Kugoa kwa Babeli
18
1 Kusila kwa bubo, namonine ku ungo mwanzelo akugela kutuka mwigulu, abezaga na bwangato bunene nu kisi kyasanine na lutanuno lwage. 2 Alalukile n'iyuki ikali, atendile bunee: “wagoa, wagoa, Babeli munene! Eseli kiziki kya basumbu, itinino lya myuza insania za nsese, nu itinino lya tuzoni tunsania twa nsese nu twasombwa. 3 Kubuno baBilongo bansania banune maku ma lusungio lukali lwa butazi bwage nu bakota ba kisi bakitile butazi nage nu bakunzia ba kisi bagumine ku magala ma bugumi bwage bwingi.” 4 Nu nungule ku lingo iyuki kutuka mwigulu lyatendile bunee: “Bantu bane tukazi kwage, buno munavwa kukita bwagi gamozi nage, aba munavwa kukata nsungio gamozi nage. 5 Kubuno bwagi bwage bwingi bwakundamenne nu kubasa mwigulu, nu Kalaga eikengelezizie ku misako zage za bwagi. 6 Mumulige anga bwaligile, nu mumusubizie mambizi mabili kuyangana na makitilo mage. Mu kituma kikyo kyasambikizizie, mumusambikizie mambizi mabili. 7 Anga bweikakile nu kukita bitondo bya kwibogiabogia na kisi, bubo u bumumubabazie nu abe na tubebe, kubuno akwitenda mu mutima wage bunee: ‘Nikale anga Mukota mukikulu, aba nsili musigala, nu nsyabe na kabebe nunse!’ 8 Kubuno nsungio zage zabase mu busi bumozi, lukuo, tubebe nu nzala nkali, nu we azike nunse na keiya. Kubuno Mukota Kalaga wamusungizie eli na magala.
9 Nu bakota bansania ba kisi bakitile butazi nage mu kwibogiabogia nage na bya kisi balile nu kwidilila nunse ku kabamba kage gabamone ku muuki wa kugia kwage. 10 Ku boba bwa mbabazio zage, bemane bulazi, nu balile bunee:
‘Kabebe, kabebe, ku Babeli, mwino munene, mwino mubibu; kubuno mu nkungu emozi lusungio lwobe lwavwa.’
11 Nu bakunzia ba ga kisi bakulila nu beli mu nsanza ku kabamba kago, kubuno takuli muntu wampa ukugula lingo bintu byabo bya bukunzia, 12 bikulo bya olo, nu bya feza, nu bya makozi ma bukunza bubibu, nu lulu, nu bya nsulu nsoga zenga, nu bya nsulu z'idangi lya misamba za mpene, nu bya nsulu zabota, nu bya nsulu zakisimana, nu bya nkita insania za miti za bulago, nu bya kituma kinsania kya mulamba wa nzogu, nu bya kituma kinsania kyabazilwe mu muti wa bukunza bubibu; kyakitwa na nsubi, nu na kyuma, nu na makozi masoga; 13 nu bya mudalasini, nu bya kalafuno, nu bya kasuku, nu bya msyalago, nu bya aliga, nu bya maku, nu bya makiti, nu bya nsiano zabota, nu bya ngano, nu bya ngombe, nu bya mikoko, nu bya farasi, nu tuyanga, nu mibili nu tulamo twa bantu. 14 Balaluke bunee: ‘Biguma byatundaga mutima wobe, byendile bulazi nobe; nu bintu binsania bisoga bya bugumi nu bya kutananizia byakuziminne, nu ntukabimona lingo.’ 15 Nu bakunzia ba bibyo bintu, babo bagumine mweli, bemane kima bulazi ku boba bwa mbabazio zage; balile nu babe mu nsanza. 16 Nu batende bunee: ‘Kabebe! Kabebe! Kabebe! Ku mwino munene, wabezaga wavwalikibwa nsulu nsoga zenga, z'idangi lya misamba za mpene, nu lyakisimana, nu zatondwa na olo, na makozi ma bukunza bubibu nu na lulu. 17 Mu nkungu emozi, bibyo bikulo byingi byazika!’
Nu balugi bansania bakusokagia ku kikyo kiziki, bagenya nu bansania beli na mutali wabo ku mulimo wa mu kitatenge, bemenne bulazi. 18 Nu balaluke nunse gabamone ku muuki wa kugia kwago, batendile bunee: ‘Mwino mukizi wabezaga wasusanania na wono mwino munene!’ 19 Balekele mukungu gantata ga matoe mabo, balile nu babe na nsanza, balaluke nu batende bunee: ‘Kabebe! Kabebe! Ku mwino munene! Ku bikulo byago, bansania babezaga na maato manene mu kitatenge bagumine, nu ku nkungu emozi wazika!’
20 Igulu, libogeboge ku kuzika kwago! Nu inyuwe basililila, basingwa nu balengania, bogazibogazi nu inyuwe! Kubuno mu kusungia wozo mwino, Kalaga amusubile musubo weinyu.”
21 Nu mwanzelo umozi wa magala atolile ikozi limozi lyasusania ikozi inene lya kugoga nu alilekede mu kitatenge, nu atendile bunee: “Bubo u bwiswe Babeli ku magala, mwino munene, nu tagukamonekako lingo. 22 Nu kwobe takukungubwa lingo ku moki ma batuti ba nzenze, ma batuti ba binumbi, ma beimbi ba nimbo, ma batuti ba tupyelele nu ma batuti ba monze. Kwobe, takukungubwa lingo ku muzumio w'ikozi lya kugoga. 23 Kyengi kya kasuku takikasana lingo mwobe nu iyuki lya musongi nu lya mwakali tamakongubwako lingo kwobe, kubuno bakunzia bobe babezaga bantu banene ba kisi, baBilongo bansania bengeledwe na buganga bwobe. 24 Nu bamonine mikila za balengania nu za basililila nu za babo bansania beitilwe ga kisi muguli.