Kitazi Kinene
17
1 Kumbusa umozi wa ku babo banzelo mutubakamo babezaga na bituma mutubakamo, avule nu atendile bunee: “Vwa, nakulolesie lusungio lwa kitazi kinene kikile gantata ga mazi meingi. 2 U wozo wakitile butazi na bakota ba kisi, nu maku ma butazi bwage u meitile bantu ba ga kisi.” 3 Anekile mu Muuza mu kalula. Nu namonine ku mukikulu umozi, eikala gantata ga nyama zakisimana na meina ma bilingano, zabezaga na matoe mutubakamo nu mega ikumi. 4 Wozo mukikulu avwalikizibwe nsulu z'idangi lya misamba za mpene nu zakisimana, nu alebizibwe na olo, nu na makozi ma bukunza bukali, nu na lulu. Akatile kituma kimozi kya olo mu kuboko kwage, kiyazibwa na bitondo byingi bibi nu nsese ningi za butazi bwage. 5 Ku malanga mage kwabezaga kwasanzwa izina limozi bunee: “KEINDA, BABELI MUNENE, NINA WA BITAZI NU WA BITONDO BIBI BYA GA KISI.” 6 Namonine ku wozo mukikulu abezaga alebwa na mikila mingi za basililila nu mikila za balongeki ba Yesu. Nu ganamumonineko, nangamine nunse.
7 Mwanzelo ambwide bunee: “Kubuni ukwangama? Nakubule keinda ka wozo mukikulu nu ka zezo nyama zikumweka, zili na matoe mutubakamo nu mega ikumi. 8 Nu zezo nyama ziwamonine kuzo zabezagako nu taziliko lingo; zatunganana kubakama kutuka mu muzinga nu kwenda ku buzimizi bwage. Nu babo beikili ga kisi, babo batasanzilwe meina mabo mu mukanda wa kalamo kutukila kubumbwa kwa kisi, bangame kumona ku zezo nyama kubuno zabezagako nu zo taziliko lingo, nu buno zamonekeko lingo.
9 Bubuno buli menge meli na bumenyinino. Nu mamano matoe mutubakamo meli miduko mutubakamo zikwikalila wozo mukikulu. 10 Nuzo lingo, zili bakota mutubakamo: batano bagwede, nu umozi eikiliko, nu ungo ntevwa, nu nkungu zavwe, atunganana kwikala bindi bikeke. 11 Nu zezo nyama zabezagako, nu taziliko lingo, zozenyene zili mukota wa kinana, nu zili emozi za ku babo bakota mutubakamo, nu zo zikwenda ku buzimizi.
12 Nu mamo mega ikumi mawamonine kumo, meli bakota ikumi batekaswa tanga bukota, tondo bakaswe bwangato anga bakota nkungu emozi na zezo nyama. 13 Beli na lwango lumozi, nu bakukasana zezo nyama magala mabo nu bwangato bwabo. 14 Balwane bita na Mwana wa Mukoko, nu Mwana wa Mukoko abakinde, kubuno eli Mukota wa bakota nu Mwangati wa bangati, nu bantu beli gamozi nage, u babo bamaninwe nu basombwedwe, nu bakatizia bazikinde.”
15 Nu ambwide lingo bunee: “Mamo mazi mawamonine kumo, meikile ga mukikulu kitazi, meli bantu, nu misanganano za bantu, nu baBilongo, nu ba mitendezi. 16 Nu mamo mega ikumi mawamonine kumo nu nyama basombe wozo mukikulu kitazi, bamutikye nsulu nu bamubike mundulu; balie misuna zage nu bamuzikye na keiya. 17 Kubuno Kalaga abikile mu mitima zabo kukita bwakutunda, nu kukala lwango, nu kukasana zezo nyama bukota bwabo, aaba nu malagi ma Kalaga mazindilile. 18 Nu wozo mukikulu u wamonine kweli u mwino munene ukwangata bakota ba kisi.”