लूका 4

ईसु राः परीछा

(मत्ती 4:1-11; मरकुस 1:12-13)

¹ ईसु पवितर आत्मा ते भरो केनते जरदन जोड़ वरिय मिड़ा: एना, हेंय पवितर आत्मा सुनहर जघा हनते गोःतेडिया चालीस दिन सुनहर जघा रेय दोहो एना, ² हेना तोलोग ईसु कनर मेनेय जोम बेड़ागाडा। चालीस दिन पुरो केनरे रँगेज तेडिया, हेन तोलोग सयतान पाप रे लोजोरिय लगाडीय अजमो सोताडिया।

³ हेना वरि सयतान हेंय थरेय कहनी तेडा, “अगर अम भगवान रेनिय होपोन हवे रेदो, न दिरीम कहनीवाँ रोटी बनोऊ।” ⁴ तहाँ ईसु जबाब वडिया, नआँ घयते भगवान राः कगद रे ओल केना ‘होड़कू सिरीफ रोटी ते एरो कू जियो एना ’।”

⁵ हेना वरि सयतान उसूल जघा रे हेंयूय गो:तेडा, अवुर तुरेत्ते सँवसार राः सींड़ राजीय ति:वाडिया। ⁶ अवुर कहनी तेडा, " नआँ राज राः सींड़ धन राः हाँकिंञ ओवा मिआँ; नआँ सींड़ इंञाः हाँय गाँथ रेआ, अवुर इंञ जेयूंञ बेसवआ हेंयूंञ एम सकोआ। ⁷ अगर अम इंञ मी मनो रेदो नआँ सींड़ अमा: हाँक होयाआ।” ⁸ हेना वरि ईसु हेंयूय जबाब वडा, भगवान राः कगद रे नआँ घयते हो ओलकेना कि : ‘अम अपन भगवान राः मी आराधना, सिरीफ हेनी राः सेवम सेवा,।”

⁹ तहाँ सयतान एरूसेलेम राः मंडिल रे, सींड़ वरि उसूल जघा रे इदी केडिय तेय कहनी वडिया, “ अगर अम भगवान होपोन हवे रेदो न वरिम ऊजू। ¹⁰ अमा: बारे ते नआँ याःते भगवान राः कगद रे ओलकेना, ‘अम बंचो लगड सरग वरि सरगदूत कुय कूला।’ ¹¹ अम कटाम रे दिरि ते अलो लोजोर टोवीजु: लगड सरगदूत कू हाथो हाथ तेकू तिला दरम मिआँ।” ¹² तहाँ ईसु जबाब वडिया, “नआँ घयते हो भगवान राः कगद रे ओलकेना : ‘अपे अपन भगवान अलोपे अजमोयू।’”

¹³ हेना वरि सयतान सींड़ या:तेय अजमो केडिय ते चलो यनु, तहाँ दावीय जोहो दोहो एनु।

ईसु सेसेवाय बोंहड़ी तेडा

(मत्ती 4:12-17; मरकुस 1:14-15)

¹⁴ हेना वरि फेर पवितर आत्मा राः बल ते भरो केनते ईसु गलील रेय मिड़ाः मेजेना, हेना वरि हेंय राः चरचा आस पास राः सींड़ जघा रे मिरिज एना। ¹⁵ हेना वरि हेंय हेंकू राः गिरजा ओड़ाः ते सिकछाय ओवाकू दोहो एनु, अवुर सींड़ होड़कू हेंय कू बडेय वडिया।

नासरत रे ईसु मेने कू बेस गडिया

(मत्ती 13:53-58; मरकुस 6:1-6)

¹⁶ हेना वरि ईसु असुल बडे तेडिय हेना, नासरत गाँव रेय मिड़ा: मेजेना, अवुर यहूदी कू रा: रिति रिवाज रा: अनुसार ते सब्द रा: दिन गिरजा ओड़ाः रेय सेनेना। अवुर कागद पढ़ो लगड ईसु चड़ाँ एना। ¹⁷ भगवान रा: टेबोः लाय हेनी असायाह राः कागद कू ओवाडियू , हेना वरि हेंय हेनेन जघाय पोटा:अ ञँम तेडा, हेना रे न घयते ओल केना।

