Musagu Wasingilwe ku Kanisa ka ku Sardi
3
1 Nu atendile lingo bunee: “Sanza ku mugenzi wa kanisa ka ku Sardi bubuno: Bitondo bibino u bikutenda wozo uli na myuza mutubakamo za Kalaga nu nkeninkeni mutubakamo: Nizi makitilo mobe nu lukumu lwobe buno uli mulami, nu uwe wakule. 2 Yuka nu ukokomezie byasigala bili kayikayika kukua; kubuno nsyamonine makitilo mobe buno masililila lwabusio lwa Kalaga wane. 3 Umpanga, kengela buni buwakatile nu buwunguleko, umalange nu igonge. Nu ndi ntwayuka, navwe anga mwibi, nu ntwamenye nkungu nkizi zinavwe kuguli. 4 Tondo uli na bantu bamozi ku Sardi batabikile nsese ku nsulu zabo; batabange gamozi na Nne, bavwala nsulu zenga, kubuno bazitananina. 5 Umpanga wozo wakinde awwalikibwe nsulu zenga, nsyazimie nunse izina lyage mu mukanda wa kalamo, nu nitabizie izina lyage bwasibwasi lwabusio lwa Tatane nu lwabusio lwa banzelo bage. 6 Wozo uli na matuzi, ongwilile bubo bukutenda Muuza Wasililila ku makanisa!”
Musagu Wasingilwe ku Kanisa ka ku Filadelfia
7 Sanza ku mwanzelo wa kanisa ka ku Filadelfia bunee: “Bitondo bibino u bikutenda wozo wasililila, wozo wa bulili, wozo uli na mutandulwa wa Davidi, wozo ukwigula nu takuli muntu wampa unakanda, nu ndi wozo akanda, takuli muntu wampa uneigula. 8 Nizi makitilo mobe. Lola, nakukwilide lwibi lwabusio lwobe, lutanavwama muntu wampa kukanda, kubuno uli na magala makeke, walangile idagi lyane, nu ntwatunine izina lyane. 9 Lola, nakukasa bamozi ba mu babo ba numba za kukumbamina za Satana, bakwibula buno beli baYuda nu tabelibo, tondo bakweka buza; lola, nabalusie buno bavwe kukumbamina ku magulu mobe, nu beitabizie buno nakutundile. 10 Kubuno walangile kitondo kya kwikalila mundi, nakulange nu nne ku nkungu za malindiko zavwe ku kisi kinsania kulindika babo beli ga kisi. 11 Nasasie kuvwa. Kokomezia nunse kiguli nakyo, buno muntu wampa anavwa kukunyaga lukalilo lwobe. 12 Wozo ukukinda, namukite kuba iyango mu numba za kukumbamina za Kalaga wane, nu ntatuke mumo lingo; nasanze gantata gage izina ito lya Kalaga wane, nu izina lya mwino wa Kalaga wane, lya Yerusalema muto, ukugela kutuka mwigulu ku Kalaga wane, nu izina lyane ito.
13 Wozo uli na matuzi, ongwilile bubo bukutenda Muuza Wasililila ku makanisa.”
Musagu Wasingilwe ku Kanisa ka ku Laodikia
14 Sanza ku mugenzi wa ku kanisa ka ku Laodikia bunee:
“Bitondo bibino u bikutenda wozo uli Amena, mulongeki wisanana nu wa bulili, mutangi wa bibumbwa binsania bya Kalaga. 15 Nizi makitilo mobe, nizi buno ntukwasa aba ntukuzuza. Tondo nkutunda buno ube mwaso aba muzuzo. 16 Umpanga, kubuno watamba, nu ntukwasa aba ntukuzuza, nakusale kutuka mu kanua kane. 17 Kubuno ukutenda bunee: ‘Nili mugumi, nigumizie, nu nsikwiyanina kampa,’ tondo ntwizi buno uli watamba, nu uli na tubebe, nu uli muzambi, nu uli kyuku nu uli mundulu, 18 nkukwana buno unkunze olo zasugilwe na keiya, buno ube mugumi nu nsulu zenga buno uvwale nu buno ubise mundulu wobe, nu muti wa kubonga ku meiso mobe buno umone. 19 Bansania bankutunda, nkubazugila nu nkubasungula. Umpanga, ba na komanizia nu igonge. 20 Lola, nemana ku lwibi, nu nkukokomona. Ndi muntu ongwa ku iyuki lyane nu kwigula lwibi, nti ningile kwage, nalie gamozi nage, nu we gamozi na Nne. 21 Wozo ukukinda, namukase bwangato bwa kwikala gamozi na Nne ga kisumbi kyane kya Bukota, anga Nne bunakindile nu nikede gamozi na Tatane ga kisumbi kyage kya Bukota.
22 Wozo uli na matuzi, ongwilile bubo bukutenda Muuza Wasililila ku makanisa!”