लूका 6

सब्द रेनिय हो मालिक

(मत्ती 12:1-8; मरकुस 2:23-28)

¹ सब्द रा: दिन रे ईसु अवुर चेला कू गोहोम खेत तेकू चलो: दोहो एना। अवुर चेला कुतय गोहोम बली होड होड ते, तीत कुते दरमेस केते कू जोम गोगे दोहो एनु। ² तहाँ फरीसी कू मेंडे कुछ होड़कू कहनी तेडा, “ सब्द राः दिन रे जे नियम इदाना हेना ची लगड पे उजड़ यडा ?”

³ हेना वरि ईसु हेंकुय जबाब वडा , “ अपे भगवान राः कगद कबोह मेने पे पड़होगड किदो ? दाऊद अवुर गतित कू रंगेज तडकू तोलोग चीय बनो तेडा ? ⁴ “दाऊद भगवान ओड़ा:रे सेनकेनते भगवान लगड रकब तड हेना रोटी, याजक छोड़ एटा: कू मेने कू जोमसकोः हेना, रंगेज तडकू तोलोग दाऊद गतीत कू सुदा असी केते कू हटींग जोमतेडा। नेय होता नियामीय उजड़ तेडा।” ⁵ हेना वरि ईसु हेंकू थरेय कहनी तेडा, “ सब्द रा: दिन रे ची सही ची गलत इदाना हेना निरलेये लगड इंञ होड़ होपोन थरे हँक इदाना।”

तीत लोहोड़ तनय होड़ीय चीकन तेडा

(मत्ती 12:9-14; मरकुस 3:1-6)

⁶ अवुर एटा: सब्द रा: दिन रे ईसु गिरजा ओड़ाः रे सेनकेनते होड़कू सिकछाय चेडकू दोहो एनु। हेना रे मियाँ होड़ होड़ जोम गतर तीत लोहोड़ तनय दोहो एना। ⁷ अवुर सब्द राः दिन रेय चीकानिय किदो एरोआ, मेनाआँ ञेंल लगड फरीसी कू अवुर नियम चेचेड कू ईसु कू बदि लगड मोका कू ञँम बेड़ा दोहो एनु। ⁸ हेंय हेंकू पसींद तेड हेनाय पपाड़ी दोहो एनु, हेनाते हेंय लोहोड़ तना ती थरेय कहनी तेडा, “ रिमु: मी, सींड़ कू मड़ंग रेम चड़ाऊ।” तहाँ हेंय रिम चड़ाँ यनु।

⁹ ईसु हेंकू थरेय कहनी तेडा, “ इंञ अपेंञ होंबोर यडपेआ, सबद रा: दिन रे नियम राः उनसार ते ची बनो रे हेंडे बढ़ियाँ इदाना, सही काम करो रे किदो गलत काम करो रे; जीव बंचो हेना किदो बिलोः हेना ?” ¹⁰ तहाँ हेंय चारो गतर हन सींड़ कू ञेंलके ते हेंय होड़ थरेय कहनी तेडा, “ तीम मी सुहरू।” हेंय सुहरू तेडा, तहाँ हेंय ती चीकन यनु। ¹¹ हेना वरि हेंकू अखीर धको केनते बहेर हँडे उडुंग केनते अनाकू अनाकू कहनी ओडेंगु, “ अबु ईसु का:तेबु चीया ?”

बारह झन पेरेरित कुय चुनो तेडा

(मत्ती 10:1-4; मरकुस 3:13-19)

¹² हेना तोलोग ईसु बुरू रे बिनती: लगाडिय सेनेना, अवुर भगवान थरे रात भरीय बिनती एना। ¹³ अंगा एना तहाँ हेंय अनेज रेनकू चेला कू राःकेड कुते, हेंकू मेंडे रे बारह झनिय चुनो तेडा, अवुर हेंकू पेरेरित मेनतेय कहनी वडकुआ। ¹⁴ अवुर नेकू ञुमू नआँ या:तेआ, सिमोन ञुमू ईसु पतरस मेनतेय ञुमू तेडिया अवुर हेंय बोहोत अन्दिरयास अवुर आकुब अवुर उहाना अवुर फिलिप्पुस अवुर बरतुलमय, ¹⁵ अवुर मत्ती अवुर थोमा अवुर हलफई होपोन अकूब अवुर सिमोन, नेय जेलोतेस मेनते होकू कहनी वया, ¹⁶ अवुर अकूब होपोन यहूदा, अवुर यहूदा इस्करयोति नेनी ईसुय एर पकड़ो तेडा।

सिकछय ओवड कुआ अवुरिय चीकन तेडकुआ

(मत्ती 4:23-25; 5:1-12)

