लूका 2

ईसु राः जनम करम

(मत्ती 1:18-25)

¹ हेन तोलोग सींड़ रोमी देस रेनकू होड़कू, अपन - अपन ञुमूत कू एर ओल लगड, रोम देस रेनकू राजा कू वरि बडेअय राजा अवगुस्तुस केयसर हुकूम तेडा। ² किवरिनियुस सिरिया रेनिय बडे अय अघिकरीय दोहो एन तोलोग, नआँ सुरवत लेखा जोखा होया एना। ³ सींड़ होड़कू ञुमू एर ओल लगड अपन - अपन गाँव कू चलो एना।

⁴ उसुफ दाऊद खुटी खनदान रेनिय दोहो एना, हेना ते गलील जिला रा: नासरत सहर वरि यहूदी देस रे, दाऊद राजा बडे एन हेना सहर बयतुलामीय सेनेना। ⁵ मरियोम उसुफ लगड कू असी तडिया अवुर हेंय दोहरी देंह रेय दोहो एना। हेंय सुदा ञुमू एर ओल लगड कींञ सेनेना। ⁶ हेन हँडे दोहो एन तोलोग, मरियोम राः दिन पुरती होया एना। ⁷ मरियोम अगुल बेटाय हँबुड तेडा, अवुर हेंकींञ धरम साला रे दोहोन लगड, जघा मेने कींञ ञँमगाडा। हेना ते बले कपड़ा ते भेंटो केडिय ते, माल मोसी कू चरा कू ओवाकु: हेना जघा रेकींञ गितिज तडिया।

सरगदूत कू भेड़ी चरवाह कू खभेर कू लाय वड कुआ

⁸ हेना देस रे ञींद, केय्यो झन गयर कू खुधे खुधा ते डांड ओत रे, अपन-अपन भेड़ी कुकू पहरा दोहो एनु। ⁹ परभु रेनिय सरगदूत हेंकू थरे अचा कतेय मेजेना, हेन तोलोग हेना रे परभु रा: इंजोर हेंकू रा: चरयो गतर हँडे चमको एना, तहाँ हेंकू अखीर कू बोरो यनु। ¹⁰ हेना वरि सरगदूत हेंकूय कहनी वडा, “ अलो पे बोरू; अँजोम पे, इंञ सींड़ होड़कू रा: जिव बहालु: हेना खबेरिंञ अगकेडा। ¹¹ तेसींञ अपे लगड, दाऊद रा: सहर रे उऊबराय जनम केना, अवुर नेनी मसीहा हवें, अवुर अपे रेनिय परभु हवे। ¹² अवुर हेंय राः निसाना हाँ: तेपे ञामेआँ, मियाँ टंग चोंडीज कपड़ा तेकू भेंटो केडिया, अवुर माल मोसी कू चरा कू ओवाकु: हेना जघा रेपे ञमेयाँ।”

¹³ तहाँ अचाकते हेंय सरगदूत सुदा, अखीर बगरा सरगदूत कू भगवान रा: कू स्तुति दोहो एनु, अवुर हाँ: तेकू कहनीय तोलोग कू ञेंल वड कुआ। ¹⁴ “ पिरथी रे भगवान रा: स्तुति होयाऊ, धरती रे जे होड़कुय मंजुर वआ, हेंकू जिवीत कुय असतीरा।”

¹⁵ सरगदूत कू सरग हनते चलो एनसी गयर कू कहनी ओड़ेंग एना, “ दू बू , परभु लाय वड बु: हेना टेबो: बयतुलम सेनको: तेबू ञेंल अगुयू।” ¹⁶ अवुर तुरेत्ते हेंकू सेनकेनते मरियोम अवुर उसुफ, बले माल मोसी कू ओवा: हेना जघा रेकींञ, गितिज तडिय तोलोग कू ञेंल ञँमतेडिया। ¹⁷ गयर कू हेंय बले ञेंलकेते, सरगदूत हेंकू थरेय लाय तडा, हेना टेबोः होड़कुकू लाय वडा। ¹⁸ अवुर सींड़कू अअँजोम कू गयर कू लाय तेड हेना, टेबो: तेकू अचरज यनु। ¹⁹ नआँ सींड़ टेबो: मरियोम मने - मन रे दोहो केतेय पसींदे दोहो एनु। ²⁰ अवुर जेयसे गयर कू थरेय लाय तडा, हेनेन घयते सींड़ ञेंल केड अँजोम केते, भगवान रा: स्तुति अवुर बडेय बेड़ा वडियते कू मिड़ा एना।

