Mukanda nu Mwana wa Mukoko
5
1 Nu mu kuboko kwa seidume kwa wozo wabezaga eikala gantata ga kisumbi kya bukota, namonine ku kigondi kya mukanda kyasanzilwe munda nu gantata, kyakandwa na mitandulwa za tumenyikilo mutubakamo. 2 Nu namonine ku mwanzelo wa magala nunse akulaluka n'iyuki inene bunee: “Nazi unavwama kukandula kigondi kya mukanda kikino nu kutikya tumenyikilo twako?” 3 Nu takwabezaga muntu wampa mwigulu aba ga kisi, aba kunsi kwa kisi wavwamine kukandula kikyo kigondi kya mukanda aba kulola muko. 4 Nu nalilile nunse, kubuno takwamonekile muntu wampa watananina kukandula kikyo kigondi kya mukanda aba kulola muko. 5 Nu umozi wa ku babo bakulu ambwide bunee: “Ntulile; lola, Nsimba za kikanga kya Yuda, wa kibuti kya Davidi akindile. Avwame kukandula kigondi kya mukanda kikyo, nu mitandulwa za tumenyikilo mutubakamo twako.” 6 Nu namonine, munkatini mwa kisumbi kya Bukota nu mwa bibumbwa bilami binazi nu mwa babo bakulu, namonine ku Mwana wa Mukoko wabezaga emana gago anga waseswa. Abezaga na mega mutubakamo nu meiso mutubakamo, u myuza mutubakamo za Kalaga, zasingilwe mu kisi kinsania. 7 Avule nu atolile kigondi kya mukanda ku kuboko kwa seidume kwa wozo wabezaga eikala gantata ga kisumbi kya bukota. 8 Nu gaakatile wozo mukanda, bibyo bibumbwa bilami binazi, nu babo bakulu makumi mabili nu banazi bagwede gansi kukoma mazu mabo lwabusio lwa Mwana wa Mukoko, beikeite nawe nawe nzenze nu bituma bya olo bizazibwa na bulago bwa nsunu nsoga, u masego ma basililila. 9 Nu beimbaga lwimbo luto, nu kutenda bunee:
“Watananina kutola kigondi kya mukanda kikyo
Nu kukandula mitandulwa za tumenyikilo twago.
Kubuno wasesilwe, nu ku mikila zobe,
Wakunzide Kalaga bantu ba bilongo binsania,
Ku ba mitendezi insania, ba bikanga binsania
nu ba bisi binsania;
10 Watukitile kuba bakota nu basankoga ku Kalaga weitu,
Nu twangate kisi.”
11 Nu namonine nu nungule ku iyuki lya banzelo beingi nu maganzo mabo mabezaga mambizi tununu twingi, nu tununu mambizi tununu na tununu. Babezaga batimba mu ntungo mwa kisumbi kya Bukota, nu lya bibumbwa bilami nu bya bakulu. 12 Batendaga n'iyuki ibibu bunee:
“Mwana wa Mukoko wasesilwe atananina kukaswa
bwangato,
Nu bugumi, nu menge, nu magala, nu lwanzo,
nu lutanuno nu mbogimbogi.”
13 Nu bibumbwa binsania bili mwigulu, nu bya ga kisi, nu kunsi kwa kisi, mu kitatenge nu binsania bili mubyo, nungule ku bikutenda bunee:
“Ku wozo wikala ga kisumbi kya bukota,
Nu ku wozo Mwana wa Mukoko,
Kube mponga, nu lwanzo, nu lutanuno nu magala,
ku nkiko na nkiko kutanakuzinda!”
14 Nu bibyo bibumbwa bilami binazi byatendile bunee: “Amena!” Nu bakulu bagwede gansi kukoma mazu mabo nu bamukumbaminne.