Balongeki Babili
11
1 Nakasilwe nsolu anga musumbo wa kilindiko, nu kutendwa bunee: “Emanuka nu ulindike numba za kukumbamina Kalaga, nu kasenga, nu babo bakukumbamina muzo. 2 Tondo kibanza kili kumbuga kwa numba za kukumbamina Kalaga, kisige ku ntungo, nu ntukilindike, kubuno kyakasilwe ku baBilongo nu bo banyante mwino wasililila ku myezi makumi manazi nu ibili. 3 Nakase balongeki bane babili magala nu bo bakite bulengania ku bindi kanunu kamozi nkama ibili nu makumi mutuba bavwalikizibwe nsulu za makunino.” 4 Babo beli miti ibili za mizeituni nu byanikilo bibili bya tusuku byemana lwabusio lwa Mukota wa kisi. 5 Nu ndi muntu akutunda kubakita bubi, keiya nti katuka mu tunua twabo nu nti kazikya beiti babo; nu ndi muntu akutunda kubakita bubi, atunganana kwitwa mu lukita luluno. 6 Babano beli na magala ma kukanda igulu buno mbula taziloke mu bindi bya bulengania bwabo, nu bo beli na bwangato bwa kugalukya mazi kuba mikila, nu kusungia kisi na lusungio na lusungio ku nkungu na nkungu zibakutunda.
7 Gabakasila bulongeki bwabo, nyama zikatuka ku muzinga guteli na kuzinda zikakita bita nabo, zikabakinda nu kubeita; 8 bitumba byabo bikaba mu nzila za mwino munene, ukususanibwa na Sodoma nu Misri, u gago gatakilwe Mukota wabo ku musalaba. 9 Bantu ba bikanga binsania, nu bilongo binsania, nu mitendezi insania, nu ba kisi kinsania, bakamona ku bitumba byabo ku bindi bisatu nu kyindi, nu tabazige bitumba byabo biyikwe mu nsinda. 10 Nu ku kabamba kabo, bantu ba ga kisi babogeboge. Nu basingilane nkaso bwabobwabo, kubuno babo balengania babili bababazizie bantu ba ga kisi. 11 Nu kusila kwa bindi bisatu nu kyindi Muuza wa kalamo kutuka ku Kalaga wingile mubeli, nu bemanuke ku magulu mabo, nu boba bunene nunse bwakate babo babalolaga. 12 Nu bongule ku iyuki kutuka mwigulu lyababwide bunee: “Bakamazi gano!” Nu babakamine mwigulu mu kimpa; nu beiti babo babalolile. 13 Ku nkungu zezo, kwabede kaningini kanene ga kisi nu kyindi kimozi ky'ikumi kya mwino kyagwede; bantu tununu mutubakamo beitilwe mu kako kaningini ka kisi, nu bango basigede babede na boba, nu bakasile lutanuno ku Kalaga wa mwigulu.
14 Kabebe ka tubili katingile, nu kabebe ka tusatu kakusasia kubasa.
Monze wa Mutubakamo
15 Mwanzelo wa mutubakamo idile monze; nu kwabede moki mabibu mwigulu, matendile bunee: “Bukota bwakasanwa ku Mukota Kalaga weitu nu ku Kristo wage, nu We akangata ku nkiko na nkiko zitanakuzinda.” 16 Nu babo makumi mabili nu banazi beikalaga lwabusio lwa Kalaga ku bisumbi byabo bya bukota, bagwede gansi nu bakomine mazu kukumbamina Kalaga. 17 Batendile bunee:
“Mukota Kalaga, Mwiya Mayombo,
Uliko nu wabezagako,
Tukukusima kubuno wakatile magala mobe nu wangata.
18 BaBilongo bongilwe nu bongoa bobe bukali bwavule,
Nu nkungu za kusungia bakuzi zakuka
Nu kukasa lukalilo lusoga ku bakiti bobe balengania,
Nu ku basililila, nu ku babo bakukua izina lyobe boba,
Bakeke nu banene, nu kuzikya babo bakubigia kisi!”
19 Nu numba za kukumbamina Kalaga zigwidwe mwigulu, nu Sanduku z'Idagano lyage zamonekileko mu numba zage za kukumbamina. Nu kwabede mikenzi, nu muuki, nu mikulumino mikali, nu kaningini ka kisi, nu mbula nnene za lubula.