Tumenyikilo twa Mitandilwa
6
1 Nu namonine ku Mwana wa Mukoko nkungu zakandwide kamenyikilo katangi ku tuto tumenyikilo mutubakamo, nu nungule ku kibumbwa kimozi kya ku bibyo bibumbwa bilami binazi kikutenda n'iyuki inene anga mukulumino mukali bunee: “Vwa!” 2 Nalolile nu namonine, kwabasile farasi zenga, wozo wabezaga wabakama gantata gazo, abezaga na bunta bwa misungu; akasilwe lukalilo nu endaga akinda nu buno akinde nunse. 3 Nkungu zakandwide kamenyikilo ka tubili, nungule ku kibumbwa kilami kya bibili kikutenda bunee: “Vwa!” 4 Nu kwabasile engo farasi zakisimana. Wozo wabezaga wabakama gantata gazo, akasilwe bwangato bwa kutikya bubobelelo mu kisi, buno, bantu beitane bwabobwabo; nu akasilwe mwene mukali.
5 Gakandwide Mwana wa Mukoko kamenyikilo ka tusatu, nungule ku kibumbwa kilami kya bisatu kikutenda bunee: “Vwa!” Nu namonine kwabasa farasi zina. Wozo wabezaga wabakama gantata gazo, abezaga na kilindiko kulindika buzitu mu kuboko kwage. 6 Nu nungule ku iyuki munkatini mwa bibumbwa bilami binazi, likutenda bunee: “Kilindiko kimozi kya ngano kikuligwa busi bumozi bugimagima bwa mulimo, nu bilindiko bisatu bya shayiri bikuligwa busi bumozi bugimagima bwa mulimo. Tondo ntunyege makiti nu mazi ma biguma.”
7 Nkungu zakandwide kamenyikilo ka tunazi, nungule ku iyuki lya kibumbwa kilami kya binazi likutenda bunee: “Vwa!” 8 Nu namonine kwabasile farasi zenga anga mazi.
Wozo wabezaga wabakama gantata gazo, amanagwa buno Lukuo, nu Hadese, kiziki kya bakuzi, kyamuyangaga. Bakasilwe bwangato ku kyindi kimozi kya binazi kya kisi buno beite bantu na mwene, nu na nzala nkali, nu na lukuo, nu na nyama nkali za mu kisi.
9 Nu gakandwide kamenyikilo ka tutano, namonine kunsi kwa kasenga, ku mitima za bantu beitilwe ku kabamba k'idagano lya Kalaga nu ku kabamba ka bulongeki bubabezaga na bo. 10 Balalukile n'iyuki ibibu bunee: “Ee, Mukota Mwiya Bwangato Bunsaia, wasililila nu wa bulili, nkungu nkizi ziukulindila kusungia nu kusuba mikila zeitu ku babo beikile ga kisi?” 11 Bakasilwe nsulu ndazi zenga ku muntu na muntu wa kubeli; nu babwidwe buno, bomunwe tanga nkungu nkeke, aaba nu gakuke maganzo ma banyabo na mulimo nu mibuto zabo batunganana kukua nu bo anga bo.
12 Nalolile, gakandwide kamenyikilo ka mutuba; nu kwabezaga kaningini kanene ga kisi, kisongo kya busi kyabede kapilo anga nsulu z'ikunino lya myoza ndazi, mwezi unsania wagalukile anga mikila. 13 Nu nkeninkeni kutuka kwigulu zakolokile gansi anga biguma bya muti wa figi watengibwatengibwa na kisoa kinene. 14 Igulu lyatukile anga kigondi kya mukanda ukugondwa, nu miduko insania nu bisanga binsania byatikizibwe ku biziki byabyo. 15 Bakota ba kisi, nu bakulu, nu bakota ba bakoloboyo, nu bagumi, nu beiya magala nu bakobe bansania nu bakandulwa bansania beibisile mu tulemba nu mu makozi ma miduko, nu babwide miduko nu makozi bunee: 16 “Mutulimbe nu mutubise lwabusio lwa wozo wikala ga kisumbi kya bukota, nu lwabusio lwa bongoa bwa Mwana wa Mukoko. 17 Kubuno busi bunene bwa bongoa bwage bwabasa nu nazi unavwama kwemana?”