लूका 9

ईसु बारह झन पेरेरित कू अनेज राः खभेर लाय लगाडीय कुलतेड कुआ

(मत्ती 10:5-15; मरकुस 6:7-13)

¹ फेर ईसु बारह झन पेरेरित कू राःकेड कुते भूत कू उडुंग लगड अवुर रोगिया कू चीकन लगड सक्ति अवुर हाँकिय ओवड कू। ² अवुर हेंकू भगवान अपन होड़कू थरे राजे: हेना टेबोः परचार अवुर रोगिया कू चीकन लगाडिय कुल तेडकुआ। ³ हेना वरि ईसु हेंकू थरेय कहनी तेडा, “होर लगड कनर अलो पे सबजोमू न दो लाठी, झोला, रोटी, पेयसा, अवुर बबाटंग अंगा। ⁴ जेय ओड़ा: रेपे उतरोआ, हेना सहर वरि अनायीन चलो: मेन दिन हेनी ओड़ा: रेपे दोहोनु, अवुर हेनेन वरि पे बिदाऊ। ⁵ अवुर हेना गाँव रे कनय होड़ मेने कू आदर इजेत पेरे दो, चलो: तोलोग नेकू थरे गोवाही होया: लगड कटा पेराः धूड़ी पे कुटा अटू।” ⁶ हेना वरि हेंकू आस - पास ता: गाँव - गाँव ते होयोर बेड़ाः तिंग ते बढ़ियाँ: खभेर कू लाय तेडा, अवुर रोगिया कुकू चीकन तेडा।

हेरोदेस धको एना

(मत्ती 14:1-12; मरकुस 6:14-29)

⁷ गलील जिला रेनिय हेरोदेस राजा ईसु काम तड हेना अँजोम केतेय अक बको यनु। कहेकि कुछ होड़कू कहनी तेडा, उहाना बतिसमाय एमय गोजतन वरिय जियो रिमकेना। ⁸ अवुराःकू कहनी तेडा , “ नेय एलिय्याह हवे” अवुराःकू कहनीयू, “ पहिल पहिला: कू भगवान रा: टेबो: लाय हेंकू मेंडे रे कनय जियो रिमकेना।” ⁹ तहाँ हेरोदेस कहनी तेडा, “ उहाना भो: दोंञ एर पुजा तेडा, नेय इया हवे, हेंय रा: बारे तेंञ अँजोम यडा ?” अवुर हेंय ईसु ञेंल लगाडीय तरसो: दोहो एनु।

पाँच हजार होड़कुय खियो तेडा

(मत्ती 14:13-21; मरकुस 6:30-44; उहाना 6:1-14)

¹⁰ हेना वरि बारह झन पेरेरित कू मिड़ा: केनते हेंकू जे जे कू करो तडा, हेना सींड़ ईसु कू लाय वडू, तहाँ ईसु हेंकू अनेज सुदाय बतसयदा गाँव हनतेय गो:तेड कुआ। ¹¹ लेकिन होड़कू पपाड़ीयन ते हेंय कू ओतोंग तेडिया, अवुर हेंय एनेम सेनवड कुअय। ईसु भगवान राः राज राः बारे तेय चेडकू दोहो एनु, अवुर रोगिया कुय चीकन तेडा।

¹² हेना वरि अयूबु: तोलोग बारहो झन ईसु थरे सेनकेन तेकू कहनी तेडा, “ जवार केनकू होड़कुम कुल गोत्तेकू चरो गतर रा: गाँव रे सेनको:ते दोहोन लगड अवुर जोमे लगड कनर कनारा कू लहो जोमा, कहेकि अबु सुनहर जघा रेबुआ।” ¹³ तहाँ ईसु हेंकू थरेय कहनी तेडा, “ नेकू दो अनापे खियो कू, “ हेना वरि चेला कू कहनी तेडा, “ अले थरे पाँच गोटंग रोटी अवुर बाटंग हकू कींञ छोड़ अवुर कनर कोवाआ, नामेन होड़कू खियो लगड ले तिला अगुय किदो?”