¹⁷ हेना वरि ईसु हेंकू सुदा अगड़ू केनते, समथर जघा रेय चड़ाँ एना, अवुर चेला कू राः अखीर भीड़ दोहो एना। यहूदी, एरूसेलेम, अवुर समुन्धर अड़ी रा: सूर अवुर सयदा वरि हो अखीर होड़कू मेजेना। ¹⁸ नेकू ईसु राः टेबो: अँजोम लगड अवुर रोग वरि चीकानु: लगड हेंय थरे होड़कू मेजेना। अवुर भूत कू लगो तन कू होड़कू होय चीकन कू दोहो एनु। ¹⁹ हेंय वरि सक्ति उडुंग को:ते सींड़ कुय चीकन कू दोहो एनु, हेना ते होड़कू हेंय छुवों वीय मेनते कू सँबह तना।

आसीस अवुर दु:ख रा: टेबो:

²⁰ तहाँ हेंय अनेज रेनकू चेला कू हनते तको केतेय कहनी तेडा, “ अपे गरीब गिआ पे हेना ते अपे भगवान आसीसिय ओवापेआ, कहेकि भगवान राः राज अपे थरेआ, ²¹ “अपे रंगेज केनकू पुरो केपे ते भगवान आसीसिय ओवापेआ, अपे ईयम कू भगवान आसीसिय ओवापेआ, कहेकि अपे लाँदापे। ²² होड़ होपोन राः चलते ते अपे सुदा बयेर कू रखोवा, अवुर कू निन्दा पेआ, अवुर अपे होड़कू गलती गिआ कू मेनते, पसींद केते सामाज वरि कू बेघर पेआ, हेना ते भगवान अपे आसीसिय ओवापेआ। ²³ हेना चेका खुसी तेपे ऊजू, कहेकि अँजोम पे अपे लगड सरग रे बडेआ ईनाम इदाना। नेकू रेनकू पुरबुज कुहो, भगवान राः टेबोः लाय हेंकू सुदा नेन घयते कू करोवे दोहो एनु ।

²⁴ “ अपे धनी गिआ पे अखीर दु:ख रेपे पड़ोआ, कहेकि अपे धरती रे मवोज मस्ती पे ञँम चुको केडा। ²⁵ अपे निहों सींड़ चीज पे ञँम चुको केडा, अखीर दु:ख रेपे पड़ोआ, कहेकि रंगेजुआ पे। अपे निहों लांद तनकू अखीर दुःख रेपे पड़ोआ, कहेकि पसतो अपे अवुर इया मपे। ²⁶ सींड़ होड़कू अपे बढ़ियाँ गिआ मेनते कू कहनी वपेरेदो, ओहो, अपे अखीर दु:ख रेपे पड़ोआ, कहेकि नेकू रेनकू पुरबुज कुहो अँधेर बहेर ते भगवान राः टेबोः ललाय कुहो नेन घयते बढ़ियाँ गिआ मेनते कू कहनी वकू दोहो एनु।

बयरी कू सुदा परेम

(मत्ती 5:38-48; 7:12)

²⁷ .“लेकिन इंञ अपे अआँजोम कु थरेंञ कहनी यडा, अपन मुदेय कू सुदा परेम पे रखो; अपे सुदा बयेर कू रखोवा हेंकू रा: भलेय पे करो। ²⁸ कनय हो अपे कू बोलि वपेरेदो असीर्वाद पे ओवाकू, जे अपे कू मेरंग वपेः हेंकू लगड पे बिनतीऊ। ²⁹ कनय हो मियाँ गतर जोहा पेरेय चाड़ो वेरे दो, एटा: गतर होपे एनेम चाड़ो वयू, अवुर कनय हो उयूआ तपे कू लुसी रेदो, हेंय अँगा हो पे ओवायू। ³⁰ कनय हो अपे थअय असीय रेदो, हेंय ओवाय पे, अवुर अपे था: कनारा चीज होय लुसीय रेदो हेंय वरि अलोपे असीयू। ³¹ जे घयते अपे सुदा बेवहार पे चहो: तना, हेन घयते एटाः कू सुदा होपे बेवहारूऊ।

³² `अगर अपे अपन परेम रखो कू सुदा परेम पे रखो रेदो, बड़ा भारी काम पे काम केडा किदो, नआँ या:ते दो पाप ता: हेंकू होड़कू हो अपन परेम रखोकु सुदा दो परेम कू रखोवा। ³³ अपे अनापे रा: भलेय कू करो: हेंकू सुदा भलेय पे करो रेदो बड़ा भारी काम पे काम केडा,किदो नआँ या:ते दो पापी होड़कू होकू करोवेआ। ³⁴ अगर अपे मिड़ाः सकोः घियाः कू उधार पे ओवा रेदो बड़ा भारी काम पे काम केडा, नआँ या:ते दो पापी कुहो पापी कू थरे फेर हेन मेन मोट ञाँमे लगड उधार कू ओवाकुआ। ³⁵ अपन मुदेय कू सुदा हो परेम पे रखो, हेंकू सुदा भलेय पे करो, फेरिय मिड़ागेआ मेनते असरा को:ते उधार अलो पे एमे, नआँ घयते पे करोवे रेदो बडे: ईनाम ञँमुआ। अवुर अपे भगवान रेनकू होपोन कू होयाआ, कहेकि मेने धन्यावाद वय हेंकू थरे हो अवुर पापी होड़कू थरे हो भगवान राः दया इदाना। ³⁶ जे घयते अपे रेनिय अपा दयादार गिअय हेन घयते अपे हो दयादार पे बनोऊ।

