Bituma Mutubakamo bya Bongoa bwa Kalaga
16
1 Nu nungule ku iyuki inene limozi lyatukile mu numba za kukumbamina, nu lyatendile ku babo banzelo mutubakamo bunee: “Endazi nu mukubule bituma mutubakamo bya bongoa bukali bwa Kalaga ga kisi.” 2 Mutangi endile, nu akubwide kituma kyage ga kisi. Nu byulu bibibu nu bya kubabazia byabasile ku bantu babezaga na kakengelezio ka nyama nu bakumbaminaga kisusania kyage.
3 Wa babili akubwide kituma kyage mu kitatenge nu kitatenge kyabede mikila anga mikila za kitumba; nu bibumbwa binsania byabezaga na kalamo mu kitatenge byakule.
4 Wa basatu akubwide kituma kyage mu nuuzi nu mu tunua balongo twa mazi, nu mabede mikila. 5 Nu nungule ku mwanzelo wa mazi akutenda bunee: “Uwe uli wisanana, uwe uliko nu wabezagako; uli wasililila kubuno bubo u buwasungizie! 6 Kubuno bakubwide mikila za basililila nu za balengania nu wabakasile mikila za kunua: nu batananina bubo.” 7 Nu nungule ku iyuki lya ungo mwanzelo kutuka ku kayulo lyatendaga bunee: “Uwe, Mukota Kalaga Mwiya Mayombo, nsungio zobe zili za bulili nu zisanana.”
8 Nu wa banazi akubwide kituma kyage gantata ga kisongo kya busi. Nu kyakasilwe magala kugisia bantu na keiya. 9 Bantu bagide na muzuzo mukali, nu balingile izina lya Kalaga uli na bwangato ku zezo nsungio, tondo tabeiyanizie buno bamukase lutanuno.
10 Wa batano akubwide kituma kyage gantata ga kisumbi kya bukota bwa nyama. Nu bukota bwage bwakukidwe na kapilo; bantu batakunine ndami zabo ku kabamba ka lubaba, 11 balingile Kalaga wa mwigulu ku kabamba ka mbabazio zabo nu ka byulu byabo, tondo tabeiyanizie ku misako zabo.
12 Nu wa mutuba akubwide kituma kyage gantata ga luuzi lunene Furati. Nu mazi malo makamine buno kusangwe kwalongekwa nzila ku bakota batuka ku lulenge lukutukaga kisongo kya busi. 13 Nu namonine mu kanua ka nzoka, nu mu kanua ka nyama, nu mu kanua ka mulengania wa buza mwatuka myuza isatu za basumbu; zasusania byula. 14 Kubuno zili myuza za basumbu zikukitaga migeleko nu zikwendaga ku bakota ba kisi kinsania, buno babakundamanie gamozi ku bita bya busi bunene bwa Kalaga Mwiya Mayombo.
15 Lolazi, nkuvwa anga mwibi. Mbogimbogi ku wozo ukukesia ntende, nu ku wozo ukulanga nsulu zage buno ntende mundulu nu buno bantu banavwa kukanga nsoni zage!
16 Babakundamanizie ga kiziki kimozi kikumanwa mu kiEbrania buno, Harmagedoni.
17 Wa mutubakamo akubwide kituma kyage mu mpelela nu iyuki limozi ikali lyatukile mu numba za kukumbamina, ga kisumbi kya Bukota, lyatendile bunee: “Bwasila kuba!” 18 Nu kwabede mikenzi, nu muuki, nu mikulumino mikali, nu kaningini kamozi kanene ka kisi nu takubezaga lingo kango kaningini anga kako kutukila bantu beikala ga kisi. 19 Nu mwino munene wabeganizibwe byindi bisatu, miino za baBilongo zagwede nu Kalaga akengede Babeli munene buno amukase kituma kya maku ma bongoa bwage bukali. 20 Bisanga binsania byatinine, nu miduko tazamonekileko lingo. 21 Nu mbula nnene za lubula, nu lubula lulo lwabezaga na buzitu anga kilo kya talanta, kilo makumi manazi, zakolokile kuko, gantata ga bantu kutuka mwigulu, nu bantu balingile Kalaga ku kabamba ka lusungio lulo lwa lubula kubuno lusungio lulo lwabezaga lunene nunse.