Lwimbo lwa Basombolwa
14
1 Kusila nalolile, nu namonine ku Mwana wa Mukoko wabezaga wemana gantata ga mwiduko wa Sayuni, nu bantu tununu lukama lumozi nu makumi manazi nu manazi babezaga gamozi nage, babo babezaga basanzwa izina lyage nu izina ly'Isi ku malanga mabo. 2 Nu nungule ku iyuki lyatukile mwigulu, anga kubila kwa mazi meingi, nu anga kukulumina kwa mukulumino munene; nu iyuki linungule kulyo lyabezaga anga lya batuti ba nzenze bakututa nzenze zabo. 3 Beimbaga lwimbo luto lwabusio lwa kisumbi kya Bukota, nu lwabusio lwa bibumbwa bilami binazi nu lwabusio lwa bakulu. Nu takuli muntu wampa wavwamine kwiyigisia lulo lwimbo, umpanga babo tununu lukama lumozi makumi manazi nu banazi, babo bakulwidwe ga kisi. 4 Babo bateibikile nsese gamozi na bakikulu, kubuno beli bantu bateizi bakikulu; bakuyanga Mwana wa Mukoko kunsania kwakwenda. Bakunzilwe munkatini mwa bantu anga matubulo matangi ku Kalaga nu ku Mwana wa Mukoko; 5 nu mu kanua kabo takwamonekile kyampa kya buza; kubuno tabeli na kisimboa. Banzelo Basatu
6 Nu namonine ku ungo mwanzelo walengaga munkatini mwigulu; abezaga na Musagu Musoga utanakuzinda, buno agusambale ku bantu ba ga kisi, ku baBilongo bansania, nu ku bikanga binsania, nu ku mitendezi insania, nu ku bantu bansania. 7 Atendaga n'iyuki inene bunee: “Mukue Kalaga boba nu mumukase lutanuno, kubuno nkungu za lusungio lwage zavwa nu mukumbamine wozo wabumbile igulu nu kisi, nu kitatenge nu tunua balongo twa mazi.”
8 Ungo mwanzelo wa babili ayangile nu atendile bunee: “Wagoa, wagoa, Babeli, mwino munene, kubuno wanusizie baBilongo bansania maku ma bongoa bunene bwa butazi bwago.”
9 Nu ungo mwanzelo wa basatu abayangile nu atendile n'iyuki inene bunee: “Ndi muntu akumbamina zezo nyama nu kisusania kyazo, nu kukata kakengelezio kazo ku malanga mage aba gantata ga kuboko kwage, 10 nti akanua nu we maku ma bongoa bukali bwa Kalaga, makubwidwe mu kituma kya bongoa bwage geteli kusambikwa na mazi, nu akusungibwa mu keiya lwabusio lwa banzelo basililila nu lwabusio lwa Mwana wa Mukoko. 11 Nu muuki wa keiya kakubababazia wabakamine ku nkiko na nkiko zitanakuzinda; nu tabeli na kyumuno mu musi aba mu kindi, aba ku babo bakukumbamina zezo nyama nu kisusania kyazo, aba ku unsania wakatile kakengelezio k'izina lyazo.”
12 Gano u gakulolesia nkiki za basililila bakulangaga milembe za Kalaga nu bukatizio ku Yesu.
13 Nu nungule ku iyuki kutuka mwigulu lyatendile bunee: “Sanza bunee: ‘Mbogimbogi ku bakuzi bakukua mu Mukota kutukila kano kaluma!’” “Ee,” u bukutenda Muuza, “bomunwe kusila kwa milimo zabo, kubuno makitilo mabo makubayanga.”
Matubulo ma Kisi
14 Nalolile nu namonine ku kimpa kyenga nu gantata ga kikyo kimpa gabezaga geikala muntu umozi wasusania Mwana wa Muntu, abezaga na nkumbu za Bukota za olo, nu mwene mukali mu kuboko kwage. 15 Nu ungo mwanzelo atukila mu numba za kukumbamina, nu alalukile n'iyuki inene ku wozo wabezaga wikala gantata ga kimpa, bunee: “Kata mwene wobe nu utubule; kubuno nkungu za kutubula zakuka; kubuno matubulo ma kisi mela!”
16 Nu wozo wabezaga wikala gantata ga kimpa akalile na mwene wage mukali ga kisi. Nu kisi kyatubwidwe.
17 Ungo mwanzelo atukile mu numba za kukumbamina zili mwigulu, nu we tondo abezaga na mwene wage mukali.
18 Nu ungo mwanzelo abezaga na bwangato ku keiya, atukile ku kayulo nu alalukile n'iyuki inene ku wozo wabezaga na mwene mukali nu abwide bunee: “Tola mwene wobe mukali nu ukale bibombo bya biguma bya mizabibu wa kisi; kubuno biguma bya kisi byela.” 19 Nu mwanzelo atolile mwene wage nu kukala ga kisi, akalile biguma bya mizabibu za kisi, nu eisile biguma mu kansango kanene ka bongoa bwa Kalaga. 20 Kansango kanyantilwe ku isula lya mwino; nu mikila zatukile mu kansango aaba nu kwika ku mitungu zikwendagia farasi, nu zagelile lugendo lwa kilometres nkama isatu nu makumi mabili.