^18-19 “परभु राः आत्मा इंञ थरे इदाना, गरीब होड़कू बढ़ियाँ: खभेर लाय वकु लगड इञींय चुनो केडा। अवुर गुलामी कू लाय वकू लगड अवुर अंधा कू एर ञेंल कू लगड, अवुर एटाः कुराः दाब ते खोट केनकू छडो, अवुर भगवान ञेंल मया केना हेना समय परचारे लगाडीय कुलकेडिञाँ।”

²⁰ हेना वरि हेंय कागद बन्द केते सेसेवाअय ती रेय एम गोत्तेडु, अवुरिय दुड़ूब यनु। गिरजा ओड़ाः रे दोहोएन कू सींड़ होड़कू हेंय कू ञेंल हाँड़िवाडिया। ²¹ हेना वरि हेंय हेंकू थरेय कहनी तेडा, “ भगवान राः कगद रे ओलकेना हेना, अपे अँजोमे तोलोग नआँ टेबोः तेनेसींञ मड़ंग पेरे उतरो यना।”

²² सींड़ होड़कू हेंय बडेय वडिया, अवुर हेंय बढ़ियाँ बढ़ियाँ टेबोईय टेबो: दोहो एनु, हेना अँजोम केते होड़कू अचरज यनकू तहाँ कू कहनियू , “एटागी उसुफ होपोन हवे।”

²³ हेंय हेंकू थरेय कहनी तेडा, “इंञ थरे नआँ कहावत जरूर पे कहनियाँ ‘एय बयेध अनाम मी चीकानू ! कफरनहुम रे जे काम मी काम केडा, हेना अले अँजोम केडा हेना काम अबु गाँव रेहोम तीबे।’”

²⁴ अवुर हेंय कहनी तेडा, “इंञ अपे थरे सही मेतेंञ कहनी यडा, कनय भगवान राः टेबोः लाय हेनी हो अपन गाँव रे आदर इजेत एरोय ञँमतेडा। ²⁵ उहयारेपे भगवान राः टेबोः लाय हेनी एलियाह रा: समय रे ची होया एना ? सड़हे तीन बारिस अँगम इसरायील देस रे दा: मेने उयू: गडा अवुर अकाल तडा। हेना तोलोग हेना देस रे अखीर एकल तनकू कोड़ी कू दोहो एना। ²⁶ भगवान हेना मेंडे कनय थरे एलिया मेनेय कुलगाडिया, सयदा रा: सारफत रे एकल तनाय कोड़ीहोन थरे भरिय कुलतेडिया। ²⁷ अवुर भगवान राः टेबोः लाय हेनी एलीसा रा: सयम रे हो, इसरायील रे अखीर बगरा कुड़गा रोगिया कू दोहो एना, हेना मेंडे रे कनाय मेने चिकन गना सिरिया देस रेनिय नामान भर चिकन एना।”

²⁸ तहाँ गिरजा ओड़ाः रेकू दुड़ूब तनकू, नआँ टेबो: अँजोम केते सींड़ होड़कू धको केनते कू मुर मुरो यनु। ²⁹ हेना वरि हेंकू रिमकेनते हेंय गाँव वरि बहेर हनते कू उडुंग गोत्तेडियू , अवुर जे बुरू रे हेंकू रा: गाँव बसो तना, हेंय हेन बुरू चोटीत वरि बिड केयते लोजोरिय लगड कू इदी तेडिया। ³⁰ तहाँ ईसु हेंकू मँझर वरिय उडुंग केनतेय चलो यनु।

मियाँ होड़ वरि भूतीय उडुंग तेडा

(मरकुस 1:21-28)

