Idagano lya Kuvwa kwa Mukota
3
1 Lolazi, batundwa, mukanda wono u w'ibili nkumusanzila. Ku mutangi nu muzinda, nkulonda kuyukya makengelo meinyu maswaga ku kumukengelezia, nu kumulindia, 2 buno mukengele bitondo byatendilwe wakalazi na balengania basililila, nu ku iakizio lya Mukota nu Monia ligisizibwe na basingwa beinyu; 3 lwabusio lwa bansania, menyazi buno mu bindi bizinda, kukavwa beililiki na kwililika kwabo, nu bakatunda kwenda mu ntundo zabo mbi. 4 Bakatenda bunee: “Kuni kuli idagano lya kuvwa kwage? Kubuno, kutukila kukua kwa batateiswe, binsania bili anga bubyabezaga kutukila kulinga kwa kubumbwa kwa kisi.” 5 Kubuno, bakutunda kwibilila buno, ku idagi lya Kalaga, kwabede meigulu kutukila wakalazi, nu kisi kyatikibwa mu mazi nu kyakitilwe na mazi, 6 nu buno ku idagi lilino, lyatendile Kalaga, ukinsa kikyo kisi kitangi kyazikile, nu kukukilwa nunse na mazi mu mwiyalo munene nunse, 7 tondo, ku kuko kutenda kwa Kalaga, meigulu ma kano kaluma nu kisi byabikilwe milanga ku keiya, nu bikibyalangwa aaba nu ku busi bwa lusungio nu bwa kuzimina kwa bantu babi nunse. 8 Tondo, batundwa bane, kuli kitondo kimozi kimutatunganana kwibilila, u buno, lwabusio lwa Mukota, kindi kimozi kili anga myaka kanunu, nu myaka kanunu zili anga kindi kimozi. 9 Mukota ntakwizizia ku kuzindilizia idagano lyage, anga bukukengela bamozi; tondo kumuli, akwikalila, ntakutunda muntu umozi kuzimina, tondo akutunda buno bansania beiyanie. 10 Busi bwa Mukota bukavwa anga mwibi; nu mu bubo busi meigulu makazimina na mizumio minene, nu bibumbwa binsania bikanyenguka na keiya, nu kisi gamozi na milimo zili mukyo bikazika. 11 Umpanga kubuno bibino binsania bikanyengulwa, u bubo bwatunganana inyuwe mube bantu ba lukita lusoga mu kalamo kasililila nu keisanana. 12 Mukulindila nu mukutunda nunse buno bubo busi bwa Kalaga busasie kuvwa, kubuno ku busi bubo, meigulu makanyenguka na keiya kanene nu bibumbwa binsania bikanyenguka! 13 Tondo ku kabamba k'idagano lyage, tukulindila meigulu mato nu kisi kito u mumo mukaba kwisanana.
14 Batundwa bane, kubuno mukulindila bitondo bibino, ikokomeziazi buno amusange geteli itondoki nu lukumu lubi mu bubobelelo. 15 Katiziazi buno kwikalila kwa Mukota weitu kukulusia lonio, anga bwatusanzide mubuto weitu mutundwa Paulo, kuyangana na menge maakasilwe. 16 Bubo u bwakukita mu mikanda zage insania, muzo u mwatenda bitondo bibino; mu mikanda zezo muli bitondo bili bibibu kumenyinina, bikugalukibwa bwisulilwa na bantu beteli na menge nu batakokomena, anga bubakukita na mango Masanzo, ku buzimizi bwabo bobenyene.
17 Umpanga inyuwe batundwa bane balinga kumenya bitondo bibino, idangazi buno munavwa kugalukibwa na misako mibi za bantu babi, nu munavwa kugoa mu kulinda kweinyu. 18 Tondo mukule mu mponga nu mu bumenyinino bwa Mukota weitu nu Monia Yesu Kristo. Kweli kube lutanuno, kano kaluma nu ku nkiko zitanakuzinda! Amena!