लूका 1

लूका ओल केडा ईसु राः बढ़ियाँ: खभेर

लूका

लूका ईसु राः जिवन राः बारे ते परिचित

^1-2 एगा थियुफिलुस, ईसु मसीह अबु होड़कू राः मँझर रेय दोहो एना। हेना तोलोग कुछ होड़कू सुरु वरि हेंय राः काम कू ञेंलतेडा, नेकू भगवान रेनकू सेवेखिया कू दोहो एना, अवुर अबु ईसु राः बारे तेकू लाय वडबुआ। जे जे नआँ टेबोः कू अँजोम तेडा, हेंकू मेंडे कुछ होड़कू जेयसे कू लाय वडकुआ, हेन घयते कू ओलकेडा। ^3-4 हेना ते इंञ नआँ सींड़ टेबोः दुबीत-जेड़ीत वरि धियान सेते, जाँच तेड दो बढ़ियाँ वडींञाँ। अम नेआँ टेबो: पढ़ो केते जो कुछ मी अँजोम केडा, हेना राः सत मी पपाड़ी: लगड ओरे ओर ते अम लगाडींञ ओलियाडा।

उहाना रा: जनम रा: चनक

⁵ हेरोदेस यहूदी देस रेनिय राजा दोहोन तोलोग अबिय्याह राः दल रे, जकरयाह मेनते कू ञुमू तडिय हेनी याजक दोहो एना, हेंय इंगत कू इलीसिबा हारून खुटी - खनदान रेनिय दोहो एना। ⁶ बना होड़ कुलगीया भगवान राः नंजेर रे धरमी कींञ दोहो एना, अवुर परभु राः सींड़ टेबो: अवुर नियम कींञ मनो दोहो एनु। ⁷ लेकिन हेंकीञ रेनकू चोंडीज कू मेने कू दोहो गना, कहेकि इलीसिबा बँजीय दोहो एना, हेंकींञ बना होड़कींञ सँयाहोड़ यन दोहो एनु।

⁸ एक दिन राः दिन रे अपन दल राः पारी रे, हेना तोलोग जकरयाह भगवान राः मंडिल रे, याजक रा: कामीय काम दोहो एनु। ⁹ भगवान राः मंडिल रे सकला जरो लगड, याजक कुराः रिति बिधी घयते जकरयाह ञुमू ते चिठा उडुंग एना। ¹⁰ सकला जरो तोलोगू सींड़ होड़कू बहेर हँडे कू बिनती: दोहो एनु। ¹¹ सकला जरो तेड तोलोगू, हेना जघा वरि जोम गतर रे सरगदूत अचा कतेय मेज चड़ाँ एना, अवुर जकरयाह हेंयीय ञेंलवा डिया। ¹² जकरयाह ञेंलकेडिय तेय अक - बको यनु, अवुर अखीरिय बोरो तेडा। ¹³ लेकिन सरगदूत कहनी तेडा, “ ए जकरयाह अलोम बोरू, कहेकि अमा: बिनती भगवान अँजोम केडा, अम इंगापे इलिसिबा वरि अम लगड मियाँ टंग कोड़ा चोंडीजिय हँबुडा। ¹⁴ अम अखीर तेम खुसीआ, अवुर हेंय जनामु: हेना चलते ते अखीर होड़कू बहालुआ कू। ¹⁵ कहेकि हेंय भगवान रा: नंजेर रेय बडेआ, अवुर अंगुर रस अवुर नसा चीज कभी एरोय ञुँतेडा, हेंय इंनीगत लाज वरि पवितर आत्मा तेय भरोआ। ¹⁶ अवुर इसराएल देस रेनकू अखीर होड़कू, उहाना हेंकू रेनिय परभु भगवान हनतेय मिड़ा: कुआ। ¹⁷ हेंय एलिय्याह थरे दोहो एना हेना आत्मा अवुर सक्ति तेय भरोको:ते, उहाना परभु वरि होड़कू तयार लगाडीय मड़ांगा, अवुर बाप - ददा कू अवुर चोंडीज कुराः मानिय हेल - मेला, अवुर टेबो: मेने चेड कू भगवान राः टेबो: मनो कू घयते होड़कुय तियारा।”