ईसु कू ञुमू तेडा

²¹ हेंय बले राः आठ दिन पुरो एना, तहाँ हेंय राः खतनाय राः समय होया एना, तहाँ हेंय ईसु मेनते कू ञुमू तेडिया, नआँ याःते ञुमूय लगड सरगदूत मरियोम थरे, असापति एनवरि मड़ंग तेय लाय तडा। ²² परभु मूसा राः दोवाराते यहूदी होड़कू लगड ओलकेडा नियम राः अनुसार ते मरियोम गंबोलो एना, तहाँ ईसु परभु थरे जिमाय लगड एरूसेलेम कींञ इदी तेडिया। ²³ परभु राः नियम रे नआँ याःते ओलकेड हेना इदाना, “ सींड़ अगुल बेटा कू परभु लगड हिगरो कू।” ²⁴ अवुर परभु राः नियम राः अनुसार ते : परेंवाँ मियाँ जोड़ा चहे बाटंग पनकी होपोन कींञ अक्के तेकू रकब किंञू।

सिमोन सिरिंग तेडा

²⁵ एरूसेलेम रे सिमोन मेनते कू ञुमू तडिय हेनी, धरमीहोड़दोहो एना अवुर भगवान नियम एमकेड हेनय मनोवे दोहो एनु। अवुर हेंय थरे पवितर आत्मा दोहो एना, अवुर इसरायील होड़कू उबर हेंयीय तँगी दोहो एनु। ²⁶ अवुर अम परभु रेनिय मसीहा ञेंलके बिना एरोम गोजेना मेनते, पवितर आत्मा पहील ते लाय मड़ंग तडा। ²⁷ एक दिन रा: दिन रे पवितर आत्मा, सिमोन मंडिल रे सेनु: लगड कहनी वडिया। हेन तोलोग नियम इदान घयते एचेय लगड इंगत अपत ईसु भितर कींञ अदीर तेडिया। ²⁸ तहाँ सिमोन अपन कोरा रे ईसु सिपींञ केडते भगवान धन्यावादीय ओवाडिया अवुरिय कहनी तेडा, ²⁹ “ परभु, अम इंञ थरेम कहनी तेडा, हेन घयतेम करो केडा, इंञ अमाअय सेवेखिया हवे, अब दो असतीर तेम एनेम गोजवाञू। ³⁰ जे होड़ अम होड़कू उबर लगड मी कुलकेडिया, निहों हेंय अपन मेड तेंञ ञेंलके डिया। ³¹ नेय सींड़ देस रेनकू होड़कू उबर लगड अम पसींद अगतेडा, ³² नेय चोंडीज भगवान रा: होर तीब लगड सींड़ जात कू लगड इंजोर घयतेय होयाआ, अवुर इसरायील होड़कू थरे नेय राः चलते ते भगवान रा: मान मरजाद होयाआ।”

³³ नआँ टेबोः अँजोम केते हेंय इंगत अपत एडकींञ अचरज यनु। ³⁴ सिमोन हेंकींञ आसीर्वादीय ओवड कि़ञा, हेना वरि ईसु इंगत मरियोम थरेय कहनी तेडा, “ अँजोम मी, नेय बले राः चलते ते अबु कुछ इसरायली होड़कू बंचोअकू। लेकिन नेय थरे मेने बिसवासेः कू बिलोअकू। नेय बले भगवान राः होर तीब लगड मियाँ टंग चिनहाँय होया: तना। नेय मान मनीस तेकू बदीया, ³⁵ हेना ते नेय राः दोवाराते अखीर झन राः हिरदय राः विचार परगाटुआ। अवुर अम तरवार राः मरल बरोबर ते अखीर तेम दुःखीतुआ।”

