Banzelo nu Nsungio Mutubakamo Nzinda
15
1 Kumbusa namonine ku kango kalolesio mwigulu, kanene nu ka kwangamia: Banzelo mutubakamo babezaga na nsungio mutubakamo nzinda kubuno kuzo bongoa bwa Kalaga bwazindilila. 2 Nu namonine ku kitatenge kya kiyolo kyasambikizibwe na keiya, nu babo bakindile nyama, nu kisusania kyazo, nu iganzo ly'izina lyage babezaga bemana gantata ga kitatenge kya kiyolo beli na nzenze zibakasilwe na Kalaga. 3 Beimbaga lwimbo lwa Musa, mukiti wa Kalaga, nu lwimbo lwa Mwana wa Mukoko nu kutenda bunee:
“Mukota Kalaga Mwiya Mayombo!
Makitilo mobe meli manene nu makwangamia,
Mukota wa baBilongo,
Nu nazi utakutanuzia izina lyobe?
Kubuno uwenyene uli wasililila.
Nu baBilongo bansania bavwe
Nu bakumbamine lwabusio lwobe
Kubuno makitilo meisanana masilile kulolesibwa bwasibwasi.”
5 Kusila kwa bubo, nalolile, nu namonine ku numba za kukumbamina za bulongeki zigwidwe mwigulu. 6 Babo banzelo mutubakamo babezaga na nsungio mutubakamo batukile mu numba za kukumbamina bavwalikibwa nsulu nsoga zenga, zikukelima nu zili na mikaba za olo ku bukuba bwabo. 7 Umozi wa ku bibyo bibumbwa bilami binazi akasile babo banzelo mutubakamo bituma mutubakamo bya olo biyala na bongoa bukali bwa Kalaga ukulamaga ku nkiko na nkiko zitanakuzinda. 8 Numba za kukumbamina ziyede na muuki ku kabamba ka lutanuno lwa Kalaga nu ku magala mage; nu takuli muntu wampa wavwamine kwingila mu numba za kukumbamina aba mu nsungio mutubakamo za babo banzelo mutubakamo aaba nu gazikazindilila.