लूका 3

उहाना बतिसमा एमय ईसु रा: खभेरिय लाय तेडा

(मत्ती 3:1-12; मरकुस 1:1-8; उहाना 1:19-28)

¹ तिबिरियुस केयसर, रा: राज रा: पन्दरहवाँ बरिस रे, हेन तोलोग पुन्तियुस पिलातुस, यहूदी देस रेनिय बडेअय अघिकारीय दोहो एना। अवुर हेरोदेस, गलील जिला रेनिय बडेअय अधिकारी दोहो एना। इतूरया अवुर तीरखानीतिस जिला रे हेरोदेस मगत, फिलिप्पुस बडेअय अधिकारी दोहो एना। अवुर अबिलेने जिला रे लिसानियस, बडेअय अधिकारी दोहो एना। ² हन्ना अवुर कयफा यहूदी कुरेनकींञ बड-बडे पुजेरी कींञ दोहो एना। हेन तोलोग भगवान राः टेबो: जकरयाह होपोन उहाना, सुनहर ओत रेय दोहो एन तोलोगिय अँजोम तेडा। ³ हेंय जरदन जोड़ रा: आस पास ते सींड़ जघा रे सेनकेन ते, पाप बगि वते मन बदलो केते भगवान थरे मेजकोः ते बतिसमा तिला रेदो, हेंय अपे राः पापिय माफेआ, मेनाअँय परचार तेडा। ⁴ भगवान रा: टेबो: लाय हेनी असायाह कहनी केड हेना कागद रे हाँ: ते ओलकेड हेना इदाना, “ सुनहर जघा रे मियाँ होड़ होड़ गोहार यडा, परभु लगड होर पे तियारू, हेंय रा: होर पे सोझ साझू। ⁵ सींड़ डोडहा गी: हेना पटोवेपे, अवुर बुरू अवुर घुटरी बरोबरे पे, अवुर टेड़गा: होर सोझ साझे पे, अवुर उबड़ खबड़ गी: हेना समथारेपे। ⁶ अवुर सींड़ होड़कू भगवान कुलकेडिय हेनी उऊबरय कू ञेंलेया।”

⁷ हेना वरि अखीर होड़कू उहाना थरे बतिसमा तिला लगड कू मेजेना, हेन तोलोग हेंकू थरेय कहनी तेडा, “ ए बींञ घयते जरजाठ होड़कू, अपे मेजु: तना दंड वरि बंचोआ मेनते इया सिखो केडपेआ ? ⁸ भगवान थरे मेजकेनते मन कू बदलो केडा मेनाआँ, पपाड़ी लगड बढ़ियाँ: काम पे करो। अवुर अले अपाले दो अबराहम हवे, बंचो अले मेनते अलो पे फुलायू। अपे थरेंञ कहनी यडा, अनापे भर दो कोवाआ, भगवान दिरी वरि हो अबराहम लगड चोंडीज कुय बनो सकोआ। ⁹ टंगा काठ दुबी रे दोहोकेडा अवुर जे जे काठ बढ़ियाँ ते मेने जो: हेना गेरके ते सेंगेल रेय तुयाँगेआ।”

¹⁰ हेना वरि होड़कू हेंय कू होंबोर तेडिया, “ हेंडे दोखा अले चीले बनोआँ ?”

¹¹ तहाँ हेंकुय जबाब वडा, “ जे जे थरे बा टंग अंगा इदान हेनी, कोवाआ हेनी मियाँ टंगीय हटींगवा अवुर जे जे थरे खुदी - चुनी इदाना हेंय होय हटींगे।”

¹² मलगुजारी तिला कुहो बतिसमा तिला कू मेजेना, अवुर कू होंबोर तेडिया, “ ए गुरू, अले चीले बनोआँ ?” ¹³ हेना वरि हेंकूय कहनी वडा, “अपे लगड जेतना रेट तोलकेना हेना वरि बगरा अलो पे तिलायू।”

¹⁴ पुलुस कुहो हाँ: तेकू होंबोर तेडिया, “अले चीले बनोआँ खा?” हेना वरि हेंय हेंकुय कहनी वडा, “जबरजस्ती चहे ञेंड बेड़ावकू ते पेयसा अलो पे असीयू अवुर झूठ मूठ ते कनय अलोपे दोसू, अपे जेतना ञँमुआ हेन मेना: रेपे संतोकता।”

¹⁵ यहूदी होड़कू उऊबरय असरा लगय तेकू तंगीय दोहो एनु, अवुर हेंकू अपन - अपन मन रे नेनी मसीहा हवे मेनते, उहाना रा: बारे तेकू पसींदे दोहो एनु। ¹⁶ हेना वरि उहाना हेंकू सींड़ कुय कहनी वडा, “ इंञ दो अपे दा: ते बतिसमांञ ओवापेताना, लेकिन इंञ वरि तयोम तेय मेजु; तनय इंञ वरिय बडे गिआ यू, इंञ दो हेंय रा: जुता रसि लड़ा लायीक कोवाञाँ। हेंय अपे पवितर आत्मा अवुर सेंगेल ते बतिसमाय ओवापेआ। ¹⁷ हेंय रा: हटा: हे नी ती रेआ, अवुर खरियन तय बढ़ियाँ तेय अमीञेंआ। अवुर गोहोंम तुदो अनेज रा: कोठी रेय जवारेआ, लेकिन कुस्टत दो मेने ईड़ीजुआ सेंगेल रेय तुयाँगेआ।” ¹⁸ नेन या:ते हेंय अखीर सिकछा दे दे ते होड़कू बढ़ियाँ:खभेरिय लाय वकू दोहो एनु ।

