2
1 Nu atendile lingo bunee: “Sanza ku mugenzi wa kanisa ka ku Efeso bubuno: bitondo bibino u bikutenda wozo ukeite nkeninkeni mutubakamo mu kuboko kwage kwa seidume, wozo ukutabanga munkatini mwa byanikilo mutubakamo bya olo: 2 Nizi makitilo mobe, nu mulimo wobe, nu kwikalila kwobe, nu nizi buno ntunavwama kwikalila bantu babi; nu lingo wagelekile babo bakwimana buno beli basingwa nu tabelibo, nu wabamenyine buno beli boza, 3 nu uli na kwikalila, nu wababedwe ku kabamba k'izina lyane, nu ntwakutilwe. 4 Tondo kitondo kinili nakyo kuguli kili buno wasigile lutundo lwobe lutangi. 5 Ku bubuno, kengela tanga gawagwilide, igonge nu kita lingo makitilo mobe matangi; ndi ta bubo, navwe kuguli nu natikye kyanikilo kyobe kya kasuku mu kiziki kyakyo, ndi ntwigonga. 6 Tondo uli na kitondo kikino, buno ukusomba makitilo ma baNikolayi, mamo mankusombaga nu nne. 7 Wozo uli na matuzi, ongwilile bubo bukutenda Muuza Wasililila ku makanisa: Wozo ukukindaga, nkamukasa bwangato bwa kulia ku muti wa kalamo, guli mu isoa lya Kalaga.”
Musagu Wasingilwe ku Kanisa ka ku Smurna
8 Musagu wasingilwe ku kanisa ka ku Smurna bunee: “Bitondo bibino u bikutenda wozo uli Mutangi nu Muzinda, wozo wakule, nu uli na kalamo kano kaluma: 9 nizi kabebe kobe nu muzambo wobe tondo uli mugumi, nu kubigia kwa babo bakwibula buno beli baYuda nu tabelibo, tondo beli numba z'ikumbamino lya Satana! 10 Ntube na boba buno wababazibwe. Lola, Satana eise bamozi ba kumuli mu kikando, buno mugelekwe, nu mwabe na mbabazio mu bindi ikumi. Ube mukatizia aaba nu kwika ku lukuo, nu nakukase lukalilo lwa kalamo.
11 Wozo uli na matuzi, ongwilile bubo bukutenda Muuza Wasililila ku makanisa: Wozo ukukindaga ntababazibwe na lukuo lwa mabili.”
Musagu Wasingilwe ku Kanisa ka ku Pergamo
12 Sanza ku mugenzi wa kanisa ka ku Pergamo bunee: “Bitondo bibino u bikutenda wozo uli na mwene wa nganda gukutoa ntungo ibili: 13 Nizi kiziki kiwikile gakyo, nizi buno kikyo kili kisumbi kya bukota bwa Satana. Ukwegamina nunse ku izina lyane, ntwananine bukatizio bwane, aba mu bindi bya Antipa, mulongeki wane mukatizia, witilwe kweinyu ga kiziki kikyo gakwikalaga Satana. 14 Tondo nili na kitondo kimozi kuguli kili buno, kuko uli na bantu bakuyanga nunse meigisia ma Balama, wozo wigisizie Balaka kubika ikozi lya kukikitania lwabusio lwa bana ba Israeli buno balie nyama zakasanwa ku nkisi nu buno bakite butazi. 15 Ububo, nu uwe, uli na bantu bakuyanga nu bo meigisia ma baNikolayi. 16 Umpanga igonge; ndi ta bubo, nti nasasie kuvwa kuguli, nu nalwane nabo na mwene wa kanua kane.
17 Wozo uli na matuzi, ongwilile bubo bukutenda Muuza Wasililila ku makanisa! Ku wozo ukukinda, nkamukasa mana mabisilwe, nu nkamukasa ikozi lyenga, gantata ga lilyo gasanzwa izina ito, liteizi muntu wampa, umpanga wozo wakasilwelyo.”
Musagu Wasingilwe ku Kanisa ka ku Tuatera
18 Sanza ku mugenzi wa kanisa ka ku Tuatera bunee: “Bitondo bibino u bikutenda Mwana wa Kalaga, wozo uli na meiso anga ngulumina za keiya, nu masindi mage meli anga nsubi zagwa na keiya. 19 Nizi makitilo mobe, nu lutundo lwobe, nu bukatizio bwobe, nu kwikalila kwobe, nu makitilo mobe meingi mazinda matinga nunse matangi. 20 Tondo kitondo kinili nakyo kuguli kili buno, ukusiga wozo mukikulu Yezebeli ukwitenda buno, eli mulengania, akwigisia nu kwengelela bakiti bane, buno bakite butazi nu balie nyama zakasanwa ku nkisi. 21 Namukasile nkungu buno eigonge, nu ntakutunda kwigonga ku butazi bwage. 22 Lola, namwise ga mugu, nu kusinga mbabazio nnene ku babo bakukita butazi gamozi nage ndi tabeigonga ku makitilo mabo. 23 Nu nazikye bana bage na lukuo; nu makanisa mansania makamenya buno nili wozo ukugelekaga makengelo nu mitima, nu nkakasa muntu na muntu geigezye makitilo mage.
24 Ku beinyuwe, bango bansania ba ku Tuatera, batakatile meigisia mamano, nu batamenyine bitondo bibakutenda u tukungu tubi twa Satana; nsyabike ungo muzigo gantata geinyu; 25 umpanga, kikyo kimuli nakyo mukikokomezia aaba nu ganavwe. 26 Ku wozo ukukinda, nu ukalanga makitilo mane aaba nu kuzinda, namukase bwangato bwa kwangata baBilongo. 27 Abangate na musumbo wa kyuma wa bukota, nu kubabugia anga bukubugaga malega m'ibumba, anga bunakasilwe bwangato na Tatane. 28 Nu nkamukasa lukenikeni lwa nindunindu.
29 Wozo uli na matuzi, ongwilile bubo bukutenda Muuza Wasililila ku makanisa.”