KULOLESIBWA
KWA YESU KU YOANA
Kalingilo
1
1 Kulolesibwa kwa Yesu Kristo, kwakasilwe na Kalaga buno alolesie ku bakiti bage bitondo byatunganana kusasia kubasa, nu abimenyesizie ku kusinga mwanzelo wage ku mukiti wage Yoana; 2 wono alongekede idagi lya Kalaga nu bulongeki bwa Yesu Kristo, u bitondo binsania byamonine kubyo. 3 Mbogimbogi ku wozo ukusoma nu ku babo bakungwilila malagi ma bulengania bubuno, nu bakulanga bitondo byasanzilwemo! Kubuno nkungu zise bwigi. Kusambizia Makanisa Mutubakamo
4 Yoana ku makanisa mutubakamo meli ku Azia: mponga nu bubobelelo bibe kumuli kutuka ku wozo uligo, wabezagago, nu ukavwa; nu kutuka ku myuza mutubakamo zili lwabusio lwa kisumbi kyage kya Bukota, 5 nu kutuka ku Yesu Kristo, Mulongeki Wisanana, Mutangi kubutwa kutuka ku bakuzi; nu Mwangati wa bakota ba kisi!
Ku wozo ukututundaga, nu watukandwide ku bwagi bweitu na mikila zage, 6 nu watukitile kuba bukota bwa basankoga ku Kalaga Isi, kweli kube lutanuno nu magala, ku nkiko na nkiko zitanakuzinda! Amena.
7 Lolazi, akavwa na bimpa! Nu liso na liso na likamumonako, aba babo bamusumitile nu bilongo binsania bya mu kisi bakeidilila ku kabamba kage. Ee, ububo! Amena.
8 “Nne nili Alfa nu Omega,” u bwatendile Mukota Kalaga, wozo uligo, wabezagago nu ukavwa, Mwiya Mayombo.
Yoana Amonine ku Kalolesio ka Kristo
9 Nne Yoana, nili mubuto weinyu nu muneinyu mu nsungio, nu mu bukota, nu mu kwikalila mu Yesu, nabezaga ga kisanga kyamanagwa buno, Patimo, ku kabamba k'idagi lya Kalaga nu ku bulongeki bwa Yesu. 10 Nizazizibwe na Muuza mu busi bwa Mukota, nu nungule ku iyuki inene kumbusa kwane anga iyuki lya monze, 11 lyatendile bunee: “Kitondo kyukumonako, kisanze mu kigondi kya mukanda, nu kisinge ku makanisa mutubakamo: ku Efeso, ku Smurna, ku Pergamo, ku Tuatera, ku Sardi, ku Filadelfia, nu ku Laodikia.”
12 Nakebetukile buno nimenye iyuki lyatendaga na nne: Nu ganakebetukile, namonine ku byanikilo bya tusuku mutubakamo bya olo, 13 nu munkatini mwa bibyo byanikilo mutubakamo bya tusuku, namonine ku muntu umozi wasusanania na Mwana wa Muntu, avwala nsulu ndazi nu zatendekwa na mukoma wa olo ku bukuba bwage, 14 itoe lyage nu nzwili zage zabezaga zenga anga myoza za kyema kya mukoko, nu anga lubula; meiso mage mabezaga anga ngulumina za keiya, 15 nu masindi mage mabezaga anga nsubi zagwa, anga zikutuka mu keiya; nu iyuki lyage lyabezaga anga kela ka mazi meingi. 16 Abezaga na nkeninkeni mutubakamo mu kuboko kwage kwa seidume. Mu kanua kage mwatukile mwene wa nganda mukali gukutoa ku ntungo ibili; nu malanga mage mabezaga anga kisongo kya busi ku nkungu ziukusana na magala makyo. 17 Ganamumonineko, nagwede ku magulu mage anga muntu wakua. Abikile kuboko kwage kwa seidume gantata gane nu ambwide bunee: “Ntukue boba, Nne nili Mutangi nu Muzinda, 18 nili Mulami. Nabezaga nakua; lola, nili Mulami ku nkiko na nkiko, nu nili na mitandulwa za lukuo nu za kiziki kya bakuzi, u Hadese. 19 Umpanga, sanza bitondo biwamonineko, nu bitondo biligo, nu bitondo bili kayikayika kuvwa kumbusa kwa bibino. 20 Bwisulilwa bwa keinda ka zezo nkeninkeni mutubakamo ziwamonineko mu kuboko kwane kwa seidume, nu bibyo byanikilo mutubakamo bya tusuku bya olo, buli buno: zezo nkeninkeni mutubakamo zili migenzi za makanisa mutubakamo, nu bibyo byanikilo bya tusuku mutubakamo byili makanisa mutubakamo.”