YUDA
Kusambizania
1
1 Yuda, mukiti wa Yesu Kristo, nu mubuto wa Yakobo, ku babo bamaninwe, batundwa mu Kalaga Tateiswe, nu balangilwe ku kabamba ka Yesu Kristo: 2 Kyombo, bubobelelo nu lutundo bitalikwe kumuli!
Basozi ba Buza
3 Batundwa bane, nabezaga nunse na komanizia kumusanzila wono mukanda ku kitondo kya lonio lweitu beiswe bansania, namonine buno natunganana kumusanzilago buno namukase magala ma kwitana nabo mu bukatizio bwakasenwe ku basililila limbizi limozi tugu. 4 Kubuno munkatini mweinyu kuli bantu bamozi beiyingizizie mu lumbisombiso, bantu basanzidwe lusungio luluno kutukila wakalazi, batakua Kalaga boba, bakugalukya mponga za Kalaga weitu ku ntundo zabo mibi, nu bakutuna Mukota munene weitu, We tugu, U, Mukota weitu Yesu Kristo.
5 Aba nu mukumenya busoga bitondo bibino binsania, nkutunda kumukengelezia buno Mukota, kusila kwa konia bantu bage nu kubatikya mu Misri, eitile babo batakatizia; 6 nu banzelo batalangile bwangato bwabo, tondo basigile biziki byabo, ababikile mu bikando bitanakuzinda mu kapilo, kulindila busi buzinda bwa lusungio lunene, 7 anga bubeikasenne ba ku Sodoma nu ba ku Gomora nu ba ku miino zabezaga bwigi, ku butazi butakulungana, nu bo babede kisusania kya bakubabazibwa na lusungio lwa keiya katanakuzinda.
8 Aba bubo, babo bantu nu bo, baloti ba ndozi, bakubigia mibili zabo bobenyene na nsese, bakubenga bakota babo, nu bakulinga bangati. 9 Nu Mikaeli tondo, uli mwanzelo munene, gaalwanine na Satana nu kwenda nage myango ku kabamba ka mubili wa Musa, ntagelekile ku bilingano, tondo abwide bunee: “Mukota akuzugile!” 10 Tondo bantu babano bakulinga, bitondo bibeteizi, nu bakwibigia mu bitondo bibeizi ku bumba, anga nyama ziteli na menge, u bibyo bikulusia buzimizi bwabo. 11 Kabebe kanene ku babo! Kubuno bayangile lukita lwa Kaina, nu basasizie kuyanga kwaga kwa Balama buno babe na mutali, nu baziminne mu buguni bwa Kora. 12 Bantu babano beli anga nsanda zili na bukonzi mu misanganano zeinyu za lutundo gabakulia gamozi n'inyuwe, balangi bobenyene bakulia tugu kuteli boba. Beli anga lutundutundu luteli na mazi, lukusindikwa na lumpumpu, beli anga miti zoma ziteli na biguma lwabusio lwa kulinga kwa mbula, nu zayuidwe, zakule mambizi mabili. 13 Beli anga bimpumi bikali bya kitatenge bitanazibizibwa, bikubasia iyulo; beli anga nkeninkeni zikutingatinga, nu mwizi wa kapilo walangilwe kubo ku nkiko na nkiko zitanakuzinda.
14 Nu ku kabamba kabo nu bo, Enoke muntu wa mutubakamo kutukila ku Adamu, alenganizie bunee: “Lola, Mukota akavwa na basililila bage tununu na tununu, 15 buno asungie bantu bansania, nu kubabazia babo bansania batakua Kalaga boba, ku kabamba ka makitilo mabo mansania ma buzimizi mabakitilaga kuteli kwanza Kalaga nu ku kabamba ka bitondo binsania bibibu bibatendelaga babo bagi batakwanza Kalaga.” 16 Babano beli bantu bakwizuzuma, bakulaka na bubo bubakwizuzuma nabo, bakwenda ku kuyanga ntundo zabo mbi bobenyene, beli na bitondo bya lwikotio mu tunua twabo, nu bakukutya bango bantu buno bamone mutali.
Kutonda nu Nango
17 Tondo inyuwe, batundwa, kengelazi bitondo byalenganizibwe wakalazi na basingwa ba Mukota weitu Yesu Kristo. 18 Bamubwide bunee: “Ku bindi bya nkiko nzinda, kukaba bantu bakwililika bakendaga mu ntundo zabo mbi za buzimizi.” 19 Babano bantu u bakulusia malekanuko, bantu ba kino kisi, nu tabeli na Muuza. 20 Tondo inyuwe, batundwa, mwiyobake mubenyene mu bukatizio bweinyu bwasililila, nu musege mu Muuza Wasililila, 21 nu mwidange mu lutundo lwa Kalaga, ku kulindila kyombo kya Mukota weitu Yesu Kristo, kumwikya ku kalamo katanakuzinda.
22 Kwilazi bango kyombo, babo beli na mizangozango; 23 oniazi bango ku kubatikya mu keiya; nu lingo, mube na kyombo kyasambikibwa na boba, ku kusomba aba nsulu zabikwa nsese na mubili.
Kuganuna Kuzinda
24 Tondo ku wozo ukuvwama kumulanga buno tamwikuke nu kumulolesia lwabusio lwa lutanuno lwage geteli itondoki mu mbogimbogi nnene nunse, 25 ku Kalaga umozi tugu, Monia weitu, kube lutanuno, nu bunene, nu magala nu bwangato mu Yesu Kristo Mukota weitu lwabusio nu nkungu insania nu kano kaluma, nu mu nkiko insania zitanakuzinda! Amena!