Miaka Kanunu Kamozi
20
1 Kusila, namonine ku mwanzelo akugela kutuka mwigulu, abezaga na mutandulwa wa muzinga utanakuzinda nu abezaga na muyololo munene mu kuboko kwage. 2 Akatile nzoka za wakalazi, u Diabolo nu Satana, nu azikandile myaka kanunu. 3 Azisile mu muzinga utanakuzinda, nu agukandile nu abikile kamenyikilo gantata gago, buno nzoka zinavwa kwengelela baBilongo lingo, aaba nu zezo myaka kanunu zazindilila; nu kusila kwa bubo bwatunganana zakandulwe nkungu nkeke. 4 Nu namonine ku bisumbi bya bukota, nu babo beikede gabyo, bakasilwe bwangato bwa kusungia. Nu namonine ku mitima za babo basesilwe matoe ku kabamba ka kulongekela Yesu, nu ku kabamba k'idagi lya Kalaga, nu ku kabamba ka babano batakumbaminne zezo nyama, aaba kisusania kyazo, nu batakatile kakengelezio ku malanga mabo aaba ku maboko mabo. Babede lingo na kalamo nu bangatile gamozi na Kristo ku myaka kanunu. 5 Bango bakuzi tabalamine lingo aaba nu kwika ku kuzindilila kwa zezo myaka kanunu. U iyukilo itangi. 6 Mbogimbogi, ku wozo wasililila, ukayuka mu iyukilo itangi! Lukuo lwa ibili talukabangata lingo; tondo babe basankoga ba Kalaga nu ba Kristo, nu bangate gamozi nage ku zezo myaka kanunu.
Kukindwa kwa Satana
7 Gakasila zezo myaka kanunu, Satana akakandulwa mu kikando kyage, 8 nu akatuka buno engelele baBilongo beli ku ndenge inazi za kisi, Gogi nu Magogi, buno abakundamanie ku bita; nu maganzo mabo meli anga misege za mu kitatenge.
9 Babakamine gantata ga bungulu bwa kisi nu batimbile kiziki kya basililila nu mwino watundwa. Tondo keiya kagelile kutuka mwigulu nu kubazikya. 10 Nu Diabolo wabengelelaga eisilwe mu kikyo kiziba kya keiya nu kya kibiliti, u mwisilwe zezo nyama nu wozo mulengania wa buza. Bakababazibagwa musi nu kindi, ku nkiko na nkiko zitanakuzinda.
Lusungio Luzinda
11 Kusila, namonine ku kisumbi kinene kya Bukota kyenga nu ku wozo wabezaga wikala gantata gakyo. Kisi nu igulu byatinine lwabusio lwa malanga mage. Nu takwabede lingo kiziki ku beli. 12 Nu namonine ku bakuzi, bakulu nu bana, bemana lwabusio lwa kisumbi kya Bukota. Mikanda zakandwidwe; nu ungo mukanda lingo wakandwidwe, u mukanda wa kalamo. Nu bakuzi basungizibwe kuyangana na makitilo mabo ku bitondo byabezaga byasanzwa mu zezo mikanda. 13 Kitatenge kyatumpwide bakuzi babezaga mukyo, lukuo nu kiziki kya bakuzi Hadese byabasizie bakuzi babezaga mubyo. Nu na muntu na muntu na wasungizibwe kuyangana na makitilo mage. 14 Kusila, lukuo nu kiziki kya bakuzi Hadese bisilwe mu kiziba kya keiya. Kiziba kikino, u lukuo lw'ibili. 15 Nu na muntu unsania utamonekileko buno asanzwa mu mukanda wa kalamo eisilwe mu kikyo kiziba kya keiya.