Luuzi lwa Mazi ma Kalamo
22
1 Nu andolesizie luuzi lwa mazi ma kalamo, makukelima anga ikozi ly'isangabwe lyenga lwatukaga ku kisumbi kya Bukota kya Kalaga nu kya Mwana wa Mukoko. 2 Munkatini mwa nzila nnene za mwino ku mutili na mutili wa luuzi, kwabezaga muti wa kalamo, ukukolamaga biguma mambizi ikumi nu mabili, nu ukukolamaga biguma byago ku mwezi na mwezi nu nsamba zago zabezaga muti wa konia baBilongo. 3 Takukaba kiswililo lingo. Kisumbi kya Bukota kya Kalaga nu kya Mwana wa Mukoko kikaba mu wozo mwino; bakiti bage bakamukitila, 4 nu bakamumonako ku kilungi kyage nu izina lyage likaba ga malanga mabo. 5 Takukaba kindi lingo; nu tabakeiyanina kyengi kya kasuku, aba kyengi kya kisongo kya busi, kubuno Mukota Kalaga akabasanizia. Nu bakangata ku nkiko na nkiko zitanakuzinda. Kuvwa kwa Yesu
6 Nu ambwide bunee: “Malagi mamano meligo nu meli ma bulili, nu Mukota Kalaga wa myuza za balengania, asingile mwanzelo wage buno alolesie bakiti bage bitondo byatunganana kusasia kubasa.
7 Nu lola, navwe kitangalabesi. Mbogimbogi ku wozo ukulanga malagi ma bulengania bwa mukanda wono!”
8 Nu nne Yoana, nnenyene nungule nu namonine ku bitondo bibino. Nu ganungule nu ganamonine kubyo, nagwede ku magulu ma wozo mwanzelo andolesagia byo, buno nimukumbamine. 9 Tondo ambwide bunee: “Idange na kukita bubo! Nili munyobe na mulimo, nu na mibuto zobe balengania, nu wa babo bakulanga malagi ma mukanda wono. Kumbamina Kalaga.” 10 Nu ambwide bunee: “Ntukande kamenyikilo ka malagi ma bulengania bwa mukanda wono kubuno nkungu zise bwigi. 11 Nu wozo uteisanana itile kuteisanana, nu wozo uli na nsese itile kuba na nsese; nu wozo wisanana itile kukita bwisanana, nu wozo wasililila itile kusililila.
12 Lola, navwe kitangalabesi, nu lukalilo lwane luli gamozi na Nne, kuliga ku muntu na muntu anga buli makitilo mage. 13 Nili Alfa nu Omega, Mutangi nu Muzinda, Wa Kulinga nu Wa Kuzinda. 14 Mbogimbogi ku babo bakusuga nsulu zabo ndazi buno babe ba bwangato ku muti wa kalamo, nu buno beingile ku nibi za wozo mwino. 15 Kumbuga kwago kuli mboa, baganga, bitazi, beiti, bakumbamizi ba nkisi, nu muntu unsania ukutunda buza nu ukusambala buza!
16 Nne Yesu, nasingile mwanzelo wane buno amulongekele bitondo bibino mu makanisa. Nili Isina nu Kibuti kya Davidi, nili Lukenikeni lukukelimaga lwa Nindunindu.”
17 Nu Muuza nu Mwakali bakutenda bunee: “Vwa.” Nu wozo ukungwa atende bunee: “Vwa.” Nu unsania uli na mpusia avwe; nu wozo watunda anue mazi ma kalamo buliabulia.
Kuzindilizia
18 Nkukengelezia muntu na muntu ukungwa ku malagi ma bulengania bwa mukanda wono bunee: “Ndi muntu atalikila mango malagi ku mamano, nti Kalaga akamutalikila nsungio zasanzilwe mu mukanda wono; 19 nu ndi muntu atikya kitondo kimozi ku malagi ma mukanda wa bulengania bubuno, nti Kalaga akatikya bwangato bwage ku muti wa kalamo nu ku mwino wasililila, byalolesibwa mu mukanda wono.”
20 Wozo ukulongeka bitondo bibino akutenda bunee: “Ee, navwe kitangalabesi.” Amena, vwa, Mukota Yesu.
21 Mponga za Mukota Yesu zibe gamozi n'inyuwe bansania!