¹⁴ लगभग नेकू पाँच हजार मेन मोट कोड़ाकू दोहो एना। तहाँ ईसु चेला कुतय थरेय कहनी तेडा, “ नेकू पचास - पचास रा: पन्ति तेपे एर दुड़ूब कू।” ¹⁵ हेंकू सींड़ कू हेनेन घयते कू एर दुड़ूब तेड कुआ। ¹⁶ हेना वरि हेंय रोटी अवुर हकू कींञ अलगो केते सरग हन तको केतेय धन्यावाद वडा, अवुर टुटका केते चेला कुय ओवाडा, अवुर हेंकू दुड़ूब तन कुकू परोस वडा। ¹⁷ तहाँ होड़कू जोम केनते कू बीयानू, अवुर चेला कू बारह छनवा कू हटींग अटा तेडा।

पतरस ईसु मसीह मेनतेय अपनो तेडिया

(मत्ती 16:13-19; मरकुस 8:27-29)

¹⁸ एक दिन ईसु मियाँ होड़ ते सुनहर जघा रेय बिनती: दोहो एनु। अवुर चेला कू हेंय सुदा कू दोहो एना, तहाँ ईसु हेंकू थरेय होंबोर तेडा, “ होड़कू इंञ इया मेनते कू अड़ींग वंञ तना ?” ¹⁹ हेना वरि हेंकू जबाब तेडा, “ उहाना बतिसमाय एमायू , अवुर कोई कोई एलिय्याह मेनते, अवुरा:कू कहनिय, पहिला:कू भगवान राः टेबोः लाय हेंकू मेंडे रे कनय जियो रिम केना।” ²⁰ हेना वरि हेंय हेंन कुय होंबोर तेडा, “ अपे इया पे अड़ींग वंञ तना ?” तहाँ पतरस लाय तेडा, “ भगवान कुलकेड मिआँ हेनी मसीहा हवे।” ²¹ हेना वरि हेंय चेतवन केडकू तेय कहनी वडकू “नआँ कनय थरे अलो पे लाय बेड़ायू।”

ईसु अनेज रा: मिरतू रा: बिसेय तेय लाय तेडा

(मत्ती 16:21-28; मरकुस 8:30-9:1)

²² ईसु कहनी तेडा, “ इंञ होड़ होपोन लगड जरूरी इदाना। अखीर ते दु:खींञ रिमा। अवुर अघुवा कू अवुर बड बडे याजक कू अवुर नियम चेचेड कू इंञ कू नहकारिञाँ। अवुर कू ञेंड गोजेञाँ, तहाँ तीसरा दिन रेंञ जियो रिमुआँ।”

ईसु तयोम ते सेने राः मतलोब

(मत्ती 16:21-28; मरकुस 8:30-9:1)

²³ हेना वरि फेर ईसु सींड़ होड़कू थरेय कहनी तेडा, “अगर कनय होड़ इंञ तयोम ते सेन गिसन पे रेदो, रोज दिन अनापेराः कुरूस रिमकेते इंञ तयोम तेपे सेने। ²⁴ कहेकि कनय होड़ अनेज राः जिवीतीय मोंहवा रेदो, हेंय इंञ सुदा दोहोन हेना जिनगीय गँवोंआ। अवुर कनय इंञ लगड जिवीतीय एमा, हेंय भगवान सुदा हमेसा दोहोना हेना जिनगीय ञाँमा। ²⁵ अगर कनय होड़ सींड़ चीज नआँ धरती रेय ञाँमे। अवुर अनेज रा: जीवीय गँवों रेदो ची फयदय ञाँमा ? ²⁶ कनय हो इंञ अवुर इंञा: टेबोईय गेव्वा रेदो, इंञ होड़ होपोन हो इनीञाँ: सोभा अवुर अपुंञ राः सोभा ते अवुर पवितर सरगदूत कुराः सोभा ते मेजुः तोलोग हेंकू सुदांञ गेवुआ। ²⁷ इंञ अपे थरे सही मेतेंञ कहनी यडा, नआँ रे चड़ाँ केनकू मेंडे कुछ होड़कू, एयसा इदान कुआ, भगवान राः राज अनायीन कू ञेंले मेन दिन एरो कू गोजेना।”

ईसु रा: रुप बदलो एना

(मत्ती 17:1-8; मरकुस 9:2-8)

²⁸ करीब - करीब आठ दिन राः बाद रे ईसु, पतरस, अकूब अवुर उहाना नेकू सुदा मियाँ ते बिनती: लगड बुरू रेय सेनेना। ²⁹ तहाँ ईसु बिनती: तोलोग चेहरात रा: रूप बदलो एना, अवुर हेंय राः कपड़ा पुंडी केनते लवको: दोहो एनु। ³⁰ अचाकते मूसा अवुर एलिय्याह नेकींञ बाहोड़ कोड़ाकींञ ईसु सुदाकींञ टेबोः दोहो एनु। ³¹ नेकींञ बनाहोड़ कींञ चमको: दोहो एनु। हेन तोलोग ईसु एरूसेलेम रे का: तेय गोजुआ, हेना रा: बारे ते ईसु थरे कींञ चरचय दोहो एनु। ³² तहाँ पतरस एडकू पेनेय होड़ अखीर गितीज गिसन कू दोहो एनु, हेना वरि कू गितीज यनु। जगो एन तहाँ ईसु चमको: घनी, मूसा अवुर एलिय्याह हेंय सुदा चड़ाँ तन तोलोग कू ञेंलवड किञाँ। ³³ तहाँ हेंय वरि मूसा अवुर एलिय्याह चलो: मेनते कींञ संबह तन तोलोग पतरस ईसु थरेय कहनी तेडा, “ ए मालिक, अले नआँ रे दोहोन लगड बढ़ियाँ गिआ। अले नआँ रे पेय टंग तम्बू ले बनोआँ, मियाँ टंग अम लगड, मियाँ टंग मूसा लगड मियाँ टंग एलिय्याह लगड, ची मेनतेय कहनी यडा हेना मेनेय पपाड़ी दोहो एनु।

