Bukindi Bweitu ku Kisi
5
1 Na muntu unsania wakatizia buno Yesu eli Kristo nti abutwa na Kalaga, nu na muntu unsania watunda wozo wamubutile nti atunde nu we wozo wabutilwe nage. 2 Twizi buno twatunda bana ba Kalaga nkungu zitukutunda Kalaga, nu zitukuyanga nunse makakizio mage. 3 Kubuno lutundo lwa Kalaga luli kulanga makakizio mage. Nu makakizio mage tameli mabibu, 4 kubuno na kinsania kyabutilwe na Kalaga nti kikukinda kisi; nu bukindi bukukinda kisi u bubo bukatizio bweitu. 5 Nazi wozo ukukinda kisi, ndi ta wozo ukukatizia buno Yesu eli Mwana wa Kalaga? Bulongeki Bwakitilwe ku Kabamba ka Yesu Kristo
6 Yesu Kristo u wozo wavule ku mazi nu ku mikila, ta na mazi tugu, tondo na mazi nu na mikila. 7 Nu Muuza u gukulongeka, kubuno Muuza eli bulili. 8 Kubuno beli basatu bakulongeka: Muuza, nu Mazi, nu Mikila; nu babo basatu bakukulumana ku bulongeki bumozi. 9 Ndi tukukatizia bulongeki bwa bantu, bulongeki bwa Kalaga buli bunene nunse; kubuno buli bulongeki bwa Kalaga, u bubo bwalongekede Mwana wage. 10 Wozo wakatizia Mwana wa Kalaga eli na bulongeki bubuno mweli wenyene; wozo utakatizia Kalaga nti amubika muza, kubuno ntakukatizia bulongeki bwalongekile ku Mwana wage. 11 Nu lola bulongeki bubuno, u buno Kalaga atukasile kalamo katanakuzinda, nu kalamo kakano keli mu Mwana wage. 12 Wozo uli na Mwana nti eli na kalamo; wozo uteli na Mwana wa Kalaga nti nteli na kalamo.
Kalamo Katanakuzinda
13 Namusanzide bitondo bibino, buno mumenye buno muli na kalamo katanakuzinda, beinyuwe bakukatizia mu izina lya Mwana wa Kalaga. 14 Tuli na bupuka kweli buno ndi twasega kintu anga buli lutundo lwage nti atungwe. 15 Nu ndi twizi buno akutungwa ku binsania bitukumusega, nti twizi buno tuli na kintu kinsania kitwamusegile.
16 Ndi muntu umozi amona buno mubuto wage akita bwagi butakusondelezia ku lukuo, nti asege nu Kalaga nti akase wozo mubuto wage kalamo. Nkutendela babo bakukita bwagi butakusondelezia ku lukuo. Kuli bwagi bukusondelezia ku lukuo, nsikutenda buno asege ku kabamba ka bubo bwagi. 17 Na kinsania kiteisanana kili bwagi nu kuli bwagi butakusondelezia ku lukuo.
18 Twizi buno na muntu unsania wabutilwe na Kalaga ntakwitila kukita bwagi lingo; tondo wozo wabutilwe na Kalaga nti akwidanga wenyene nu wozo mubi ntaneitubya kweli.
19 Twizi buno tuli ba Kalaga, nu kisi kinsania kili kunsi kwa bwangato bwa wozo mubi.
20 Twizi lingo buno Mwana wa Kalaga avule, nu atukasile menge buno tumenye wozo uli wa bulili; nu tuli mu wozo uli wa bulili, aba nu mu Mwana wage Yesu Kristo. We eli Kalaga wa bulili, nu kalamo katanakuzinda.
21 Bana batundwa, idangazi na nkisi.