa munda utakumonekako, kuleba kutanakubiga, u mutima wola nu wa bubobelelo u guli wa bukunza bunene lwabusio lwa Kalaga. 5 Kubuno bubo u bwalebaga bakikulu basililila ba wakalazi, balemaninaga Kalaga, beisigulizagia ku beiba babo, 6 anga Sara, wanzaga Abrahamu nu amumanine mukota wage. Nu museli bakinga bage, ndi mukukita buli busoga, geteli kwitibwa na boba bwampa. 7 Ububo nu inyuwe beiba babo, ikalazi na bakikulu beinyu ku menge nu kukasa mukikulu lwanzo, anga kibumbwa kisosu; nu anga bapieni gamozi n'inyuwe ba lukaso lwa mponga za kalamo, buno masego meinyu tamabiganwe na kampa.
Kusungibwa ku Kukita Bwisanana
8 Umpanga inyuwe bansania mube na makengelo mamozi, nu kungwa kumozi, bakusigililana, anga babutwa, mube na kyombo, bakwisigulizia. 9 Tamusubye bubi ku bubi, aba kilingano ku kilingano, tondo kitazi mponga, kubuno ku bitondo bibyo u kumwamaninwe buno mupiene mponga. 10 Kubuno masanzo makutenda bunee:
“Ndi muntu umozi akutunda kalamo,
Nu kumona ku bindi bisoga,
Atunganana kulanga lulami lwage talutende bubi,
Nu kanua kage takatende bya bwengelezi.
11 Asige bubi nu akite busoga,
Alonde bubobelelo nu abuyange nunse;
12 Kubuno meiso ma Mukota meli ku beisanana
Nu matuzi mage makungwilila masego mabo,
Tondo malanga ma Mukota makusomba bakiti ba bubi.” a
13 Nu nazi ukamukita bubi, ndi muli na komanizia ku kukita busoga? 14 Tondo, aba ndi mukusungibwa ku kabamba ka kwisanana, nti muli na mbogimbogi. Tamube na boba bwampa kubeli, nu tamuzangezange; 15 Tondo Kristo aganunwe mu mitima zeinyu buno eli Mukota; nu mube kayikayika bindi binsania kwakula na bubobelelo nu lwanzo lwabusio lwa muntu na muntu ukumubuzia musagu wa kilemanizio kili mumuli, 16 nu mube na kalenganio kasoga, buno ku kitondo kimukukandikwa kukyo, anga buno muli bakiti ba bubi, babo bakunyega lukita lweinyu lusoga mu Kristo babe na nsoni.
17 Kubuno buli neibineibi nunse kusungibwa ku kukita busoga, ndi bubo u kusombola kwa Kalaga, kutinga kukita mibi. 18 Kubuno Kristo nu We asungizibwe limbizi limozi ku kabamba ka bwagi, We wisanana ku bateisanana, buno atulusie ku Kalaga; eitilwe ku mubili, nu alamizibwe lingo na Muuza Wasililila. 19 Mu wozo Muuza lingo, endile kwigisia ku myuza zabezaga mu kikando, 20 zezo zitanzaga wakalazi, ku nkungu za kwikalila kwa Kalaga, mu bindi bya Noa, gaangagwa bwato bunene, mu bo maganzo ma bantu bakuka kinana, babo u bonezibwe munkatini na mazi. 21 Mazi mamo mabezaga kalolesio ka kututikwa, nu kututikwa kuko takuli kutikya nsese za mubili, tondo kalenganio kasoga ku Kalaga, nu kukumwonia nu inyuwe kano kaluma ku kuyuka kwa Yesu Kristo kutuka ku bakuzi; 22 eli ku kuboko kwa seidume kwa Kalaga, kutukila enda mwigulu, nu banzelo, nu mangato, nu magala byabikwa kunsi kwage kumwanza.