³⁴ नेन या:तेय कहनीय तोलोग लिंबीर ते ऊकू गोत्तेड कू, तहाँ लिंबीर तिलतेड कुसी हेंकू बोरो यनकू। ³⁵ हेना वरि हेन लिंबीर वरि आवाज मेजेना, “ नेय इंञाअय कोड़ा होपोन हवे। इंञ चुनो केडीय हेनी हवे, नेय राः पे अँजोमू।” ³⁶ हेना आवाज बंद एन सी ईसु हेना रे मियाँहोड़ तेय बंचो यनु। तहाँ चेला कू जपनो यनु, अवुर हेना रे जो कुछ कू ञेंलतड हेना, हेंय रा: टेबो: अखीर दिन अँगम कनय थरे मेने कू लाय बेड़ा गडा।

भूत लगो तनय चोंडीजिय चीकन तेडा

(मत्ती 17:14-18; मरकुस 9:14-27)

³⁷ हेना ञींदावत हेंकू बुरू वरि अगड़ू एन सी अखीर होड़कू ईसु सुदा कू जुमो एना। ³⁸ अवुर हेन भीड़ वरि मियाँहोड़ बडे बडे तेय कहनी तेडा, “ ए गुरू अम थरे गोड़ींञ गिरो: तना, कोड़ा होपोनींञ थरेम दया: सी, इंञ कोड़ा होपोन मिनये टंग गिआ यू। ³⁹ हेंय थरे मियाँ टंग भूत अचाकते तेय झपटो जोमा, हेनाते हेंय अहीज बेड़ाअयू अवुर अखीरिय फेंड़गी बेड़ाआ। अहात ते गजा घलि उडुंग जोमा अवुर बड़ी मुस्किल ते नस - नस लुरू पुटू जोम रे हेंडेय अड़ागिया। ⁴⁰ भूत कू उडुंग लगड अमा: कू चेला कू थरेंञ गोड़े पय्याँ एना, लेकिन हेंकू मेने कू उडुंग सको गना।”

⁴¹ हेना वरि ईसु जबाब तेडा, “ ए, बेलूर अवुर अन बिसवास पीढ़ी रेनकू होड़कू इंञ तिमीन दिन अँगम अपे सुदांञ दोहोना, अवुर अपे रअंञ सहोआ ? कोड़ा होपोन मी नआँ रेम अगेयू।” ⁴² तहाँ हेंय मेनेजु: घनी भूत झपटो केनते ओतेत रे, पटको केडिय ते अखीरिय मुरकुटो तेडिय। तहाँ ईसु भूतीय दबेट तेडा, अवुर हेंय चोंडीज चीकन केडिय ते अपातीय जिमा वडा। ⁴³ तहाँ भगवान राः सक्ति ञेंलकेते सींड़ होड़कू अकबको यनु।

अनेज रा: मिरतू रा: बिसेय ते लाय तेडा

(मत्ती 17:22-23; मरकुस 9:30-32)

⁴⁴ ईसु राः चमत्कार ञेंलकेते सींड़ होड़कू अचरज यन तोलोग, ईसु अनेज रेनकू चेला कू थरेय कहनी तेडा, “ इंञा: टेबोः पे अँजोमू अवुर कहनी यड हेना ऊहयर तपे। इंञ होड़ कोड़ा होपोन दुसमन कुराआ ती रेकू जिमाञाँ।” ⁴⁵ ईसु कहनिय दोहो एनु हेना चेला कू मेने कू जेरे दोहो एनु। नआँ टेबोः रा: मतलोब हेंकू लगड उकू तना ते मेने कू जेर सको: दोहो एनु।अवुर हेंकू नआँ बिसेय ते होंबोरिय लगड बोर दोहो एनकू।

भगवान राः राज रे सींड़कू वरि बडे इया हवे?

