Kamenyikilo ka Mutandulwa wa Mutubakamo
8
1 Mu nkungu zakandwide kamenyikilo ka mutubakamo, kwabede mukobi mwigulu bwigi na nkungu emozi. 2 Nu namonine ku banzelo mutubakamo bemana lwabusio lwa Kalaga, nu bakasilwe myonze mutubakamo. 3 Nu ungo mwanzelo avule, nu emanine bwigi na kiziki kya kayulo abezaga na nyungu za olo; bamukasile bulago bwingi, buno abukasane gamozi na masego ma basililila bansania, ga kasenga ka olo keli lwabusio lwa kisumbi kya Bukota. 4 Muuki wa bulago wabakamine gamozi na masego ma basililila, ku maboko ma mwanzelo lwabusio lwa Kalaga. 5 Nu mwanzelo akatile nyungu, azizazizie na keiya ka kasenga ka kayulo, nu azilekede ga kisi. Nu kwabede muuki, nu mikulumino, nu mikenzi, nu kaningini ka kisi.
Monze
6 Nu babo banzelo mutubakamo babezaga na monze mutubakamo beibikile kayikayika kuzida.
7 Mwanzelo mutangi idile monze. Nu kwabede mbula za lubula nu za keiya byasambikwa na mikila, byalekedwe ga kisi; kyindi kimozi kya bisatu kya kisi kyagisizibwe, nu kyindi kimozi kya bisatu kya miti kyagisizibwe, nu bisugu binsania bibisi byagisizibwe.
8 Mwanzelo wa babili idile monze. Nu kintu kimozi anga mwiduko munene ukubanga keiya kisilwe mu kitatenge; kyindi kimozi kya bisatu kya kitatenge kyabede mikila. 9 Nu kyindi kimozi kya bisatu kya bibumbwa bilami byabezaga mu kitatenge byakule, nu kyindi kimozi kya bisatu kya maato manene mazikile.
10 Mwanzelo wa basatu idile monze. Nu kwigulu kwakolokile lukenikeni lunene lwabanga anga kasuku; lwakolokile gantata ga kyindi kimozi kya bisatu kya nuuzi nnene nu gantata ga tunuabalongo. 11 (Nu izina lya lulo lukenikeni lili Pakanga, bwisulilwa u Lubaba). Kyindi kimozi kya bisatu kya mazi kyagalukile lubaba, nu bantu beingi bakule na mazi, kubuno mabezaga meseli lubaba.
12 Mwanzelo wa banazi idile monze. Nu kyindi kimozi kya bisatu kya kisongo kya busi kyalibwidwe, gamozi na kyindi kimozi kya bisatu kya mwezi, nu kyindi kimozi kya bisatu kya nkeninkeni, buno bizimizie kyindi kimozi kya bisatu kya kyengi kyage, nu kindi nukyo bubobubo.
13 Namonine, nu nungule ku ndiu emozi zalengaga munkatini mw'igulu, zatendile n'iyuki inene bunee: “Kabebe, kabebe, kabebe ku bantu ba ga kisi, ku kabamba ka mango moki ma myonze za banzelo basatu beli kayikayika kwida monze zezo!”