9
1 Mwanzelo wa batano idile monze, nu namonine ku lukenikeni lwakolokile ga kisi kutuka kwigulu. Nu lukenikeni lwakasilwe mutandulwa wa muzinga utanakuzinda, 2 nu lwakandwide muzinga utanakuzinda nu muuki wabakamine kutuka mu wozo muzinga anga muuki w'iyambi inene lya keiya; nu kisongo kya musi nu mpelela byabede kapilo ku kabamba ka muuki wa mu wozo muzinga. 3 Nzige zatukile mu wozo muuki nu zabalangenne mu kisi; nu zakasilwe magala anga magala ma nkutu za kisi. 4 Zabwidwe buno tazikite bubi bwampa ku nsamba za kisi, aba ku kintu kinsania kili kibisi, aba ku muti unsania, tondo umpanga ku bantu beteli na kamenyikilo ka Kalaga ku malanga mabo. 5 Zakasilwe bwangato, ta bwa kubeita, tondo kubababazia mu myezi itano; nu lubaba lwa kutoa kwazo lwabezaga anga lubaba lwa nkutu, gazikutoa muntu. 6 Mu bindi bibyo, bantu balonde lukuo, nu tabalumone nunse; batunde kukua, nu lukuo lwatine bulazi nabo. 7 Zezo nzige zabezaga zasusania farasi zabikwa kayikayika ku bita; gantata ga matoe mabo gabezaga bisusania bya nkumbu za bukota za olo, nu bilungi byabo byabezaga anga bya bantu.
8 Zabezaga na nzwili anga nzwili za bakikulu, nu meinyo mabo mabezaga anga meinyo ma nsimba. 9 Zabezaga na ngabo anga ngabo za kyuma ku bukuba nu muzumio wa byupi byazo, wabezaga anga lukindo lwa tuyanga tukubulutwa na farasi ningi zikuyangilila bita. 10 Zabezaga na mikila zili na tuluba, anga nkutu nu mu mikila zabo u mwabezaga magala ma kubabazia bantu ku myezi itano. 11 Zabezaga na mukota gantata gabo u mwanzelo wa muzinga utanakuzinda, wamanagwa ku kiEbrania bunee: “Abadoni” nu ku kiGriki bunee: “Apolioni.” (Bwisulilwa buli buno, muzikya).
12 Kabebe katangi katingile. Kusila lingo, tungo tubebe tubili tukuvwa.
13 Mwanzelo wa mutuba idile monze. Nu nungule ku iyuki lyatukile ku mega manazi ma kasenga ka olo keli lwabusio lwa Kalaga, 14 nu lyatendile ku mwanzelo wa mutuba wabezaga na monze bunee: “Kandula babo banzelo banazi bakandilwe ku luuzi lunene Furati.” 15 Nu babo banzelo banazi babezaga babikwa kayikayika ku nkungu, nu ku kindi, nu ku mwezi nu ku mwaka bakandwidwe buno beite kyindi kimozi kya bisatu kya bantu. 16 Maganzo ma bakoloboyo bakwendaga gantata ga farasi mabezaga tununu nkama ibili mambizi tununu, nungule ku maganzo mabo. 17 Nu bubo, mu kulolesibwa kwane, namonine ku farasi nu ku babo babezaga gantata gazo, babezaga na ngabo ku bukuba anga idangi lya keiya, nu lya kibiliti, nu lya samawi. Matoe ma farasi mabezaga anga matoe ma nsimba nu ku tunua twabo kwatukaga keiya, nu muuki, nu kibiliti. 18 Kyindi kimozi kya bisatu kya bantu kitilwe na tubebe tutuno tusatu; na keiya, nu muuki, nu na kibiliti byabezaga bikutuka ku tunua twabo. 19 Kubuno magala ma farasi mabezaga mu tunua twabo nu mu mikila zabo; mikila zabo zabezaga zasusania nzoka zili na matoe; nu zezo mikila u zibababazagia nazo.
20 Nu bango bantu bansania basigede tabeitwa na tubebe tutuno, tondo tabeigongile ku makitilo ma maboko mabo, tabasigile kukumbamina basumbu, nu nkisi za olo, nu za feza, nu za nsubi, nu za makozi nu za miti, zitanavwama kumona aba kungwa, aba kwenda; 21 nu tabeigongile ku bwiti bwabo, aba ku buganga aba ku butazi bwabo, aba ku bwibi bwabo.