3 YOANA
Wozo Muntu Ukusingilwa Mukanda
1
1 Mukulu, ku Gayo mutundwa wane, u nkutundaga mu bulili. 2 Mutundwa, nkusega buno witile kuba busoga mu bitondo binsania nu ulunde anga bubo buli mutima wobe musoga. 3 Kubuno nabogilebogile nunse gabasile mibuto zane nu balumbizie bulili buli muguli nu lukita luukutabanga mulo mu bulili. 4 Nsili na mbogimbogi nnene zatinga zeno, kungwa buno bana bane bakwenda mu bulili.
Bulili bwa Gayo
5 Mutundwa, ukukita na bukatizio nunse mu milimo ziukukitila mibuto, aba nu ku bageni. 6 Babo bakulongekede ku lutundo lwobe lwabusio lwa kanisa. Wakite busoga ku kubakasia na bya lugendo lwabo anga bwatananina ku Kalaga. 7 Kubuno, ku kabamba k'izina lya Yesu Kristo, ukinsa batukile geteli kukata kampa ku baBilongo. 8 Umpanga twatunganana kusekela bantu anga babano, buno tube bakiti ba mulimo gamozi nabo ku bulili.
Diotrefe nu Demetrio
9 Nasanzide kanisa bitondo bimozi, tondo Diotrefe, ukutunda kuba mutangi mubeli, ntakutusekelaga. 10 Ku bubo, ndi navwe, namukengelezie misako zage zaakukitaga, nu kutenda bitondo bibi nunse kutuli, nu kwitila lingo, wenyene ntakusekela mibuto, nu babo bakutunda kubukita, nti akubazibizia nu kubeimbia mu kanisa.
11 Mutundwa, ntuyange bubi, tondo busoga. Wozo ukukita busoga nti eli wa Kalaga; tondo wozo ukukita bubi nti ntamonine ku Kalaga. 12 Bantu bansania nu bulili bobwenyene, bakulumbia Demetrio ku busoga; iswe nu iswe, tukumulumbia ku busoga, nu wizi buno kulumbia kweitu kuli bulili.
Kusambizania Kuzinda
13 Ninabede na bitondo byingi bya kukusanzila, tondo nsikutunda kukusanzila na bwino nu kalamu. 14 Nili na kilemanizio kya kusasia kukumonako, nu nti twatendane meiso ku meiso.
15 Bubobelelo bube kuguli.
Bilemba byeitu bikukusambizia. Watusambizia na baneitu, na muntu na muntu ku izina lyage.