लूका 17

ईसु माफी रा: टेबोईय लाय तेडा

(मत्ती 18:6-7, 21-22; मरकुस 9:42)

¹ फेर ईसु चेला कुतय थरेय कहनी तेडा, “ नआँ दुनिया रे होड़कू भगवान वरि अलग कू लगड पाप रा: परीछा मेज सकोआ। लेकिन पाप रे लोलोजोरय हेंय अखीर दु:ख रेय पड़ोआ ! ² जे होड़ नेकू होडहोडींञ कू वरि कनय मियाँ होड़ हो एर पाप केकू ते, भगवान वरि अलग कू रेदो, हेंय होड़ होटो: तुरे जनता चकी तोलके ते, समुन्दर रे अटड़ गोजेय हेना अखीर किलिस सजा घयते बुझोआ। लेकिन नआँ वरि हो भगवान बगरा सजाय ओवाया। ³ हेना ते इंञ अपे सँवचेती तेपे दोहोन लगाडींञ कहनी यडा।

“ कनय भाई पापे रेदो हेंय दबेट केयते पे समझो वियू, अवुर हेंय पाप वरि पसतो: रेदो माफीय पे। ⁴ अगर दिन भर रे सात छेव अपे रा: बिरूध रेय पापे रेदो, सातो छेव अपे थरेय मेज को:तेय कहनीयू, ‘ इंञ पाप केड हेना वरिंञ पसतो: तना’ मेनतेय कहनीय रेदो हेंय सातो छेव पे माफीयू।”

⁵ तहाँ पेरेरित कू परभु थरे कू कहनी तेडा, “ अम थरे बगरा ते बिसवासे लगड सहेतम ओवाले।” ⁶ परभु कहनी तेडा, “ अपे रा: बिसवास सरसों दाना मेन मोट दोहोन रेदो, ‘तुड दुबी 'पटु: को:ते समुन्दर रे सेन को:ते जड़ी चुवेरुऊ’ मेनते पे कहनी वा रेदो, हेना अपे रा: टेबो: अँजोम तेड मेनू।”

मियाँ होड़ हरवाह राः बुता

⁷ ईसु कहनी तेडा, “ मान ले अपे मेंडे कनय रेनिय हरवाह नंगारिय सी सी चहे भेड़ीं कुय चरो। अवुर जब हेंय खेत वरिय मेजुऊ, अपे हेंय थरे ‘तुरेत ते मेजु: सी लेटे जोम लगड दुड़ूब मी’ मेनते एरो पे कहनी तेडा किदो? ⁸ अवुर हेंय हँडेः तेय कहनियाँ, ‘इंञ लगड लेटेम इसीनू अवुर अनायिनींञ जोमु: - चरो: मेन दिन खियो पियो वींञ मी, हेना वरि तयोम ते अम होम जोमुऊ ?' ⁹ हरवाह कू जिमा वडकुआ काम काम हनीय रेहो मालिक हेंकू धन्यावाद एरोय ओवड कुआ। ¹⁰ नेन घयते अपे हो भगवान राः सींड़ टेबो: पे मनो रेदो, अपे नआँ या:ते पे कहनीयू, ‘अले आदर ञँम लायीक कोवा लेआ। अले दो हरवाह कू हवे, जे बुतम जिमा वड लेआ हेना भर ले बुता केडा।” ’

ईसु दस झन कुड़गा तनकूय चीकन तेडा

¹¹ ईसु सामरिया अवुर गलील जिला मँझर तेय एरूसेलेम हनतेय चलो: दोहो एनु। ¹² हेन तोलोग मियाँ टंग गाँव रेय बोल तोलोगू दस झन कुड़गा तनकूय ञँम तेडा। ¹³ हेंकू संगींञ वरि हाक केनते कू कहनी तेडा, “ ओ ईसु, ओ मालिक, अले थरेम दयाऊ !” ¹⁴ ईसु हेंकू थरेय कहनी तेडा, “ चलो: पे, सेन को:ते अपन देंह याजक कुपे ति:वा।” अवुर हेंकू चनालो: तोलोग कू सुध्द यनु।

¹⁵ हेंकू मेंडे रे मियाँ होड़ चीकन यनाञू मेना: पपाड़ी केनते, अच्छाते भगवान राः स्तुति तींग तेय मिड़ा: एना; ¹⁶ अवुर हेंय ईसु कटा दुबी रे उकड़ूम केनतेय धन्यावाद वडिया। नेय होड़ सामरी देस रेनिय दोहो एना। ¹⁷ तहाँ ईसु होंबोर तेडा, “ दसो झन मेने पे सुध्द गना किदो, फिर हेंकू नव झन करे कुआ ? ¹⁸ भगवान राः स्तुति लगड नेय एटागी जात छोड़ अवुर कनय मेने दोहो एना किदो ?” ¹⁹ तहाँ ईसु हेनी थरेय कहनी तेडा, “अम इंञ थरेम बिसवास तेडा, हेनातेम चीकन यना रिमको:ते चलो:मी।”

