लूका 5

ईसु चेला कुय चुनो तेडा

(मत्ती 4:18-22; मरकुस 1:16-20)

¹ एक दिन राः दिन रे ईसु गन्नेसरत रे अखीर लम्बा चवड़ाआ दाह अड़ी रेय चड़ाँ तन तोलोगू, होड़कू भगवान राः टेबोः अँजोम लगड कू ठेला ओड़ेंगू। ² हेना तोलोग हेंय बडेः दाह अड़ी रे बाटंग डोंगा कू चड़ाँ तडा हेनाय ञेंल ञँमतेडा, अवुर हकू ञेंड कू डोंगा वरि अगड़ू केनते जाल कू बुहल दोहो एनु। ³ हेन तोलोग ईसु सिमोन राः डोंगा रे रकब केनते अड़ी वरि दम भर राः मँझर हनते गोगे लगाडीय कहनी तेडा। हेना वरि डोंगा रेय दुड़ूब केनते सिकछाय ओवाकू दोहो एनु।

⁴ तहाँ हेंय टेबोः हनी केड राः बाद रे सिमोन थरेय कहनी तेडा, “ डोंगा गहीर गतर हनतेम इदीयू अवुर हकुकू बझहो लगड जाल मी अटाड़ू।” ⁵ तहाँ सिमोन जबाब तेडा, “ ठिके इदाना गुरू, इंञ रात भरींञ ञेंञेड एना, हेंडे रेहो मेनेंञ ञेंडगड कुआ, लेकिन अम कहनी यड रेदो जालींञ अटड़ यडा।” ⁶ हेना वरिय अटड़ तेड दो जाल घली ओडेजु: मेनमोट ते अखीर हकुकू बझहो एना। ⁷ हेना वरि हेंय एटा: डोंगा रेनकू गतीत कुहो सब देगय लगाडीय गविज वडकुआ। तहाँ हेंकू मेजेना,

हेना वरि बनाटंग डोंगा हकुकू ते एतना कू पेरज तेडा डोंगा घली डूबो बंचो एना,।

⁸ नआँ ञेंलकेते सिमोन पतरस ईसु कटा दुबी रे ऊकड़ूम केनतेय कहनी तेडा, “ए परभु , इंञ मड़ंग वरिम चलोऊ, इंञ दो पापी होड़ हवे।” ⁹ तहाँ हेंय अवुर गतीत कू, अखीर हकुकू सबताडा ञेंल तेकू अचरज यनु । ¹⁰ जबदी कोड़ा होपोन कींञ अकूब अवुर उहन्ना हो सिमोन सुदा कींञ दोहो एना, हेंकींञ होकींञ अचरज यनु । हेना वरि ईसु सिमोन थरेय कहनी तेडा, “ अलोम बोरू; अब वरि अम भगवान थरे होड़कुम आगा।” ¹¹ हेना वरि हेंकू डोंगा अड़ी रेकू अगतेडा, अवुर सींड़ चीज बगी वते ईसु सुदा कू चलो एना ।

कुड़गा रोगियाय चीकन तेडा

(मत्ती 8:1-4; मरकुस 1:40-45)

¹² जब ईसु मियाँ टंग सहर रेय दोहो एन तोलोग, हेना रे मियाँ होड़ कुड़गा रोगिया अखीर दोहो एन हेंय मेजेना, हेना वरि हेंय ईसु ञेंलकेते गोड़ीय गिरो केनतेय अरजी एना, “ओ परभु, अगर अम चोहो: रेदो इंञ मी सुध सकोआ ।” ¹³ हेना वरि तीतिय सुहरू केते हेंयूय छुयों तेडिया, अवुरिय कहनी तेडा, “ इंञ चहो: तना चीकानु: मी ।” हेना वरि हेंय राः कुड़गा रोग तुरेत ते छुटो यनु।

¹⁴ हेना वरि ईसु हेंयीय मतर तेडिया, “ कनय थरे अलोम लाय बेड़ायू, सींड़ कू मड़ंग रे सखिया गोवाह होयाः लगड हलिते सेनकोःते याजक मी ति:वा। कुड़गा वरि चीकानुअय लगड भगवान मूसा राः दोवारा ते नियामीय एम केडा, हेना राः उनसार ते पुजम एमू।”

¹⁵ लेकिन ईसु राः चरचा अनावुर मिरिज चलो एना, भीड़ उपर भीड़ हेंय राः टेबोः अँजोम अवुर अपन रोग वरि चीकानुः लगड होड़कू जवर एना। ¹⁶ हेंडे रेहो हेंय सुनहार जघा रे सेनको: तेय बिनती: दोहो एनु ।

लवका ञेंडताडिया हेंयूय चीकन तेडा

(मत्ती 9:1-8; मरकुस 2:1-12)

¹⁷ एक दिन एयसा होया एना कि जब ईसु सिकछाय ओवा कू दोहो एनु, हेना रे फरीसी कू अवुर नियम चेचेड हेंकू होकू दुडूब तना। नेकू गलील अवुर अहूदी देस राः सींड़ गाँव वरि अवुर एरूसेलेम वरि नेकू मेजताना। ईसु थरे होड़कूय चीकन लगड भगवान राः सक्ति दोहो एना । ¹⁸ कुछ होड़कू लवका ञेंडता डिय हेनी होड़ परकोम तेकू अकतेडिया, अवुर हेंकू हेंय भितर रे ईसु मड़ंग रे इदीय लगड कू एमेल तेमेलुः दोहो एनु। ¹⁹ हेंकू भीड़ राः चलते ते ईसु थरे मेने कू इदी सको गना, तहाँ सड़ीम अगस रे रकब केनते खपरा कू अड़ी तेडा। अवुर परकोम तू सुदा ईसु मड़ंग रेकू अगड़ू तेडिया । ²⁰ तहाँ ईसु हेंकू राः बिसवास ञेंलके तेय कहनी तेडा, “ ए मनवा, अमा: सींड़ पापींञ माफ गोत्तेडा ।”

