Bana ba Kalaga
3
1 Lolazi lutundo lweinyu lukizi lutwakasilwe n'Isi, buno tumanwe bana ba Kalaga: nu tulibo. Ku kabamba kako kisi takikutumenya, kubuno takyamumenyine. 2 Batundwa bane, kano kaluma tuli bana ba Kalaga, nu aba butwabe tabumonekako nunse; tondo twizi buno, gaakamonekako, tukamususania, kubuno twamumoneko anga bweli. 3 Na muntu na muntu uli na kilemanizio kikino mweli, nti eiyengie wenyene anga bwenga wenyene. 4 Na muntu na muntu ukukita bwagi nti akagula mulembe, nu bwagi buli kukagula mulembe. 5 Nu mwizi buno We amonekileko buno atikye bwagi bweitu, nu mweli tamuli bwagi bwampa. 6 Na muntu na muntu wikile mweli nti ntakukita bwagi na muntu na muntu ukukita bwagi nti ntamumonineko aba ntamumenyine.
7 Bana bane, muntu ntamwengelele. Wozo ukukita bwisanana nti eli wisanana, anga bwisanana wenyene. 8 Wozo ukukita bwagi eli wa Satana; kubuno Satana agile kutukila mu kulinga. Mwana wa Kalaga amonekileko buno abigie makitilo ma Satana.
9 Nu muntu na muntu wabutilwe na Kalaga nti ntakukita bwagi kubuno mbuto za kalamo kage zili mweli, nu ntanavwama kukita bwagi, kubuno abutilwe na Kalaga. 10 Ku bubuno bana ba Kalaga bakumenyininwa nunse nu bana ba Satana nu bo. Na muntu na muntu utakukita bwisanana nti nteli wa Kalaga, aba wozo utakutunda mubuto wage.
Kutundana Bweinyubweinyu
11 Kubuno bumwasambalidwe nu bumunguleko kutukila mu kulinga, ububo twatunganana kutundana bweitubweitu, 12 nu takususania Kaina, wabezaga wa wozo mubi, nu eitile muto wage. Nu we amwitile ku kabamba kakizi? Kubuno makitilo mage mabezaga mabi, nu ma muto wage mabezaga meisanana.
13 Mibuto, tamwangame ndi kisi kikumusomba. 14 Twizi buno twatingile kutuka ku lukuo nu kwingila mu kalamo, kubuno twatunda mibuto zeitu. 15 Na muntu unsania ukusomba mubuto wage nti eli mwiti, nu mwizi buno takuli mwiti wampa uli na kalamo katanakuzinda kakwikala mweli. 16 Twamenyine lutundo kubuno akasene kalamo kage ku kabamba keitu; nu iswe, twatunganana kukasana kalamo keitu ku kabamba ka mibuto. 17 Ndi muntu umozi eli na bikulo bya kisi, nu akumona buno mubuto wage akwiyanina nu ndi alimbania mutima wage, buni buneikala lutundo lwa Kalaga mweli? 18 Bana bakeke, tatutunde mu kutenda aba ku lulami tugu, tondo nu ku makitilo gamozi na bulili.
Kuba Nunse na Bukatizio Lwabusio lwa Kalaga
19 Ku bubo, twamenyinine buno tuli ba bulili, nu twabobelezizie mitima zeitu lwabusio lwage, 20 kubuno ndi mitima zeitu zatubigia, Kalaga eli munene kutinga mitima zeitu, nu eizi bitondo binsania. 21 Batundwa, ndi mitima zeitu tazikutubigia, nti tuli na bukatizio nunse lwabusio lwa Kalaga. 22 Nu na kinsania kitunasegaga, nti twakikaswe kweli kubuno tukwanza makakizio mage nu tukukita bikumutananizia. 23 Nu lilino u ikakizio lyage buno tukatizie mu izina lya Mwana wage, Yesu Kristo, nu buno tutundane bweitubweitu anga ikakizio lyatukasile. 24 Wozo ukulanga makakizio mage nti eikile mu Kalaga nu Kalaga mweli; nu ku bubuno, twizi buno eikile mutuli ku Muuza waatukasile.