बिसवास

(मत्ती 24:23-28, 37-41)

²⁰ भगवान होड़कू थरे तिमीसीय राजेआ मेनते, मियाँ एस फरीसिकू ईसु कू होंबोर तेडा, हेना वरि ईसु हेंकूय लाय वडा,“ भगवान राः राज मेड ते ञेंलेआ हेना घयते मेन ञेंलुआ। ²¹ अवुर ‘अँजोम पे, भगवान राः राज अपे जीवी पेरे इदाना, हेना ते होड़कू न रेआ, मेना रेआ, मेनते एरो कू कहनी सको एना।”

²² हेना वरि फेर चेला कुताय थरेय कहनी तेडा, “ एयसा समय मेजुआ, अपे इंञ होड़ होपोन मेजु: हेना दिन ञेंले लगड पे पसींदेआ, लेकिन एरो पे ञेंल सको एना। ²³ इंञ होड़ होपोन मिड़ा: मेजयन मेनते अपे खभेर ञाँमुआ, ‘हेंय न रेया’ चहे ‘मेना रेया’ मेना: खभेर रे अलोपे बिसवासे, अवुर हेंकू तयोम ते अलो पे सेने। ²⁴ पिलकेडवा तोलोग सींड़ कुकू ञेंलेञाँ, हेन घयते इंञ होड़ होपोन मेजु: चेका सींड़ कुकू ञें लेआ। ²⁵ लेकिन हेना वरि पहिल ते इंञ होड़ होपोन अखीर दु:खींञ सहोआ, अवुर न जुग रेनकू होड़कू इंञ कू नहकारिञाँ।

²⁶ “जब इंञ होड़ होपोन फेरींञ मिड़ा: मेजु: रे, दुनियाँ रेनकू होड़कू थरे, नूह राः जबाना रे होया एना हेन घयते होयाआ। ²⁷ नूह जहाज रे अनायिनीय रकब मेन दिन होड़कू जोमु: चरो: कू अवुर बर - बियाहु: दोहो एन कू, तहाँ भरो एना अवुर कू बिलो यनु। ²⁸ अवुर लूत राः जबाना रेहो होड़कू जोमु: चरो: दोहो एनु। लेन - देनुऊ अवुर कू खेती बरीयू अवुर ओड़ाः कू बनो दोहो एनु। ²⁹ जे देवह सदोम देस वरि लूत उडुंग एना, तहाँ अगस वरि सलगोः हेना दिरी अवुर सेंगेल लोजोर केनते सींड़ कू भूरटो गोज तेड कुआ।

³⁰ “इंञ होड़ होपोन मेजु: चेका हो नेन घयते होयाआ। ³¹ हेना चेका कनय होड़ ओड़ा: वरि बहेर रेय दोहोन रे, कनारा समान उडुंग लगड भितर अलोय बोलो देरीऊ, नेन घयते कनाय खेत रे काम हेनी हो ओड़ा: हनते अलोय मिड़ाऊ। ³² लूत इंगत कू ची एनायू उहयार तपे, सदोम राः चीज उहयार केते तयोम हनतेय तको तेडा दो बुलुंग राः खुटाय बनो एना। ³³ कनय हो नआँ दुनियाँ राः जीवन बंचोवे मेनतेय पसींदेआ, हेंय अनेज राः जीव एरोय बंचो तेडा, अवुर कनय हो इञा: चलते ते जीवितीय गवों रेदो हेंय राः जीव बंचोआ। ³⁴ इंञ अपेंञ लाय वताना, हेना चेका बा होड़ मियाँ टंगाआ परकोम रेकींञ गितीज कोआ, मियाँ होड़ बगी अटु वया मियाँहोड़ रिम गोगेया। ³⁵ अवुर बा होड़ कोड़ी कींञ मियाँ तेकींञ ददाड़ोआ, मियाँ होड़ रिम गोगेया, मियाँ होड़ बगी अटु वया। ³⁶ अवुर बा होड़ खेत रेकींञ बुताआ, मियाँ होड़ रिम गोगेया अवुर मियाँ होड़ बगी अटु वया।

³⁷ नआँ अँजोम तेड सी हेंकू ईसु कू होंबोर तेडा।“ परभु न करे होयाआ?” हेना वरि ईसु हेंकू थरेय कहनी तेडा, जे जघा रे मड़ी-मटी दोहोना हेंडे, गीद कू जवारुआ।”