Kristo Avwe Kutukasia
2
1 Bana bane bakeke, namusanzila bitondo bibino, buno tamukite bwagi. Nu ndi muntu umozi eli na bwagi, tuli na Mukulumania ku Isi, Yesu Kristo wisanana. 2 Eli wenyene Mukuluzi nu Mukulumania ku bwagi bweitu, nu ta ku bwagi bweitu tugu, tondo lingo bwagi bwa kisi kinsania. 3 Ndi twalanga makakizio mage, ku bubuno nti twizi buno twamumenyine. 4 Wozo ukutenda buno, amumenyine, tondo ntakulanga makakizio mage, nti eli muza nu bulili nti tabuli mweli. 5 Tondo lutundo lwa Kalaga lwasililila lebelebe mu wozo ukulanga idagi lyage: ku bubo twizi buno tuli mweli. 6 Wozo ukutenda buno akulama munda mwage, atunganana nu we kutabanga anga bubo bwatabangaga wenyene.
Ikakizio Ito
7 Batundwa bane, t'ikakizio ito u linkumusanzila, tondo ikakizio ikulu limwakatile kutukila mu kulinga, lilyo ikakizio ikulu, u idagi lilyo limungule kulyo. 8 Tondo lilyo ikakizio ito u linkumusanzila lili bulili mweli nu mumuli, kubuno kapilo kakutinga mu kikyo kyengi kya bulili kyasila kusana.
9 Wozo ukwibula buno eli mu kyengi, nu we akusomba mubuto wage, nti eikili lingo mu kapilo. 10 Wozo ukutunda mubuto wage eikile mu kyengi nu mweli tamuli kyampa kinamukikitania. 11 Tondo wozo wasomba mubuto wage eli mu mwizi, akutabanga mu mwizi nu nteizi kiziki kyakwendako, kubuno kapilo kamuziba meiso.
12 Namusanzila, inyuwe bana bakeke, kubuno bwagi bweinyu bwasigililwa ku kabamba k'izina lyage. 13 Nkumusanzila, inyuwe beisibo, kubuno mwamenyine wozo uligo kutukila mu kulinga. Nkumusanzila inyuwe basikila, kubuno mwakindile wozo mubi.
Nkumusanzila inyuwe bana kubuno mwamenyine Isi. 14 Nkumusanzila inyuwe beisibo, kubuno wozo uligo kutukila mu kulinga. Nkumusanzila inyuwe basikila, kubuno muli na magala, nu idagi likile mumuli, nu inyuwe mwakindile wozo mubi.
15 Tamutunde kisi, aba bitondo bili mu kisi. Ndi muntu umozi atunda kisi, nti lutundo lwa Tatane taluli mweli, 16 kubuno na kintu kinsania kili mu kisi, lutundo lwa mubili, lutundo lwa meiso, nu lwikotio lwa kalamo, tabikutuka ku Tatane, tondo bikutuka ku kisi. 17 Nu kisi kikutinga gamozi na lutundo lwakyo; tondo wozo ukukita lutundo lwa Kalaga, akeikalaga ku nkiko na nkiko zitanakuzinda.
Musombi wa Kristo
18 Bana bakeke, zili nkungu nzinda, nu anga bubo bumungule buno musombi wa Kristo avwa, kano kaluma kuli basombi beingi ba Kristo, ku bubo twizi buno zili nkungu nzinda. 19 Batukile munkatini mweitu, tondo tababezaga ba kutuli: kubuno songo babezaga ba kutuli baneikede gamozi n'iswe, tondo bubo bwabede buno bamoneke bwasibwasi buno bansania tabeli ba kweitu.
20 Nu inyuwe mwatogezibwe mwambo na wozo uli Wasililila nu inyuwe mwizi binsania. 21 Namusanzide, ta buno tamwizi bulili, tondo kubuno mubwizi nu kubuno takuli buza bwampa bukutuka mu bulili.
22 Nazi uli muza, ndi ta wozo ukutuna Yesu buno eli Kristo? Wozo eli musombi wa Kristo, wozo ukutuna Isi nu Mwana. 23 Na muntu unsania ukutuna Mwana nteli n'Isi, na muntu unsania witabizia Mwana, nti eli n'Isi.
24 Nu inyuwe, bitondo bimungule kubyo kutukila mu kulinga beikala mumuli. Ndi bitondo bibyo bimungule kubyo kutukila mu kulinga bikale mumuli, nti inyuwe mwikale mu Mwana. 25 Nu idagano lyatulagile, u kalamo katanakuzinda.
26 Namusanzide bitondo bibino ku kabamba ka babo bakutunda kumwengelela. 27 Nu inyuwe, mwambo wozo gumwakatile kweli guli mumuli, tamukwiyanina lingo kwigisibwa na muntu, tondo anga bukumwigisia mwambo wage, bitondo binsania, buno guli bulili, nu ta guli buza, ikalazi mugo kuyangana na meigisia mamwakasilwe.