(मत्ती 18:1-5; मरकुस 9:33-37)

⁴⁶ हेना वरि अबु मेंडे इया बडेआ ? मेनते चेला कू अनाकू होंबोर ओड़ेंग दोहो एनु। ⁴⁷ ईसु हेंकू राः मन राः टेबोईय पपाड़ीयानू। हेंय मियाँहोड़ चोंडीज अक्केड ते अनेज बंदेर रेय चड़ाँ तेडिया। ⁴⁸ हेना वरि हेंकू थरेय कहनी तेडा, “ नेय चोंडीज इंञ ञुँमू ते कनय अपनोवीय रेदो, हेंय ईंञींय अपनोआँ अवुर कनय हो ईंञीय अपनो रेदो, हेंय कुलके डीञाय अपुञींय अपनोआँ। अवुर अपे मेंडे रे जे होडींञ गिआ, हेनी सींड़ कू वरिय बडे गिआ।”

मेनेय बिरोध हेनी, अबु गतर रेया

(मरकुस 9:38-40)

⁴⁹ हेना वरि उहाना चेला तय ईसु थरेय कहनी तेडा, “ ए गुरु, अले मियाँ होड़ू अम ञुँमू ते भूत कू उडुंग तोलोग ले ञेंवाडिया। हेंय अबु खुड़हा रेनिय न लगे हेनातेले ईसका सोवाडिया।” ⁵⁰ तहाँ ईसु कहनी तेडा, “ हेंय अलोपे ईसका वयू , अपे मेनेय बिरोध हेनी अबु गतर रेया।”

सामरिया रेनकू ईसु कू बिरोघ तेडा

⁵¹ तहाँ ईसु सरग हनते रिम गोगेय रा: दिन पुरो: दोहो एनु, हेंय एरूसेलेम सेनु: लगाडिय तय तेडा। ⁵² हेना वरि ईसु अनेज लगड सामरिया गाँव रे, जघा तयार हतड़ लगड खभेर लाय कुय कुल मड़ंग तेडा। ⁵³ तहाँ एरूसेलेम हनते चलो: तना मेनाआँ, हेना गाँव रेनकू पपाड़ियन ते, हेंय अकू गाँव रे मेने कू इकम सेनगाडिया। ⁵⁴ नआँ ञेंलके ते चेला कू मेंडे रे अकूब अवुर उहाना कहनी तेडा, “ ए परभु, अम चहो: तन रेदो अले कहनी यडा, अगस वरि सेंगेल लोजोर को:ते हेंकू होड़कू नास गोते कू।” ⁵⁵ लेकिन ईसु तेरज केडकू तेय दबेट तेडकुआ, “ अपे मेने पे पपाड़ी तना, अपे थरे करा घिया: आत्मा इदाना। इंञ होड़ होपोन होड़कू राः जीव नासे लगड बेगारींञ मेजा, हेंकू रा: जीव बंचो लगाडींञ मेजकेना।” ⁵⁶ तहाँ हेंकू हेना वरि एटा: गाँव हनते कू चलो एना।

ईसु रेनिय चेला बनोअय होड़

(मत्ती 8:19-22)

⁵⁷ ईसु अवुर चेला कुतय चलो: दोहो एनु, हेन तोलोग मियाँ होड़ मेज केन ते ईसु थरेय कहनी तेडा। “ जहाँ - जहाँम सेनुआँ इंञ हो अम तयोम तेंञ सेनेआँ।” ⁵⁸ तहाँ ईसु हेंय थरेय कहनी तेडा, “ बुवा: लगड लात अवुर अगस तेनकू तितिज कू लगड तुका दोहोना, लेकिन होड़ होपोन लगड गितीज मेनहो जघा कोवाआ।”

⁵⁹ अवुर हेंय एटागी थरेय कहनी तेडा, “ इंञ तयोम तेम सेने।” तहाँ हेंय कहनी तेडा, “ ए परभु , पहिल ते अपुंञ हर लगड इकम गोडवंञ मी।” ⁶⁰ लेकिन हेंय फेरिय कहनी वडियू , “ आत्मिक रिती ते गोज केन हेंकू अकु रा: लास मी एनेम हरवा कू अमा: करतब हवे, सेनको:ते भगवान रा: राज रा: बारे तेम परचारे।”

⁶¹ तहाँ अवुर मियाँहोड़ कहनी तेडा, “ ए परभु, इंञ हो अम तयोम तेंञ सेनेआँ, लेकिन पहील ते ओड़ा: हनतेम इकम गोडवाञू, ओड़ा: रेनकू इंञ कू बिदा गोत्तेंञ लगाडू।” ⁶² हेना वरि ईसु हेंय थरेय कहनी तेडा, “ कनय होड़ नंगर मुठिया सबके ते, तयोम हनिय तको रेदो भगवान राः राज लयीक कोवाया।”