लूका 16

चलहाँकय बराहील

¹ हेना वरि हेंय चेला कू थरेय कहनी तेडा, “ मियाँ होड़ धनमान धन सम्पति देख - रेख लगड बराहिलीय रखो तेडा। हेंय बराहील रा: बारे ते होड़कू धन सम्पति तमिय उड़ो यडा मेनते धनमान कू लाय वडा। ² तहाँ धनमान बराहिलीय राःके डियतेय होंबोर तेडिया, “ नआँ ची घिया: टेबो: हवे, इंञ अमा: बारे तेंञ अँजोम यडा ? अमा: सींड़ काम रा: हिसाब - किताब मी ओवाञू, कहेकि अम इंञ थरे बराहील एरोम दोहो सको एना।

³ हेना वरि बराहील पसींद तेडा, ‘अब इंञ चींञ बनोआँ ? मालिकींञ बराहील काम वरि होय उडुंग यडिञाँ। हास पोड़ा: लगड जँगाड़ींञ हो कोवाआ, अवुर असी जोमु: होंञ गेवुआ। ⁴ इंञ जेर गोत्तेडंञु, इंञ चींञ ची: हेना, इंञ बराहील कमींञ बगीवा रेदो, होड़कू इंञ अपन ओड़ाः तेकू इदिञाँ कनारा जोमे लगड दोकू ओनोवाञाँ।’

⁵ तहाँ हेंय अनेज मालिक थरे कू करजा तन हेंकू मियाँड होंड़ - मियाँड होंड़ तेय राः केड कुते मड़ाँग:अयीय होंबोर तेडा, “अम थरे मालिक रा: करजा तिमीन इदाना।” ⁶ तहाँ हेंय कहनी तेडा, “ सव मन सुनुम, ” तहाँ बराहील हेंय थरेय कहनी तेडा, “ दुड़ूब को:ते अमा: परची रे तुरेत ते पचास मेनतेम ओल गोत्ते।” ⁷ हेना वरि एटागीय होंबोर तेडा, “ अम थरे तीमीन करजा इदाना ? हेंय कहनी तेडा, “ सव बोरा गोहोम, “ तहाँ बराहील हेंय थरेहोय कहनी तेडा, “ अपन परची रे तुरेत ते अस्सी बोरा गिआ मेनतेम ओल गोत्ते।”

⁸ “ मालिक हेंय जलकट होड़ चलाकी तेय काम केडा मेनाआँ तेय बडेय वडिया। कहेकि नआँ दुनिया रेनकू अपन काम वरि निपटो: लगड भगवान रेनकू होड़कू वरि हो अखीर कू हुसियारा। ⁹ इंञ अपे थरेंञ कहनी यडा, नआँ दुनिया रा: धन सम्पति ते, होड़कू पे मदद वते हेंकू अपन गति पे बनो कू। नआँ धन हनी: रे, सरग रे अपे खुसी तेकू मान मरजाद पेआ।

¹⁰ " कनय हो दम भरा: टेबो: रे इमानदारिय दोहोन रेदो, हेंय बडेआ टेबो: रे हो इमानदारिय दोहोना। अवुर कनय हो दम भराः टेबो: रेय ठकलबरा: रेदो, हेंय बडेआ टेबो: रे होय ठकलबराआ। ¹¹ हेना ते अपे दुनिया रा: धन सम्पति रे मेने इमानदार पे दोहो गना, दो सरग रा: धन सम्पति अपे इया जिमा वापेआ ? ¹² अवुर अपे एटा: कुराः धन सम्पति रे इमानदार मेने पे दोहो गना, दो अपे लगड सरग रे इदान हेना इया ओवा पेआ ?

¹³ “कनय हरवाह बा होड़ मालिक कींञ राः काम एरोय करो सको एना। कहेकि हेंय मियाँ होड़ सुदा परेमिय रखोआ, अवुर मियाँ होड़ एरोय बेस वडिया। अपे भगवान अवुर धन मियाँ मियाँ ते एरो पे सेवा सको एना।”

लोभिया फरीसी कू

(मत्ती 11:12-13)

¹⁴ हेना वरि धन सम्पति रे भरोसा कू रखो तआ, हेंकू फरीसी कू नआँ टेबो: अँजोम केते ईसु कू मजाक तेडा। ¹⁵ तहाँ ईसु हेंकू थरेय कहनी तेडा, “ अपे होड़कू मड़ंग रे बढ़ियाँ गिअंञ मेनते देखोटी पे तीबा। लेकिन भगवान अपे मन राः टेबो: घलीय पपाड़ीआ। नआँ दुनिया रेनकू होड़कू अखीर किमती गिआ मेनते कू पसींदेआ, हेना भगवान रा: नजेर रे बढ़ियाँ कोवाआ। ¹⁶ भगवान रा: टेबो: लाय हेंकू अवुर मूसा ओवाडा नियम उहाना अँगम दोहो एना। हेन वरि भगवान रा: राज रा: बढ़ियाँ: खभेर लाय यडा, सींड़ कू हेना ते सेने लगड कू कोसिस यडा। ¹⁷ अगस अवुर ओतेत मेटियोः सेथिया गिआ, लेकिन भगवान रा: टेबो: तेने मेन होडिंञाँ कनर चेका एरो मेटियो एना।