¹⁹ उहाना हेरोदेस राजा अखीरिय दबेट तेडिया, कहेकि मगत कन्याँ हेरोदियासीय रखो तडिया, अवुर अखीरिय गलती तेडा, ²⁰ अवुर मियाँ टंग ए गलतीय गलती तेडा कि उहाना जेहेल रेय एर डलो तेडिया ।

ईसु बतिसमाय तिला तेडा

(मत्ती 3:13-17; मरकुस 1:9-11)

²¹ जब सींड़ होड़कू बतिसमाय कू तिला तेडा, ईसु हो बतिसमाय तिला तेडा। अवुर बिनतीः दोहोन तोलोग अगस जीजयानु ²² अवुर पवितर आत्मा परेवाँ राः भेस ते हेंय थरे अगडू एना, अवुर अगस वरि न घयते अवाज मेजेना, “ अम इञाँअय दुलर कोड़ा होपोन हवे, अवुर अम थरे खुस इदानीञाँ।”

ईसु रेनकू खुटीयारा कू

(मत्ती 1:1-17)

²³ लग भग ईसु तीस बारिस रेनिय दोहो एन तोलोग ललायीय बोहड़ी तेडा, ( होड़कू नेन घयते कू अड़ींग दोहो एनु ) ईसु उसुफ होपोन दोहो एना; उसुफ अपत एली दोहो एना, ²⁴ एली अपत मत्तात दोहो एना, मत्तात अपत लेवी दोहो एना, लेवी अपत मलकी दोहो एना, मलकी अपत यन्ना दोहो एना, अवुर यन्ना अपत उसुफ दोहो एना, ²⁵ उसुफ अपत मत्तियाह दोहो एना, मत्तियाह अपत आमोस दोहो एना, अवुर आमोस अपत नहूम दोहो एना, नहूम अपत असल्याह दोहो एना, असल्याह अपत नोगह दोहो एना, ²⁶ नोगह अपत मात दोहो एना, मात अपत मत्तियाह दोहो एना, मत्तियाह अपत सिमी दोहो एना, अवुर सिमी अपत योसेख दोहो एना, अवुर योसेख अपत योदाह दोहो एना, ²⁷ योदाह अपत उहाना दोहो एना, उहाना अपत रेसा दोहो एना, रेसा अपत जरूब्बाबिल दोहो एना, अवुर जरूब्बाबिल अपत सालतियेल दोहो एना, अवुर सालतियेल अपत नेरी दोहो एना, ²⁸ नेरी अपत मलकी दोहो एना, मलकी अपत अदी दोहो एना, अदी अपत कोसाम दोहो एना, कोसाम अपत इलमोदाम दोहो एना अवुर इलमोदाम अपत एर दोहो एना, ²⁹ एर अपत येसु दोहो एना, येसु अपत इलाजार दोहो एना, इलाजार अपत योरीम दोहो एना, अवुर योरीम अपत मत्तात दोहो एना, अवुर मत्तात अपत लेवी दोहो एना, ³⁰ लेवी अपत समोन दोहो एना, समोन अपत यहूदाह दोहो एना, अवुर यहूदाह अपत उसुफ दोहो एना, अवुर उसुफ अपत योनान दोहो एना, योनान अपत इलयाकीम दोहो एना, ³¹ इलयाकीम अपत मलेआह दोहो एना, मलेआह अपत मिन्नाह दोहो एना, अवुर मिन्नाह अपत मत्तता दोहो एना, अवुर मत्तता अपत नातान दोहो एना अवुर नातान अपत दाऊद दोहो एना, ³² दाऊद अपत यिसय दोहो एना, यिसय अपत ओबेद दोहो एना, अवुर ओबेद अपत बोःज दोहो एना, अवुर बोःज अपत सलमोन दोहो एना, अवुर सलमोन अपत नहसोन दोहो एना, ³³ नहसोन अपत अम्मीनादाब दोहो एना, अम्मीनादाब अपत अरनी दोहो एना, अवुर अरनी अपत हिरसोन दोहो एना, अवुर हिरसोन अपत फिरिस दोहो एना, अवुर फिरिस अपत यहूदाह दोहो एना, ³⁴ यहूदाह अपत अकूब दोहो एना, अकूब अपत इसहाक दोहो एना, अवुर इसहाक अपत अबराहम दोहो एना, अवुर अबराहम अपत तिरह दोहो एना, अवुर तिरह अपत नाहोर दोहो एना, ³⁵ नाहोर अपत सरूग दोहो एना, सरूग अपत रऊ दोहो एना, अवुर रऊ अपत फिलिग दोहो एना, अवुर फिलिग अपत एबिर दोहो एना, अवुर एबिर अपत सिलह दोहो एना, ³⁶ सिलह अपत केनान दोहो एना, केनान अपत अरफछाद दोहो एना, अवुर अरफछाद अपत सेम दोहो एना, अवुर सेम अपत नूह दोहो एना, अवुर नूह अपत लिमिक दोहो एना, ³⁷ लिमिक अपत मथूसिलह दोहो एना, मथूसिलह अपत हनोक दोहो एना, अवुर हनोक अपत यिरिद दोहो एना, अवुर यिरिद अपत महल्लेल दोहो एना अवुर महल्लेल अपत केनान दोहो एना, ³⁸ केनान अपत इनोस दोहो एना, अवुर इनोस अपत सेत दोहो एना, अवुर सेत अपत आदम दोहो एना, आदम भगवान होपोन दोहो एना ।