¹⁸ हेना वरि जकरयाह सरगदूतीय होंबोर तेडा, “नआँ का:तेंञ पपाड़ीआ इंञ दोंञ हड़ाम यना, अवुर इंगाले होय बुडही यना।” ¹⁹ तहाँ सरगदूत जबाब तेडा, “ इंञ भगवान मड़ंग रे दोहोनय जिबराईल हवे, अवुर अम सुदा टेबो: लगड अवुर बढ़ियाँ: खभेर लाय लगाडीय कुलकेडिञाँ। ²⁰ अँजोम मी, अम इंञा: टेबो अपन समय रे, पुरा होया: हेना रे मेनेम बिसवास गडा, हेना ते अम गूँगा अमू अवुर नआँ टेबो: अनायीन पुरो: मेन दिन एरोम टेबो: सको एना।”

²¹ होड़कू जकरयाह कू तँगी दोहो एनु अवुर मंडिल रे न मेन ची लगाडिय देरी केडा मेनते कू अचरज यनु। ²² जकरयाह बहेर हनतेय उडुंग एना, तहाँ हेंय हेंकू सुदा मेनेय टेबो: सकोऊ, तहाँ कू पपाड़ीयन किदो नेय मंडिल रे कनायीय ञेंलवाडा। अवुर हेंकू थरेय तीब एपेल बेड़ायू अवुरिय गूँगा यनु। ²³ जब हेंय राः सेसेवा राः दिन पुरो एना, तहाँ अनेज ओड़ा: हनतेय चलो एना।

²⁴ कुछ दिन बितो केन राः बाद रे, जकरयाह इंगत कू इलीसिबा असा पति एनयु। ²⁵ अवुर पाँच महिना अँगम न या:ते कहनी केतेय उकू तडा, ‘होड़कू अलो कू कहनी गेवेंञ लगड भगवान नआँ समय रे इंञ थरेय दया केनते, चोंडिज कू ञमु: तना।

ईसु रा: जनम रा: चनक

²⁶ एलीसिबा राः छो महिना तना, हेन तोलोग भगवान हन वरि जिबराईल सरगदूत गलील राः नासरत गाँव रे, ²⁷ डिंडा हपामोन थरेय कुल तेडिया, हेंय ञुमू मरियोम मेनते दोहो एना, हेंय राः मला - मठी उसुफ सुदा होया तना, उसुफ दाऊद खुटी - खनदान रेनिय होड़ दोहो एना। ²⁸ सरगदूत भितर रे मेजकेन ते हेंय थरेय कहनी तेडा ,“ जोहर, अम भगवान सोग वड मिआँ ! परभु अम सुदाया !”

²⁹ तहाँ हेना टेबो: अँजोम केते अखीरिय अक - बको यनु अवुर न करा घियाः जोहर हवे ? मेनतेय पसींदे दोहो एनु। ³⁰ हेना वरि सरगदूत हेंय थरेय कहनी तेडा, “ए मरियोम, अलोम बोरू, कहेकि अम थरे भगवान मया केना। ³¹ अँजोमेमू, अम असा पति अमू अवुर अम मियाँ टंग कोड़ा चोंडीज मी हँबुडा, हेंय ईसु मेनतेम ञुमूयू। ³² हेंय बडे होड़ीय बनोआँ, सींड़ वरि बडेअय भगवान रेनिय होपोन कहोआ, परभु भगवान हेंय अपत दाऊद रा: राज गदिय ओवाया। ³³ अवुर हेंय अकूब रा: पीढ़ी - पीढ़ी रे हमेसाय राजेआ; अवुर हेंय रा: राज कनर तोलोग एरो हनी एना।”

³⁴ हेना वरि मरियोम सरगदूत थरेय कहनी तेडा,“ न का:ते होयाआ इंञ दो कनय कोड़ाहोन सुदा बेनेगारिंञ गीतीजा।”

³⁵ हेना वरि सरगदूत जबाब वडिया,“ पवितर आत्मा अम थरे अगड़ू आ, अवुर सींड़ वरि बडेअय भगवान रा: सक्ति डबड़ीं मिआँ, हेना ते पवितर बले जनमुआ हेंय भगवान रेनिय होपोन मेनते कू कहनी वया। ³⁶ अवुर अँजोमेमू, अम खनदान रेनिय इलीसिबा होड़कू बँजी मेनते कू कहनी वया, हेंय सयाँ होड़ यन रेहो कोड़ा चोंडीजिय हँबुड बंचो केडा, हेंय रा: छो महिना केना। ³⁷ कहेकि भगवान हनवरि दोहोन हेना टेबो: एके ओत रे मेने लोजोरुआ।”