¹⁸ अवुर कनय होड़ अनेज इंगत कू बगी वते एटागी होड़ीहोन सुदाय बियाहु: रेदो, हेंय सुदा बयसा कामीय कामा अवुर कनय बगीवयाय कोड़ीहोन सुदाय बियाहु: रेदो, हेंय हो हेंय सुदा बयसा कामीय कामा।

धनी होड़ अवुर लाजर रा: उदाहरड़

¹⁹ “मियाँ होड़ अखीर धनमानिय दोहो एना, हेंय महंगा - महंगा तआ, कपड़ाय तुसींञ दोहो एनु। अवुर रोज दिन मान मनिसय जोम लिंबड़ दोहोनु अवुर मवोज मस्ती तेय दोहोन दोहो एनु। ²⁰ हेनी दुवार रे मियाँ होड़ लाजर मेनते कू ञुमू तडिय हेनी, घाव तेय खलखँदर तन हेनी धनमान होड़ दुवर रेय दोहोन दोहो एनु। ²¹ धनमान होड़ थाः सीत चिली तेय जोम कयासुः लगाडिय तरसो: दोहो एनु; अवुर कुतू कुहो हेंय घावतन हेना कू जड़ा: दोहो एनु।

²² “एक दिन राः दिन रे गरीब होड़ गोजेना, अवुर सरगदूत कू हेंय अबराहम दोहो एना रेकू इदी तेडिया। हेंय धनी होड़ होय गोजेना, अवुर कू हर तेडिया। ²³ अवुर नरक रे हेंय अखीर हहस तेय तड़पोः दोहोएनु। हेन तोलोग सगींञ रे अबराहामीय ञेंल ञँमतेडा। अवुर अबराहम बंदेर रे लाजर होय ञेंल ञँमतेडिया। ²⁴ तहाँ हेंय हाक एना, ‘अबराहम अपा, इंञ थरे दयाः मी, अवुर लाजर अंगरीत लोहा केते अलाँगींञ रे दाःते तेय जोरो कयासींञ लगड मी कुल गोत्तेयू। कहेकि इंञ नआँ सेंगेल रेंञ तड़पो: तना।’

²⁵ “हेन तोलोग अबराहम कहनी तेडा, ‘ओ बाबु उहयारेमु, अम अपन जिनगी रे सुखे - सुख रेम दोहो एना, अवुर हेना तोलोग लाजर अखीर दु:ख रेय दोहो एना। नेय नआँ रे सान्ति तेया अवुर अम बिपेत रेमा। ²⁶ नआँ दु:ख छोड़ अलींञ अवुर अम मँझर रे अखीर बडेआ मियाँ टंग गहीरा डोडहा इदाना, हेना ते कनय हो नआँ वरि अम हन सेन गिसन कुरे दो, एरो कू सेन सको एना, न मेना वरि अलींञ थरे एरो कू मेज सकोआ।’

²⁷ “तहाँ धनमान कहनी तेडा, ‘हेंडे रेदो ओ अपा, अम थरेंञ अरजी: तना, अम मेय इंञ अपुंञ ओड़ाः हनतेम कुल गोत्तेयू। ²⁸ कहेकि पाँच झन मगंञ एडकू इदाना। हेंकू थरे सेन को:ते लाजर नआँ टेबोईय चेतवन कू, ताकि हेंकू दु:ख सहो: हेना जघा रे अलो कू मेजुऊ।’ ²⁹ हेना वरि अबराहम धनमान थरेय कहनी तेडा, ‘हेंकू थरे मूसा अवुर भगवान रा: टेबो: लाय हेंकू रा: कागद इदाना, हेंकू हेन कुराः कु अँजोमा।’ ³⁰ तहाँ धनमान कहनी तेडा, ‘कोवानू, अबराहीम अपा, अगर कनय मियाँ होड़ गोजको: वरि जियो को:ते हेंकू थरेय सेनु: रेदो, हेंकू अपन पाप राः माफी असी केते भगवान हनते कू मिड़ाआ।’ ³¹ फेर अबराहीम हेंयीय कहनी वडा, ‘जब हेंकू मूसा अवुर भगवान रा: टेबो: लाय हेंकू राः मेने कू अँजोम यडा, दो गोजको: वरि जियो रिमको: कुरा: हो एरो कू अँजोम तेडा।’