Mukikulu nu Nzoka Nnene za Kwangamia
12
1 Kakengelezio kanene kamonekileko mwigulu, mukikulu umozi avwalile kisongo kya busi, nu mwezi kunsi kwa magulu mage, nu lukalilo lwa nkeninkeni ikumi nu ibili gantata g'itoe lyage. 2 Abezaga n'iyimi nu alilile nkungu zabezaga na lubaba lwa kubuta. 3 Kango kakengelezio kamonekileko mwigulu: nzoka nnene za kwangamia nu zakisimana zabezaga na matoe mutubakamo nu mega ikumi, nu gantata ga matoe mage nkumbu mutubakamo za bukota. 4 Mukila wage wabulutile kyindi kimozi kya bisatu kya nkeninkeni za mwigulu, nu abikolokizye mu kisi. Nu zezo nzoka nnene za kwangamia zemenne lwabusio lwa mukikulu wabezaga kayikayika kubuta, buno alie mwana wage ku nkungu za kubuta. 5 Abutile mwana wamulume ukangata baBilongo bansania na musumbo wage wa kyuma. Nu mwana wage azanzwidwe ku Kalaga nu ku kisumbi kyage kya bukota. 6 Nu wozo mukikulu atinine mu kalula, kuko abezaga na kiziki kyalongekilwe na Kalaga, buno bamukase idia kuko ku bindi kanunu kamozi nkama ibili nu makumi mutuba.
7 Nu kwabezaga bita mwigulu; Mikaeli nu banzelo bage balwanine bita na zezo nzoka nnene za kwangamia; nu zezo nzoka nnene za kwangamia nu banzelo bage balwanine bita nabo; 8 Tondo tababakindile, nu kiziki kyabo takyamonekileko lingo mwigulu. 9 Nu zezo nzoka nnene za kwangamia zisilwe gansi, nu nzoka zezo za wakalazi, zikumanwa buno, Diabolo nu Satana, wozo ukwengelela kisi kinsania, eisilwe ga kisi gamozi na banzelo bage.
10 Nu nungule ku iyuki inene mwigulu lyatendile bunee: “Kano kaluma lonio lwabasa, nu magala, nu bukota bwa Kalaga weitu, nu bwangato bwa Kristo wage; kubuno eisilwe gansi, wozo musongezi wa mibuto zeitu, wabasongelaga lwabusio lwa Kalaga weitu, musi nu kindi. 11 Bamukindile ku kabamba ka mikila za Mwana wa Mukoko nu ku kabamba k'idagi lya bulongeki bwabo nu tabalemaninne kalamo kabo kutinga kukua ku kabamba ka Kristo. 12 Ku bubo bogazibogazi, meigulu nu inyuwe bakwikalagamo. Kabebe ku kisi nu ku kitatenge! Ku bubuno Diabolo agelile kumuli, eli na bongoa bunene, kubuno eizi buno eli na nkungu nkeke.”
13 Gamonine zezo nzoka za kwangamia buno zisilwe ga kisi, zasungizie wozo mukikulu wabutile mwana wamulume. 14 Nu wozo mukikulu akasilwe byupi bibili bya ndiu nnene, buno alenge mu kalula ku kiziki kya kulangwa kukyo ku nkungu na nkungu nu ku kyindi kya nkungu bulazi na zezo nzoka. 15 Nzoka zabasizie mazi kutuka mu kanua kage anga mazi ma luuzi lunene kumbusa kwa mukikulu buno amugezie na lulo luuzi. 16 Tondo kisi kyakasizie wozo mukikulu, nu kisi kyaswide kanua kage nu kyamenine luuzi lunene lulo lwatukaga mu kanua ka zezo nzoka nnene za kwangamia. 17 Nu nzoka nnene za kwangamia zongedwe wozo mukikulu, nu zendile kulwana bita na kikanga kyage kyasigede, ku babo bakwanza makakizio ma Kalaga nu beli na bulongeki bwa Yesu.