³⁸ हेना वरि मरियोम कहनी तेडा, “अँजोम मी, इंञ दो भगवान रेनिय सेवेकहीन हवे, जेयसे अम कहनी केड घयते इंञ थरे होयाऊ।” तहाँ सरगदूत मरियोम वरिय चलो यनु।

मरियोम इलीसिबा सुदा जुमोईय सेनेना

³⁹ हेन तोलोग मरियोम तुरेत्ते सँबह केनते, अहूदी देस रा: मियाँ टंग पहाड़ी गाँव रे, जकरयाह ओड़ाः इलीसिबा सुदा जुमोईय सेनेना। ⁴⁰ जकरयाह ओड़ाः सेनकेन ते इलीसिबय जोहर वडा। ⁴¹ इलीसिबा मरियोम रा: जोहरिय अँजोम तेड सी, चोंडीज लाजतू रेय हिलो एना, अवुर इलीसिबा पवितर आत्मा तेय भरो यनु। ⁴² अवुर हेंय बडे बडे तेय कहनी तेडा, “अम सींड़ कोड़ी कू मेंडे, भगवान अम अवुर लजमी रे इदानिय हेंय बले हो असीर्वादिय ओवाडिया ! ⁴³ करा: करा:ते इंञा: भाग रे ञँनामकेना ? इंञाँअय परभु इंगत इंञ सुदा जुमोईय मेजकेना! ⁴⁴ अँजोम मी, अमा: जोहारिंञ अँजोम तेड सी चोंडीज इंञ लाज रे खुसी तेय उजेना। ⁴⁵ परभु कहनी केड हेना टेबो: रे अम विसवास केडा, हेना ते भगवान अम थरेय मया केना!”

मरियोम सिरिंग एना

⁴⁶ हेना वरि मरियोम कहनी तेडा, “ इंञा: जीव परभु राः बड़हाई यडा,

⁴⁷ अवुर इंञ उबारय हेंय भगवान थरे इंञा: कोठी कया बहल केना,

⁴⁸ कहेकि भगवान इंञ घियाअय होडीञय सेवेखहीन थरे अखीरिय दया केना, हेना ते अँजोम पे, अब वरि पीढ़ी - पीढ़ी रेनकू होड़कू, इंञ तिमीन आसिर्वादिय ञंमकेडा मेनते कू कहनी वञाँ।

⁴⁹ सक्तिदारय भगवान हेंय इंञ लगड बडे बडेअय कामीय काम केडा, हेंय ञुँमू पवितर गिआ।

⁵⁰ अवुर कनय हो हेंय राः डर भय तेय दोहोना, हेंकू थरे भगवान राः दया पीढ़ी - पीढ़ी अँगम दोहोना।

⁵¹ हेंय अनेज रा: सक्तिय तिबकेडा, अवुर अपन - आप बडे गिअंञ मेनते कू अड़ींग दोहो एनु, हेंकू सींड़ कुय छितीर - बितीर गोत्तेड कुआ।

⁵² राजा कू राज गदी रेकू दुडूब तन हेंकू हेंय सींड़ कुय उडुंग गोत्तेड कुआ, अवुर गरीब होड़कुय रिमतेड कुआ।

⁵³ हेंय रंगेज होड़कू बढ़ियाँ - बढ़ियाँ: चीज तेय पुरो तेडकुआ, अवुर धनी होड़कू एके तीतेय उडूंग गोत्तेड कुआ।

⁵⁴ हेंय अनेज रा: हेना दयाय उहयार लगड, अनेज रेनकू सेवेखिया कू इसराएलिकुय सम्भरो तेडकुआ,

⁵⁵ भगवान अबु रेनकू पुरबुज कू थरेय जबान तेडा, हेना दया अबराहम अवुर हेंय रेनकू खुटी - खनदान कू थरे जिनगीक जिनगी दोहोना।”

⁵⁶ लग - भग तीन महीना मरियोम इलीसिबा सुदाय दोहो एना, हेना वरि अनेज ओड़ा: हनतेय मिड़ा: एना।

इलीसिबा उहानाय हँबुड तेडा

⁵⁷ इलीसिबा राः दिन पुरती एना, हेना वरि मियाँ टंग कोड़ा चोंडीजिय हँबुड तेडा। ⁵⁸ हेंय रेनकू परोसी कू अवुर हीत नात कू परभु हेंय थरे अखीरिय दया केना मेनाआँ, अँजोम केते हेंकू इलीसिबा सुदा बहाली कू मनो तेडा,

