Bantu 144,000 ba BaIsraeli
7
1 Kusila kwa bubo, namonine ku banzelo banazi bemana ku ndenge inazi za kisi; babezaga bakata lumpumpu lwa ndenge inazi za kisi, buno lumpumpu lunsania talupupe ku kisi, aba ku kitatenge, aba ku muti wampa. 2 Nu namonine ku ungo mwanzelo wabakamaga ku lulenge lukutukaga ku kisongo kya busi nu wabezaga na kamenyikilo ka Kalaga Mulami; nu alalukile n'iyuki ibibu ku banzelo banazi bakasilwe bwangato bwa kubabazia kisi nu kitatenge, nu atendile bunee: 3 “Ntukite bubi bwampa ku kisi aba ku kitatenge, aba ku miti, aaba nu gatukasila kubika tumenyikilo ku malanga ma bakiti ba Kalaga weitu.” 4 Nu nungule ku maganzo ma babo babikilwe kamenyikilo, bantu tununu lukama makumi manazi nu banazi (144.000) kutuka ku kilongo na kilongo kya bana ba baIsraeli. 5 Ku kikanga kya Yuda, tununu ikumi nu tubili (12.000) babikilwe kamenyikilo; ku kikanga kya Rubeni, tununu ikumi nu tubili (12.000); ku kikanga kya Gadi, tununu ikumi nu tubili (12.000); 6 ku kikanga kya Aseri, tununu ikumi nu tubili (12.000); ku kikanga kya Nafutali, tununu ikumi nu tubili (12.000); ku kikanga kya Manase, tununu ikumi nu tubili (12.000); 7 ku kikanga kya Simeoni, tununu ikumi nu tubili (12.000); ku kikanga kya Lawi, tununu ikumi nu tubili (12.000); ku kikanga kya Isakari, tununu ikumi nu tubili (12.000); 8 ku kikanga kya Zebuluni, tununu ikumi nu tubili (12.000); ku kikanga kya Yosefu, tununu ikumi nu tubili (12.000); ku kikanga kya Benjamina, tununu ikumi nu tubili (12.000) babikilwe kamenyikilo. Mukundamano Munene
9 Kusila kwa bitondo bibino nalolile, nu namonine kwabezaga musanganano munene utanavwama muntu wampa kuganza bantu ba kilongo na kilongo, ba kikanga na kikanga, bantu ba mutendezi na mutendezi. Bemanine lwabusio lwa kisumbi kya Bukota nu lwabusio lwa Mwana wa Mukoko bavwala nsulu ndazi zenga, nu babezaga na nanga za bibila mu maboko mabo. 10 Nu balalukile n'iyuki ikali, batendile bunee: “Lonio luli ku Kalaga weitu ga kisumbi kya Bukota nu ku Mwana wa Mukoko.” 11 Nu banzelo bansania babezaga bemana mu ntungo mwa kisumbi kya Bukota, nu mu ntungo mwa bakulu nu mwa bibumbwa bilami binazi bagwede gansi nu kukoma mazu lwabusio lwa kisumbi kya Bukota, baganunaga, nu bakumbaminne Kalaga. 12 Batendile bunee: “Amena! Mponga nu lutanuno, nu menge, nu kusima, nu lwanzo, nu bwangato, nu magala bibe ku Kalaga weitu, aaba nu ku nkiko na nkiko zitanakuzinda! Amena!”
13 Nu umozi wa ku babo bakulu akwide nu ambwide bunee: “Babano bavwalikibwa nsulu zenga beli banazi? Nu kuni kubatukile?” 14 Nu namubwide bunee: “Mukota wane, uwe wizi ko.” Nu ambwide bunee: “Babano u bakutuka munkatini mwa mbabazio nnene; basugile nsulu zabo nu baziengezie mu mikila za Mwana wa Mukoko. 15 Ku bubuno, ukinsa beli lwabusio lwa kisumbi kya bukota kya Kalaga, nu bakumukitila musi nu kindi mu numba zage za kukumbamina. Wozo wikile ga kisumbi kya Bukota eikale gamozi nabo. 16 Tabakue na nzala lingo, nu tabakue na mpusia lingo, aba musi aba muzuzo tabyabababazie lingo, 17 kubuno Mwana wa Mukoko uli munkatini mwa kisumbi kya Bukota abalange nu abasondelezie ku tunua balongo twa mazi ma kalamo, nu Kalaga anyonyone bisozi binsania ku meiso mabo.”