<<    <     1 YOANA     1     >    >> 
1 YOANA
Idagi lya Kalamo
1
1 Lilyo lyabezaga mu kulinga, lilyo litungule kulyo, lilyo litwamonineko na meiso meitu, lilyo litwalolile nu maboko meitu malibabatile, ku kitondo kya idagi lya kalamo; 2 nu kalamo kalolesizibwe, nu twakamonineko, nu tukukalongekela, nu tukumusambalila kalamo katanakuzinda kabezaga gamozi n'Isi nu twakamonineko; 3 lilyo litwamonineko nu litungule kulyo, tukumusambalilalyo nu inyuwe, buno nu inyuwe lingo mugomie n'iswe. Nu mugomio weitu guli gamozi n'Isi, nu gamozi na Mwana wage Yesu Kristo. 4 Nu tukusanza bitondo bibino, buno mbogimbogi zeitu zizindilizibwe.
Kalaga eli Kyengi
5 Musagu u tungule kugo, nu u tukumusambalila buno Kalaga eli kyengi, nu mweli tamuli kapilo nunse. 6 Ndi twatenda buno twagomia nage nu tukutabanga lingo mu kapilo, nti tukweka buza nu nti tatukukita bulili. 7 Tondo ndi tukutabanga mu kyengi, anga bweli wenyene mu kyengi, nti twagomania bweitubweitu, nu mikila za Yesu Mwana wage nti zatwengia bwagi bunsania.
8 Ndi twatenda buno tatuli na bwagi, nti tukwiyengelela tubenyene, nu bulili nti tabuli mutuli. 9 Ndi tukwigonga bwagi bweitu, We eli bulili nu wisanana, atusigilile bwagi bweitu, nu kutwengia ku mibi insania. 10 Ndi twatenda buno tatwagile, nti twamukita muza, nu idagi lyage nti talili mutuli.