2 YOANA
Kusambizania
1
1 Mukulu ku mmane musombolwa nu ku bana bage, banatunda mu bulili; nu ta nnenyene tugu u wabatunda, tondo nu bansania beizi bulili; 2 ku kabamba ka bulili bwikile mutuli, nu bwabe gamozi n'iswe aaba nu ku nkiko zitanakuzinda. 3 Mponga, kyombo nu bubobelelo bikutukaga ku Kalaga Tateiswe nu ku Yesu Kristo, Mwana wa Tateiswe bibe gamozi n'iswe mu bulili nu mu lutundo.
Bulili nu Lutundo
4 Nabogilebogile nunse ku kumona buno bamozi ba ku bana bobe bakwenda mu nzila za bulili anga ikakizio litwakakizibwe ku Tateiswe. 5 Nu kano kaluma mukikulu mutundwa, nkukusega nunse, ta anga buno nkukusanzila ikakizio ito, tondo lilyo litwabezaga nalyo kutukila mu kulinga, u buno tutundanazi bweitubweitu. 6 Nu lutundo luli kwenda mu kuyanga makakizio mage, u lilyo ikakizio limwatunganana kwenda mulyo, anga bumungule kulyo kutukila mu kulinga.
7 Kubuno bengelezi beingi beseli mu kisi, nu tabakusambala bwasibwasi buno Yesu Kristo avule mu mubili. Wozo uli bubo nti eli mwengelezi nu musombi wa Kristo. 8 Idangazi mubenyene buno munavwa kuzimizia bimwakitide, tondo mukaswe lukalilo lweinyu lunsania.
9 Na muntu unsania ukwitila kwenda lwabusio nunse, geteli kwikala mu meigisia ma Yesu Kristo, nti nteli na Kalaga; wozo ukwikala nunse mu mamo meigisia, nti eli n'Isi nu Mwana wage. 10 Ndi muntu avwa kumuli, nu ntavwa na meigisia mamano, tamumusekele mu numba zeinyu, nu tamumusambizie! 11 Kubuno wozo wamusambizia, nti agomia nage mu misako zage mibi.
Kutonda Kuzinda
12 Nili na bitondo byingi bya kumusanzila, nsyatundile kubukita ku nsamba nu bwino; tondo nkulemanina kuvwa kweinyu, nu kutendana na inyuwe meiso ku meiso, buno mbogimbogi zeitu zisililile.
13 Bana ba mubuto wobe, wozo musombolwa wa Kalaga bakusambizia.