³¹ हेना वरि ईसु गलील जिला राः कफरनहुम सहर रेय सेनेना, अवुर सब्द रा: दिन रे होड़कू भगवान रा: बढ़ियाँ टेबोईय चेडकू दोहो एनु। ³² तहाँ हेंकू हेंय रा: टेबो: अँजोम केते कू अचरज यनु, हेंय रा: टेबो: रे हँक दोहो एना।

³³ गिरजा ओड़ाः रे मियाँ होड़ होड़ दोहो एना, हेंय थरे भूत लगो तना, ³⁴ हेंय अच्छा तेय हाक एना, “एय नासरत गाँव रेनिय ईसु अले थरे अमा: ची काम इदाना ? अम अले नास ले लगड मी मेजकेना किदो ? इंञ आमींञ पपाड़ीआ भगवान चुनो केडमीअय पवितर होड़ हवे।” ³⁵ तहाँ ईसु हेंयीय दबेट तेडिया, “ जपनो को:मी, अवुर नेय वरिम उडुंग चलोऊ ” तहाँ भूत हेंय सींड़ कू मड़ंग रे पटको केडिय ते बेगर नोकसान तेय उडुंग यनु। ³⁶ नआँ सींड़ ञेंल केड ते होड़कू अचरज यनु , अवुर अनाकू अनाकू कहनी ओड़ेंगू , “नेय रा: टेबो: रे तीमीन हँक अवुर सक्ति इदाना, भूत कुहो मेय रा: टेबो: कू मनो वेआ, अवुर कू उडुंग जोमा।” ³⁷ अवुर ईसु जे जेय करो तेडा, हेना आस पास सींड़ जघा रे मिरिज यनु।

पतरस हनहार अवुर एटा: होड़कू होय चीकन तेड कुआ

(मत्ती 8:14-17; मरकुस 1:29-34)

³⁸ तहाँ हेंय गिरजा ओड़ाः वरि रिमकेनते सिमोन ओड़ा: कू सेनेना। हेना रे सिमोन हनहार जार लेनता डिया, अवुर सींड़ कू हेंय चीकानिय लगड ईसु थरे कू अरजी एना। ³⁹ ईसु हेंय बंदे रेय चड़ा केनते जार केटेज अहा तेय कहनी वडू, तहाँ हेंय तुरेत तेय चिकन यनु, अवुर हेंय तुरेत ते रिमकेनते हेंकू सेवा तेडकू अयू।

⁴⁰ बेर डुबो: तोलोग जे जे ओड़ा: रे केय परकार ते हसु तनकू ईसु थरे कू इदी तेड कुआ, अवुर सींड़ होड़कू छुँवो छुँवो तेय चीकन तेड कुआ। ⁴¹ अवुर केय झन होड़कू थरे भूत कू लगो तन हेंकू सींड़कू वरि कू उडुंग एना, अवुर अहीज अहीज तेकू कहनियू , “अम भगवान होपोन हवे,” लेकिन हेंय हेंकुय दबेट कू अवुर मेनेय एनेम टेबो: वकू, कहेकि हेंकू पपाड़ी दोहो एनु किदो नेय मसीहा हवे।

गिरजा ओड़ाः तेय परचार तेडा

(मरकुस 1:35-39)

⁴² अखीर ञींदत ते ईसु हेना गाँव वरिय उडुंग केनते, सुनहार जघा हनते बिनतीः लगाडिय चलो एना। अवुर भीड़ कि भीड़ छपा छपा ते हेंय थरे कू मेजेना, हेना वरि कू ञँम केय तेकू हेंय थरे कू अरजी एना, किदो “अले बगी वते अलोम चलोऊ।” ⁴³ लेकिन हेंय हेंकू थरेय कहनी तेडा, “ एटा: एटा: गाँव सहर रेहो इंञ भगवान रा: राज रा: बड़ियाँ समाचार ललाय जरूरी इदाना, कहेकि इंञ नेन लगाडिय कुलके डिञाँ ।” ⁴⁴ अवुर हेंय यहूदी देस रा: गलील रा: गिरजा ओड़ाः रे अधिकार रा: साँथ तेय परचारे दोहो एनु।