एटा: कू अलो पे दोस कू

(मत्ती 7:1-5)

³⁷ “ अलोपे बदी कू रेदो, अपे हो भगवान एरोय बदी तेडपेआ। अवुर नेय हवे मेनते नाव टिपते अलो पे टिपो कू, हेंडे दो अपे हो भगवान एरोय बदी तेडपेआ। एटाः कू पे माफ वकू रेदो अपे हो भगवान माफ वपेअय।” ³⁸ एमेय रेदो, अपे होकू ओवा पेआ, अवुर होड़कू नपो नपो ते सोकोजवते एन्डा: घयते अपे कू ओवा पेआ। जे नाप ते अपे नपोवेआ, हेन नाप ते अपे लगड होकू नपोवेआ।”

³⁹ तहाँ मियाँ टंग उदाहरड़िय कहनी तेडा , “ का:ते अंधा होड़ अंधा होरिय लाय वया ? बना होड़ डोडहा रे एरो कींञ लोजोर एनाम किदो ? ⁴⁰ चेला अनेज रेनिय गुरू वरि बडे कोवाया, लेकिन सींड़ चेडकोः रे हेंडे गुरू राः बरोबारु अयू।

⁴¹ “ एटा: कू मेड रा: तील भराः कचरा ची लगड मी ञेंलयाडा, अपन मेंड रा: बडेः कचरा दो मेन सुझो: तना ? ⁴² अम अनम मेड रा: कचरा मेनेम ञेंलयाडदो, एटा: कू का:तेम कहनी सकोआ, ‘रहा चड़ाँ: पे अपे मेड वरि कचरांञ उडुंगा ?’ एय कपटी होड़, पहिल ते अनम मेड वरि बडेः कचरा उडुंग के हेंडे एटा: कू मेड रा: कचरा, ञेंलके ते बढ़ियाँ तेम उडुंग सकोआ।

जेयसे दुबित तेयसे जोओत

(मत्ती 7:17-20; 12:34-35)

⁴³ “कनारा बढ़ियाँ: दुबी रे कड़हा कड़हीआ मेने जोआ।अवुर कड़हा कड़हीआ दुबी रे बढ़ियाँ: मेने जोआ। ⁴⁴ सींड़ दुबी जोओत ते चीनहो जोमा। होड़कू जनोम भेंजुड़ वरि अंजीर जोओ थोरे कू गोडेआ, अवुर ओत बोयीर दुबी वरि हो अंगुर जोओ मेने कू गोडेआ। ⁴⁵ बढ़ियाँ होड़ अपन कोठी कया वरि बढ़ियाँ: टेबोईय उडुंगा, अवर बेलूर होड़ अपन कोठी कया वरि बेलूरा टेबोईय उडुंगा, कहेकि जो कोठी कया रे भरो कोआ, हेनेना टेबो: हेंय अहा वरि उडुंगुआ।

बा होड़ ओड़ा: बनो कींञ

(मत्ती 7:24-27)

⁴⁶ जब अपे इंञा: टेबो: मेने पे चेडयड रेदो, ची लगड ए परभु, ए परभु, मेनते पे कहनी वंञ तना ? ⁴⁷ कनय हो इंञ थरे मेजु: हेनी, इंञा: टेबोईय अँजोमेआ, अवुर अँजोम केतेय चेडेः हेनी, हेंय करा घयगी अयू, हेंय इंञ अपेंञ लाय वताना : ⁴⁸ हेंय होड़ नआँ घयगी अयु, अपन ओड़ा: बनो तोलोग गहीर अंगम ला ला ते चटाँड़ी तया: केते, हेन वरि नेवीय बोंहड़ीआ। जब ओड़ा: रे बाढ हलका मेजेना, हेंडे रेहो मेने टक्सो गना, कहेकि हेना ओड़ाः अमर जमर तेय बनो तडा। ⁴⁹ लेकिन जे इंञा: टेबो: अँजोम केते मेने मनोवे हेनी, हेंय होड़ नआँ घयगी अयू, ओतेत रे बेगर नेव लाते ओड़ाईय बनोतेडा। जब हेना ओड़ा: रे बाढ हलका मेजेना, तहाँ हेना ओड़ाः तुरेत्ते धसगों यनु, अवुर हेंय रा: सींड़ बरबाद यनु ।