Igulu Ito nu Kisi Kito
21
1 Kusila, namonine ku igulu ito nu ku kisi kito; kubuno igulu itangi nu kisi kitangi byatingile, nu kitatenge takyabede lingo. 2 Nu namonine ku Mwino Muswagibwa, Yerusalema muto wagelaga kutuka mwigulu ku Kalaga, wabikilwe kayikayika anga mwakali walebibwa busoga ku kabamba k'iba wage. 3 nungule ku iyuki ikali lyatukile ku kisumbi kya bukota lyatendile bunee: “Lolazi, kiziki kikwikalaga Kalaga kiseli gamozi na bantu! Eikale gamozi nabo, nu bo babe bantu bage, nu Kalaga wenyene abe gamozi nabo, nu abe Kalaga wabo. 4 Akanyonyona bisozi binsania ku meiso mabo, nu lukuo talukaba lingo, takukaba kabebe lingo, aba idilo, aba mbabazio, kubuno bitondo bitangi byatingile.” 5 Nu wozo wabezaga wikala ga kisumbi kya bukota atendile bunee: “Lolazi, nagalukya lingo bintu binsania kuba bito.” Nu atendile bunee: “Sanza, kubuno malagi mamano meli ma bulili nu ma kukatizibwa.” 6 Nu We atendile bunee: “Bwasila kukitwa! Nili Alfa nu Omega, Mutangi nu Muzinda. Ku wozo uli na mpusia nkamukasa mazi ma kanuabalongo ka kalamo buliabulia. 7 Wozo ukakinda akapiena bibino binsania, nkaba Kalaga wage, nu we akaba mwana wane. 8 Tondo ku babo beli na boba, nu ku batakatizia, kubeli na misako mibi, nu ku beiti, nu ku bitazi, nu ku baganga, nu ku bakumbamizi ba nkisi, nu ku bantu bansania bakwekaga buza, kibombo kyabo kikeiswa mu kiziba kya keiya kikugulumina na kibiliti. Luluno u lukuo lw'ibili.” Yerusalema Muto
9 Kusila, umozi wa ku babo banzelo mutubakamo babezaga na bituma mutubakamo biyala na tubebe tuzinda mutubakamo, avule nu atendile bunee: “Vwa, nakulolesie wozo mwakali, mukazi wa Mwana wa Mukoko.” 10 Anekile mu muuza gantata ga mwiduko munene wasakama. Nu andolesizie ku Mwino Wasililila, Yerusalema wagelaga kutuka mwigulu ku Kalaga. 11 Wabezaga na lutanuno lwa Kalaga. Kyengi kyage kyabezaga kyasusanania na kyengi kya ikozi lya bukunza bubibu nunse, anga ikozi lya yaspi, lyenga anga kiyolo. 12 Wabezaga na kitutu kinene nu kyasakama. Wabezaga na nibi ikumi nu ibili nu ku miingilo za zezo nibi, kwabezaga banzelo ikumi nu babili, nu meina masanzilwe, meli ma bikanga ikumi nu bibili bya bana baIsraeli. 13 Kwabezaga nibi isatu ku lulenge na lulenge: ku lulenge lukutukaga kisongo kya busi nibi isatu, ku lulenge lwa kwikazi kwa kisi nibi isatu, ku kunsi kwa kisi nibi isatu, nu ku lulenge lwa kwidume lwa kisi nibi isatu. 14 Mukolo wa mwino kyabezaga na bibanza ikumi nu bibili nu ga bibyo bibanza gabezaga meina ikumi nu mabili ma basingwa ikumi nu babili ba Mwana wa Mukoko.
15 Wozo u natendaga nage abezaga na musumbo wa olo wa kulindika, buno alindike mwino, nu nibi zago, nu mukolo wago. 16 Mwino wabezaga na ndenge inazi zigezye, nu bulazi bwago bwabezaga bwagelama na bungulu bwago. Alindikile mwino na wozo musumbo wa olo, nu amonine buno wabezaga bilometre tununu tubili nu nkama ibili za bulazi, nu bungulu nu kusakama byabezaga bigezye. 17 Alindikile mukolo wago, nu amonine mabusu lukama nu makumi manazi nu manazi anga geigezye kima kya muntu, u kima kya mwanzelo. 18 Mukolo wabezaga wobakwa na yaspi, nu mwino wabezaga wa olo zaswaga, anga kisusania nunse kya kiyolo. 19 Bibanza bya mukolo wa mwino byakulumizibwe na makozi ma bukunza bukali bwa nkita na nkita: kibanza kitangi kyabezaga kya yaspi; kya bibili kyabezaga kya yakuti-samawi; kya bisatu kyabezaga kya kalkedoni; kya binazi kyabezaga kya zumaridi; 20 kya bitano kyabezaga kya sardoniki; kya mutuba kyabezaga kya akiki; kya mutubakamo kyabezaga kya zabarajadi; kya kinana kyabezaga kya belulo; kya mubula kyabezaga kya topazo; ky'ikumi kyabezaga kya krisoparazo; ky'ikumi n'umozi kyabezaga kya haikinto; ky'ikumi nu bibili kyabezaga kya amazito. 21 Zezo nibi ikumi nu ibili zabezaga za lulu ikumi nu ibili; na lwibi na lwibi na lwabezaga lwa lulu lumozi. Nzila za mwino zabezaga za olo zaswaga anga kiyolo kikukelima busoga nunse.
22 Nsyamonine ku numba zampa za kukumbamina mu wozo mwino; kubuno Mukota Kalaga wa Magala Mansania gamozi na Mwana wa Mukoko beli numba zago za kukumbamina. 23 Nu mwino wozo tagukwiyanina musi aba nu mwezi kugusanizia; kubuno lutanuno lwa Kalaga lukugusanizia, nu Mwana wa Mukoko eli kyengi kago. 24 BaBilongo bakatabanga mu kyengi kyago, nu bakota ba kisi bakalusia lutanuno lwabo mugo. 25 Nibi zago tazikeigalagwa mu musi, kubuno mugo tamukaba kwida kwa busi.