Muuza wa Kalaga nu Muuza wa Musombi
4
1 Batundwa bane, tamukatizie muuza na muuza, tondo menyininazi myuza buno ndi zili za Kalaga, kubuno balenganie beingi ba buza bavule mu kisi. 2 Ku bubuno mwizi Muuza wa Kalaga: na muuza na muuza gukwitabizia bwasibwasi buno Yesu Kristo avule mu mubili nti guli wa Kalaga. 3 Nu na muuza na muuza na utakwitabizia bwasibwasi buno Yesu Kristo eli Kalaga nti taguli wa Kalaga; nu wozo nti u muuza wa Musombi wa Kristo u munguleko buno wavwe, nu kano kaluma useli mu kisi. 4 Inyuwe bana bakeke, muli ba Kalaga, nu mwabakindile, kubuno wozo uli mumuli eli munene kutinga wozo uli mu kisi. 5 Bo beli ba kisi, kubuno bakutenda mu lukita lwa kisi, nu kisi kikubongwaga. 6 Iswe tuli ba Kalaga; wozo wizi Kalaga nti akutungwilila; wozo uteli wa Kalaga nti ntakutungwa: ku bubo twizi Muuza wa bulili nu muuza wa buza.
Kalaga eli Lutundo
7 Batundwa bane, tutundanazi bweitubweitu kubuno lutundo lukutuka ku Kalaga, nu na muntu unsania ukutunda nti abutilwe na Kalaga. 8 Wozo utakutunda nti ntamenyine Kalaga; kubuno Kalaga eli lutundo. 9 Lutundo lwa Kalaga lwamonekileko kutuli mu bubuno: Kalaga asingile Mwana wage wa ngomo mu kisi, buno tulame mweli. 10 Nu lutundo lulo luli, ta ku butwamutundile, tondo ku bwatutundile, nu asingile Mwana wage kuba Mukulumania ku bwagi bweitu.
11 Batundwa bane, ndi Kalaga atutundile bubo, twatunganana nu iswe tutundane bweitubweitu. 12 Takuli muntu wampa wamonine ku Kalaga, ndi tukutundana bweitubweitu, nti Kalaga eikala mutuli, nu lutundo lwage mutuli nti lwasililila.
13 Twizi buno twikala mweli nu We mutuli, kubuno atukasile Muuza wage. 14 Nu iswe twamonine nu tukulongeka buno Isi asingile Mwana wage buno abe Monia wa Kisi. 15 Wozo witabizia bwasibwasi buno Yesu eli Mwana wa Kalaga, nti Kalaga eikala mweli nu we mu Kalaga. 16 Nu iswe, twamenyine lutundo luli na Kalaga kutuli, nu twalukatizizie. Kalaga eli lutundo, nu wozo wikala mu lutundo nti eikala mu Kalaga, nu nti Kalaga eikala mweli. 17 Bubo bweli u bubo butuli nu iswe mu kikino kisi, mu bubuno lutundo lwasililila kutuli, buno tube na bukatizio nunse ku busi bwa lusungio. 18 Boba tabuli mu lutundo, tondo lutundo lwasililila lukutikya boba, kubuno boba buli na lusungio nu wozo uli na boba ntasililila mu lutundo.
19 Kubuno beiswe, twamutunda kubuno We eli mutangi kututunda. 20 Ndi muntu umozi akutenda bunee: “Natunda Kalaga,” nu we akusomba mubuto wage, nti eli muza; kubuno wozo utakutunda mubuto wage waakumonako, buni bwanavwama kutunda Kalaga waatakumona kweli? 21 Nu kweli twakatile ikakizio lilino: Wozo ukutunda Kalaga nti atunde nu we mubuto wage.