हन्ना राः गोवाही

³⁶ मियाँ होड़ हन्ना मेनते कू ञुमू तडिय हेनी कोड़ीहोन दोहो एना। हेंय भगवान रा: टेबो: ललायय दोहो एना, नेय चौरासी बरीस रेनिय दोहो एना, नेय फनुएल कोड़ी होपोन असेर गोति रेनिय दोहो एना। नेय अखीरिय बुढ़ी यनु। अवुर बियाह केनते सात बरिस अँगम अपत कू सुदय दोहो एना, तहाँय एकल यनु। ³⁷ नेय मंडिल मेनेय बगी बेड़ा गडा, सींञ ञींद उपास अवुर बिनती कोःते भगवान राः सेवा रेय दोहो एना। ³⁸ हेन तोलोग हन्ना ईसु इंगा अपा थरेय मेजेना। परभु धन्यावादीय ओवाडिया। जे जे एरूसेलेम रेनकू उऊबराय कू तँगि दोहो एनु, हेंकु हन्ना ईसु राः बारे तेय लाय वकू दोहो एनु।

नासरत कींञ मिड़ा: एना

³⁹ जब ईसु इंगा अपा परभु एमकेडा हेना नियम घयते, सींड़ चीज कींञ करो केते, गलील जिला रे अनाकू सहर नासरत कींञ मिड़ाः एना। ⁴⁰ लगे चोंडीज बडेऊ, अवुरिय जँगाड़ुऊ, अवुर कनहुन एना, अवुर भगवान राः मया हेंय थरे दोहो एना।

ईसु मसीह मंडिल रे

⁴¹ ईसु इंगा - अपा सलेना फसह परब मनो लगड, एरूसेलेम कींञ सेनु: दोहो एनु। ⁴² ईसु बारह बरिस रेनिय दोहोएन तोलोग हेंकू राः रिती बिधी घयते परब मनो लगड एरूसेलेम कू सेनेना। ⁴³ हेना वरि परब मनो केते कू मिड़ा: मेजु: तोलोग, ईसु एरूसेलेम हँडेय दोहो यनु; नआँ इंगत अपत एडकींञ मेने कींञ पपाड़ी दोहो एनु। ⁴⁴ हेंकींञ पसींद तेडा कनय एटाः गतिकू सुदाया मेनते, हेना वरि एक दिन सेनकेड राः बाद रे अपन कुटुम्ब कू अवुर हित नात कू थरे कींञ छपा बेड़ायू। ⁴⁵ हेना वरि मेने कींञ ञँमगाडिय तहाँ, छपा - छपा ते एरूसेलेम कींञ मिड़ा: यनु। ⁴⁶ हेना वरि तीन दिन बितो केन राः बाद रे, मंडिल रे नियम कनहून चेचेड हेंकू सुदा, दुड़ूब तन तोलोग कींञ सेन ञमतेडिया। अवुर हेंकू रा: टेबो: अँजोमेयू अवुर हेंकू थरे जबाब सवालीय होंबोर कू। ⁴⁷ जेतना हेंय रा: टेबो: अवुर जबाब कू अँजोम दोहो एनु, हेंकू अचरज जोम कू। ⁴⁸ तहाँ इंगत - अपत ञेंलके डियते कींञ अचरज यनु, हेना वरि इंगत ईसु थरेय कहनी तेडा, “ ची लगड बाबू अम अलींञ सुदा न घयतेम करो तेडा ? अपुम सुदा जघा- जघा ते अखीर मी एर छपा धँगेच यडलीञाँ।” ⁴⁹ हेंय हेंकींञ थरेय कहनी तेडा, “ अबा ची लगड बा छपांञ दोहो एनु ? अबा मेने बा पपाड़ी दोहो एनु, कि इंञ अपुंञ ओड़ा: रे दोहोन जरूरी इदाना ?” ⁵⁰ जे टेबो:ईय लाय तेडा, हेना हेंकींञ मेने कींञ जेर गडा। ⁵¹ हेना वरि इंगत - अपत सुदा नासरत हनतेय चलो एना, अवुर हेंकींञ राः टेबोः चेडके ते हेंकींञ सुदाय दोहो एना। नआँ सींड़ टेबो: इंगत अनेज रा: मने-मन रेय जोगो तडा। ⁵² ईसु कनहुनुऊँ अवुरीय हरा: दोहो एनु, अवुर भगवान अवुर होड़कू रा: मन पसंद तेय बडे: दोहो एनु।