Nyama Ibili Zatukile mu Kitatenge
13
1 Zemenne gantata ga kisanga kya kitatenge. Nu namonine ku nyama zatukile mu kitatenge zabezaga na mega ikumi nu matoe mutubakamo, nu gantata ga mega mage kwabezaga nkumbu ikumi za bukota nu gantata ga matoe mage gabezaga meina ma kulinga Kalaga. 2 Nyama zinamonine kuzo zabezaga zasusania ngozi, nu mabumbu mazo mabezaga anga mabumbu ma dubu, nu kanua kazo anga kanua ka nsimba. Nzoka zamukasile magala mage, nu kisumbi kyage kya bukota nu bwangato bunene. 3 Nu namonine ku itoe limozi lya ku matoe mazo lyabezaga na kyulu kya kukua, tondo kyulu kyazo kya kukua kyonine. Kisi kinsania kyangamine nu kyayangile zezo nyama. 4 Nu bantu bakumbaminne zezo nzoka, kubuno zakasile zezo nyama bwangato, nu bakumbaminne zezo nyama, nu batendile bunee: “Nazi wasusanania na nyama zeno? Nu nazi unavwama kwitana nazo?” 5 Nu zezo nyama zakasilwe kanua ka kutenda bitondo binene bya lwikotio nu bya kulinga Kalaga; akasilwe bwangato bwa kukita mulimo wage ku myezi makumi manazi nu ibili. 6 Nu alimbwide kanua kage kulinga Kalaga, nu kulinga izina lyage, nu numba zage za kukumbamina nu babo bansania bakwikalaga mwigulu. 7 Akasilwe bwangato bwa kukita bita na basililila nu kubakinda. Akasilwe bwangato ku bikanga binsania, nu ku bantu bansania, nu ku mitendezi insania nu ku baBilongo bansania. 8 Nu bansania bakwikalaga ga kisi bamukumbaminne, babo u meina mabo tamasanzilwe mu mukanda wa Kalamo wa Mwana wa Mukoko wasesilwe kutukila kubumbwa kwa kisi.
9 “Ndi muntu eli na matuzi ma kungwilila, ongwilile. 10 Ndi muntu abika ungo ku bukobe nti enda nu we ku bukobe. Nu ndi muntu eita ungo na mwene, nti atunganana nu we kwitwa na mwene. U bubo buli nkiki nu bukatizio bwa basililila.”
11 Kusila namonine ku engo nyama zabakamine mu kisi, zabezaga na mega mabili masusania mamo ma Kyana kya Mukoko, nu zatendaga anga nzoka za kwangamia. 12 Zakitaga na bwangato bunsania bwa nyama ntangi zavule lwabusio lwage, nu zakakizizie kisi nu bantu ba ga kisi buno bakumbamine nyama ntangi, zezo zonine kyulu kyage kya kukua. 13 Zakitaga miganogano minene, aba nu kugezia keiya kutuka mwigulu gantata ga kisi ku meiso ma bantu. 14 Nu zengelede bantu ba ga kisi na miganogano zizakasilwe kukita lwabusio lwa zezo nyama; nu kutenda ku bantu ba ga kisi buno bakite kisusania kya zezo nyama zabezaga na kyulu kya mwene, nu zalamine. 15 Nu zakasilwe bwangato bwa kwipila muuza mu kikyo kisusania kya nyama, buno kikyo kisusania kya nyama kitende, nu kikite buno babo bansania batakumbamina kisusania kya nyama beitwe. 16 Nu zakitile buno bansania, bakeke nu banene, bagumi nu bazambi, bakandulwa nu bakandwa, babikwe kakengelezio gantata ga maboko mabo ma seidume aba ku malanga mabo; 17 nu buno takuli muntu wampa unavwama kukunza aba kukunzia, ndi nteli na kakengelezio kako, u izina lya nyama, aba iganzo ly'izina lyage.
18 Gago u geli menge. Wozo uli na bumenyinino aganze iganzo lya zezo nyama kubuno meli iganzo lya muntu, nu iganzo lyage lili nkama mutuba, nu makumi mutuba, nu mutuba.