Mwanzelo nu Mukanda Mukeke
10
1 Namonine ku ungo mwanzelo mubibu akumbaga ga kisi kutuka mwigulu, nu nsulu zage zabezaga kimpa; gantata g'itoe lyage gabezaga mumpilinga nu malanga mage mabezaga anga kisongo kya busi, nu magulu mage mabezaga anga ngulumina za keiya. 2 Abezaga eikete kigondi kya mukanda kikeke kyakandulwa mu kuboko kwage. Atalikile kugulu kwage kwa seidume gantata ga kitatenge, nu kugulu kwage kwa seikazi gantata ga kisi. 3 Nu alalukile n'iyuki ikali, anga kuzuga kwa nsimba. Nu gaalalukile, mikulumino mutubakamo zakuluminne. 4 Gakulumine zezo mikulumino mutubakamo, nabezaga kayikayika kusanza, tondo nungule ku iyuki kutuka mwigulu likutenda bunee: “Bika kamenyikilo ku bitondo byakuluminne mikulumino mutubakamo, nu ntubisanze.” 5 Nu wozo mwanzelo u namonineko emana gantata ga kitatenge nu gantata ga kisi, asakikile kuboko kwage kwa seidume kwigulu, 6 nu alumbide mu wozo ukulamaga ku nkiko na nkiko zitanakuzinda, wabumbile igulu nu binsania bilimo, wabumbile kisi nu binsania bili mukyo nu wabumbile kitatenge nu binsania bilimo bunee: “Takukaba lingo nkungu za kulindila! 7 Tondo ku bindi bikongubwa ku iyuki lya mwanzelo wa mutubakamo, nkungu zikaba bwigi kwida monze, keinda ka Kalaga kazindilile, anga bwasambede bakiti bage, u balengania.”
8 Nu iyuki linungule kulyo kutuka mwigulu, lyatendile lingo bunee: “Enda utole kikyo kigondi kya mukanda kikeke kyakandulwa mu kuboko kwa mwanzelo wemana gantata ga kitatenge nu gantata ga kisi.” 9 Nu nendile ku wozo mwanzelo, nu namubwide bunee: “Nkase kikyo kigondi kya mukanda kikeke.” Nu ambwide bunee: “Tolako, nu ukilie; kyabe lubaba munda zobe, tondo mu kanua kobe kyabe nse anga buuki.” 10 Natolile kikyo kigondi kya mukanda kikeke ku kuboko kwa wozo mwanzelo nu nakimenine; kyabezaga na nse anga buuki mu kanua kane, tondo ganakimenine, nda zane ziyede na lubaba.
11 Kusila nabwidwe bunee: “Watunganana lingo kulengania ku bantu beingi, ku baBilongo, ku mitendezi, nu ku bakota.”