19
1 Kumbusa kwa bubo, nungule ku iyuki mwigulu anga iyuki inene lya musanganano munene, nu lyatendile bunee: “Aleluya! a Lonio, nu lutanuno nu magala bili ku Kalaga weitu. 2 Kubuno nsungio zage zili za bulili nu zisanana; kubuno asungizie wozo mukikulu kitazi kinene nunse wabigizie kisi na butazi bwage, nu We asubile mikila za bakiti bage mu kuboko kwage.” 3 Nu batendile limbizi lya mabili bunee: “Aleluya! Nu muuki wage witumukaga nu kubakama mwigulu ku nkiko na nkiko zitanakuzinda.” 4 Nu babo bakungu makumi mabili nu banazi nu bibumbwa bilami binazi bagwede gansi nu bakomine mazu mabo nu bakumbaminne Kalaga wikalaga ga kisumbi kya Bukota, batendaga bunee: Amena! Aleluya! Kisagulo ky'Isonga lya Mwana wa Mukoko
5 Nu iyuki limozi lyatukile ga kisumbi kya bukota lyatendile bunee: “Muganune Kalaga weitu, inyuwe bakiti bage bansania, inyuwe bakumukua boba, bakeke nu banene.” 6 Nu nungule ku iyuki anga musanganano munene, anga iyuki lya mubilo wa mazi meingi, nu anga iyuki lya mubilo wa mikulumino mikali, lyatendile bunee: “Aleluya, kubuno Mukota Kalaga weitu, Mwiya Mayombo, angata.” 7 Tubogeboge, tube na mbogimbogi nunse nu tumukase lutanuno! Kubuno isonga lya Mwana wa Mukoko liseligo; nu mwakali wage es'eikulumizia. 8 Nu we akasilwe bwangato bwa kwivwalikya nsulu nsoga zenga, zikukelima, zaswaga, kubuno zezo nsulu nsoga zenga, zili misako misoga zisanana za basililila.”
9 Mwanzelo ambwide bunee: sanza bunee: ‘Mbogimbogi ku babo bamaninwe ku kisagulo ky'isonga lya Mwana wa Mukoko!’ Kusila antendile bunee: “Malagi mamano meli malagi ma bulili bwa Kalaga.” 10 Nagwede ku magulu mage buno nimukumbamine, tondo ambwide bunee: “Widange, ntukite bubo! Nili munyobe na mulimo nu wa mibuto zobe beli ba bulongeki bwa Yesu. Kumbamina Kalaga! Kubuno bulongeki bwa Yesu buli mutima wa bulengania.”
Mulwani wa Bita Aliga Gantata ga Farasi Zenga
11 Kumbusa namonine igulu lyakandulwa, nu lola, kwabasile farasi zenga. Nu wozo wabezaga wabakama gantata gazo amanagwa buno, Mukatizia nu Bulili, nu akusungia nu kulwana bita mu kwisanana. 12 Meiso mage mabezaga anga ngulumina za keiya; nu gantata g'itoe lyage gabezaga nkumbu ningi za bukota; abezaga n'izina lyasanzwa, liteizi muntu wampa umpanga We wenyene: 13 Nu avwalikizibwe nsulu zanunibwa na mikila, izina lyage lili Idagi lya Kalaga. 14 Mayombo ma mwigulu mabezaga gantata ga farasi zenga, mamuyangile, mavwalile nsulu nsoga zenga, nu zaswaga. 15 Nu mu kanua kage mwatukile mwene mukali buno eite baBilongo nago; nu We akabangata na kasusu ka kyuma; nu akakambutula kansango ka biguma bya maku makali ma lusungio lwa bongoa bwa Kalaga Mwiya Mayombo. 16 Abezaga n'izina lyasanzwa ku nsulu nu gantata ga kilumbu kyage bunee: “MUKOTA WA BAKOTA NU MWANGATI WA BANGATI.”
17 Nu namonine ku mwanzelo umozi wemana munkatini mwa kisongo kya busi. Alalukile n'iyuki ikali nu amanine tuzoni tunsania twalengaga mwigulu bunee: “Vwazi nu mukundamane ku kisagulo kinene kya Kalaga, 18 buno tulie misuna za bakota, nu misuna za bakota ba bakoloboyo, nu misuna za bantu babibu, nu misuna za farasi nu za babo babezaga gantata gazo, nu misuna za bantu bansania, bakandulwa nu za bakobe, bakeke nu banene.”
19 Nu namonine ku nyama, nu bakota ba kisi, nu ku mayombo mabo, bakundamenne buno balwane bita na wozo wabezaga wikala gantata ga farasi nu na mayombo mage. 20 Nu zezo nyama zakatilwe gamozi na wozo mulengania wa buza, wozo wakitile migeleko za kwangamia lwabusio lwage, nu ku zezo migeleko engelede bantu babo babikilwe tukengelezio twa nyama nu bakumbaminne kisusania kyazo. Babo bansania babili beisilwe bakwiza mu kiziba kya keiya kikuguluminaga na kibiliti. 21 Nu bango beitilwe na mwene, watukile mu kanua ka wozo wabezaga wikala gantata ga farasi; nu tuzoni tunsania twikutile na misuna zabo.