⁵⁹ अवुर आठ दिन रे बले राः खतनाय लगड हित नात कू मेजेना, हेना वरि बले ञुमू अपत ञुमू घयते जकरयाह मेनते कु ञुमू सोताडिया। ⁶⁰ लेकिन इलीसिबा कहनी तेडा, “ न घयते अलो पे ञुमूयू, नेय ञुमू उहाना मेनते दोहोना।” ⁶¹ तहाँ हेंकू इलीसिबा थरे कू कहनी तेडा, “ अपे खुटी - खनदान रे न या:ते कनय ञुमू कोवाआ !” ⁶² नेय ची मेनतेम ञुमूयाँ मेनते, अपत इसारा केडते कू होंबोर तेडिया। ⁶³ हेंय ओले लगड सिलोटीय एर अक्तेडा, अवुरिय ओलतेडा, “ नेय ञुमू उहाना हवे,” तहाँ सींड़ कुकू अचरज यनु। ⁶⁴ हेनेन तोलोग जकरयाह तुरेत्तेय टेबो: बेड़ाऊ, अवुर भगवान धन्यावादीय ओवा दोहो एनु।

⁶⁵ हेना वरि धरि कगर ते दोहोएन हेंकू थरे बोर समसो यनु, अवुर नआँ टेबो: सींड़ यहूदी देस राः पहाड़ी गाँव ते मिरिज यनु। ⁶⁶ अवुर परभु हेंय सुदाय दोहो एना, हेना ते सींड़ कू अँआजोम कू मन - मन रे पसींद केत्ते कू कहनी तेडा, “ नेय चोडींज चीय बनोआँ ?”

जकरयाह सिरिंग एना

⁶⁷ उहाना अपत जकरयाह पवितर आत्मा ते भरो केनते भगवान राः टेबोईय लाय तेडा : ⁶⁸ “ इसरायील देस कू रेनिय परभु भगवान बढ़ियाँ गिआ यू, कहेकि हेंय अपन होड़कू थरे ञेल मया केनते अबुय छडो केडबु अयू। ⁶⁹ अवुर अपन सेवेखिया दाऊद राः खुटी खनदान रे अबु लगड मियाँ टंग उऊबरायीय कुलकेडा। ⁷⁰ ( नआँ हेंय पहील वरि भगवान रा: टेबो: लाय हेंकू रा: दोवारा तेय लाय अक्तेडा), ⁷¹ भगवान अबु रेनकू मुदेय कू वरि अवुर मेने बेसवाबु: हेंकू वरिय उबर केडबुआ। ⁷² अपन पवितर जबानीय उहयार केते अबु रेनकू खुटियारा कू थरेय दया केना। ^73-75 भगवान अबु रेनिय अपाबु अबराहम थरे नआँ या:ते किरिया केनतेय कहनी तेडा, कि इंञ मुदेय कू वरिंञ छडो पेआ, अवुर पवितर अवुर धरमीबनो कोःते,निडर ते जिनगी भर इंञ मनोविंञ महल रेपे दोहोनु।

⁷⁶ ए बाबू, अम सींड़ वरि बडेअय भगवान रेनिय टेबो: ललायय मेनते कू कहनी वमीआ, कहेकि भगवान राः होर तयार लगड, मसीहा वरि मड़ंग मड़ंग तेम सेनेआँ, ⁷⁷ भगवान वरि पाप राः माफी ञमकेते, उबारुः लगड अम भगवान रेनकू होड़कू बुदहीम लाय वकुआ। ⁷⁸ अबु रेनिय भगवान राः दया ते, अबु लगड सरग वरि इंजोर ञँमुआँ। ⁷⁹ नआँ इंजोर अंधरा रे दोहोन कू, अवुर गोजु: कू बोरोवा: हेंकू थरे, इंजोरीय तीःवा कुआ अवुर अबु सान्ति ञमुः हेना होर तेय गो:बुआ।”

⁸⁰ अवुर हेंय चोंडीज बडेऊ अवुर आत्मा तेय भरपुर चलो एना, अवुर इसराएल रेनकू थरे अनायीनिय परचारे मेन दिन, सुनसँन जघा रेय दोहो एना।