²¹ हेना वरि फरीसी कू अवुर नियम चेचेड कू मन मन रेकू पसीदें दोहो एनु, “ नेय इया हवे भगवानीय निन्दा यडा ? भगवान छोड़ अवुर इया पाप राः माफी एम सको: तना ?” ²² ईसु हेंकू मन - मन रेकू पसींद तेड हेना पपाड़ी केनते हेकूय होंबोर तेडा, “ अपे इंञाः टेबोः रे न याःते ची लगड पे पसींद यडा?” ²³ अमा: पाप माफ यना मेनाआँ किदो, रिमको: तेम सेन बेड़ाऊ मेनाआँ ? न बनाटंग रे करा टेबोः सेथिया गिआ ? ²⁴ अपे पपाड़ी लगाडू इंञ होड़ होपोन धरती रे, पाप माफे लगड हो हँक इदाना ।” हेंय लवका ञेंडता डिया हेंय थरेय कहनी तेडा, “ इंञ अम थरेंञ कहनी यडा, रिमु: मी, अवुर परकोम तम अलगो केते ओड़ा: हनतेम चलोऊ ।” ²⁵ तुरेत ते हेंय सींड़कू मड़ंग रेय रिमेना, अवुर गितीज तनय हेना, परकोम अलगो केते भगवानीय बडेय बेड़ा वते, अनेज ओड़ा: हनतेय चलो एना। ²⁶ हेना वरि सींड़कू अचरज यन कू, अवुर भगवान कू बडेय वडू अवुर अखीर बोरो यन तेकू कहनी तेडा, “ तेसींञ अबु बडे: काम बू ञेंलकेडा !”

ईसु लेवी चेलाय बनो तेडिया

(मत्ती 9:9-13; मरकुस 2:13-17)

²⁷ हेना वरि ईसु बहेरीय उडुंग एना। अवुर लेवी मेनते कू ञुमू तडीय हेनी रोमी सरकार लगड मलगुजारी तिला अय नाका ओड़ा: रेय दुड़ूब तन तोलोगीय ञेंलवा डिया, अवुर हेंय थरेय कहनी तेडा, “ दाव इंञाअय चेलाम बनोः लगड इंञ सुदाम मेजुऊ।” ²⁸ तहाँ हेंय सींड़ चीज बगी वते ईसु तयोम तेय सेन तेडा।

²⁹ हेना वरि ईसु आदर भोजन लगड, लेवी ओड़ा: तुरे बडे: खावा पिवा लगाडीय रा:तेड कुआ। हेंय सुदा मलगुजारी तिला कुहो अवुर एटा: होड़कू हो, बगरा ते जोमु: कू दुड़ूब तना। ³⁰ हेना ञेंलके ते फरीसी कू अवुर फनारीसी कुराः नियम चेचेड कू, चेला कू थरे न या:ते कुरू बुसू केनते कू कहनी तेडा, “अपे मलगुजारी तिला कू अवुर पापी होड़कू सुदा ची लगड पे जोमु: - चरो: तना?”

³¹ हेना वरि ईसु हेंकूय जबाब वडा, “डाक्टर चीकन होड़कू लगड मेने, लेकिन हसू को:कू लगड जरूरत पड़ोआ । ³² इंञ बेगारींञ पापा मेनते पसींदे: कू इंञाः जरुरत कोवाआ, लेकिन इंञ पाप केडांञ मेनते पसींदेः कू लगड भगवान थरे पाप राः माफी असी वकू लगाडींञ मेजकेना।”

उपास रा: बारे ते ईसु कू होंबोर तेडा

(मत्ती 9:14-17; मरकुस 2:18-22)

³³ कुछ होड़कू ईसु थरे कू कहनी तेडा, “बतिसमाय एम हेनी उहाना रेनकू चेला कुदो हरदम कू उपास अवुर बिनती दरवारू: तना, अवुर फरीसी कुरेन कू चेला कुहो, लेकिन अमा:कू चेला कू जोमु: चरो: तनाकू।” ³⁴ हेना वरि ईसु हेंकू थरेय कहनी तेडा, “जब तक बरातियाकू सुदा दुल्हा दोहोनू, हेंकू अपे का: तेपे एर उपास कुआ ? ³⁵ लेकिन हेना दिन मेजुआ, जब दुल्हा हेंकू वरिय हिगरो गोगेया, हेन तोलोग हेंकू उपासुआ।”

³⁶  हेना वरि फेर ईसु हेंकू अवुर मियाँ टंग उदाहरड़ीय लाय वडकूआ, “कनय होड़ नवा: कपड़ा वरि ओड़ेज केते मरी: कपड़ा रे मेने कू टेपीया। नहीं तदो नवाआँ ओड़ेजुआ अवुर हेना टेपी मरीआ सुदा हो एरो सोभा एना। ³⁷ अवुर नवाआँ अंगुर रस मरीआ खाल राः झोला रे कनय मेने भरोवेआ, कहेकि अंगुर रस खाल राः झोला ओड़ेज केते एंडाआ अवुर झोला हो बरबदुआ । ³⁸ नवाआँ अंगुर रस नानावआँ खाल राः झोला रे भरो केते कू दोहोया । ³⁹ कनय होड़ हो मरीआ अंगुर रस ञुँके वरि नवाआँ मेनेय बेस वआ, कहेकि हेंय कहनियाँ मनारिआ बढ़ियाँ गिआ” मेनते ।