Kukumbamina kwa Mwigulu
4
1 Kusila kwa bubo, nalolile, nu lola, lwibi lwigulwa mwigulu. Iyuki itangi linabezaga nkungwa kulyo lwabusio anga monze, likutenda na nne, lyabwide bunee: “Bakama gano nu nikulolesie bitondo byatunganana kubasa kumbusa.” 2 Kazanga kongo nabede mu Muuza: nu namonine ku kisumbi kya bukota kyabikwa mwigulu, nu Umozi abezaga gantata ga kikyo kisumbi. 3 Wozo wabezaga wikala gakyo, abezaga na kilungi kyasusania ikozi lya yaspi nu lya sardio; nu kisumbi kya bukota kyabezaga kyatimbwa na mumpilinga anga ikozi lya zumaridi. 4 Mu ntungo kutimba kisumbi kyage kya bukota, namonine ku bisumbi makumi mabili nu binazi bya bukota, nu namonine ku bakulu makumi mabili nu banazi beikala gantata gabyo, babezaga bavwalikibwa nsulu zenga nu ku matoe mabo babezaga na nkalilo za olo. 5 Nu ku kikyo kisumbi kya bukota kwatukile mikenzi, moki nu mikulumino. Nu lwabusio lwa kisumbi kya bukota, tusuku mutubakamo twa keiya twabezaga twabanga, u myuza mutubakamo za Kalaga. 6 Nu lingo lwabusio lwa kisumbi kya bukota, kwabezaga anga kitatenge kya kiyolo kyasusania ikozi lyenga.
Munkatini mwa kikyo kisumbi kya bukota nu mu ntungo zakyo, kwabezaga bibumbwa bilami binazi biyala na meiso ku malanga nu ku nkoto.
7 Kibumbwa kilami kitangi kyabezaga kyasusania nsimba, nu kibumbwa kya bibili kyabezaga kyasusania kyana kya ngombe, nu kibumbwa kilami kya bisatu kyabezaga na malanga anga ma muntu, nu kibumbwa kilami kya binazi kyasusania anga ndiu zikulenga. 8 Bibyo bibumbwa bilami binazi bili nakyo na byupi mutuba nu biyala na meiso ku ntungo insania nu munda. Tabikumunwa musi nu kindi kutenda bunee:
“Wasililila, wasililila, wasililila, eli Mukota Kalaga,
Mwiya Magala Mansania; wabezaga, uligo nu ukavwa!”
9 Nu nkungu za bibyo bibumbwa bilami binazi zibikuganuna nu kusima, nu kukasa lwanzo ku wozo wikala ga kisumbi kya bukota, ku wozo uli mulami ku nkiko na nkiko zitanakuzinda, 10 babo bakulu makumi mabili nu banazi nti bagoa gansi kukoma mazu mabo lwabusio lwa wozo wikala ga kisumbi kya bukota, bakuganuna wozo mulami ku nkiko na nkiko zitanakuzinda, nu nti balekela nkalilo zabo lwabusio lwa kisumbi kya bukota nu kutenda bunee:
11 “Mukota weitu nu Kalaga weitu watananina
kukaswa lutanuno nu lwanzo nu magala, kubuno
Uwe u wabumbile bintu binsania, nu ku kabamba
ka kutunda kobe, ukinsa byabumbilwe nu biligo.”