लूका 24

ईसु जियो एना

(मत्ती 28:1-10; मरकुस 16:1-8; उहाना 20:1-10)

¹ हपता राः सुरवात दिन एतवार चेका एक दम ञींदाते कोड़ी कू ईसु थरे सेन्ठ लगोवे लगड तयार तडा, हेना कू सबकेते मरघटी रेकू सेनेना। ² हेंकू मरघटी दुवर दिरी तेकू सींञ अटु तडा, हेना अड़ी तन तोलोग कू सेन ञँमतेडा। ³ हेना भितर रे बोलो एन दो परभु ईसु राः लास मेने कू ञँमगाडा। ⁴ तहाँ हेंकू न ञेंलके तेकू बोर दोहो एनु, अवुर अचा कते बाहोड़ चमकोआ कपड़ा तुसींञ केते हेंकू मड़ंग रेकींञ चड़ाँ यनु। ⁵ अवुर हेंकू बोरो यन ते आँख-मुह तुकू ओतेत हनते कू केटुब गोत्तेडू, तहाँ हेकींञ हेंकू थरे कींञ कहनी तेडा, “अपे गोजको: कुरा: जघा रे जियो रिमकेन हेनी ची लगड पे छपा बेड़ा यडिया? ⁶ हेंय ना रे कोवाया, हेंय दोय जियो रिमकेना। उहयारे पे, हेंय अपे थरे गलील जिला रेय दोहो एन तोलोगिय कहनी तेडा। ⁷ ‘नआँ जरुरी इदाना इंञ होड़ होपोन पापी होड़कू रेंञ एर पकड़ोआ, अवुर कुरूस रेकू ठोको गोजेञाँ, अवुर तीन दिन रेंञ जियो रिमुआँ।’ ” ⁸ तहाँ हेंकू ईसु कहनी तडा टेबोः कू उहयर तेडा।

⁹ हेना वरि मरघटी वरि हेंकू कोड़ी कू मिड़ाः केनते, गारह झन पेरेरीत कू अवुर एटा: कुहो नआँ टेबोः कू लाय वडकू। ¹⁰ मरियोम मगदल गाँव रेनिय, योअन्ना, अकूब इंगत मरियोम नेकू सुदा अवुर कोड़ी कू दोहो एना, नेकू पेरेरित कू थरे नआँ टेबो: कू लाय तेडा। ¹¹ लेकिन हेंकू राः टेबोः नेकू लँदा वडकू घयते कू बुझो तेडा, अवुर हेंकू राः टेबोः मेने कू सरि गडा। ¹² तहाँ पतरस रिमकेन ते मरघटी हनतेय हुंको चलो एना, अवुर कुबूंग केनतेय कोटे तेड दो, कपड़ा ते गुरघेट तडिय हेना भरिय ञेंल ञँमतेडा। अवुर जो कुछ होया तना हेना ञेंलकेतेय अकबको यनु, अविरय मिड़ाः चलो यनु।, अवुर ची होयाः तना मेनतेय पसींदे दोहो एनु।

इम्माऊस हनते चलो: तोलोग चेला कींञ थरे ईसु देखर एना

(मरकुस 16:12-13)

¹³ हेनेन चेका ईसु तयोम ते सेने दोहो एन हेंकू मेंडे रे, बाहोड़ इम्माऊस मेनते कू कहनी वआ हेना गाँव हनते कींञ चलो: दोहो एनु, हेना गाँव एरूसेलेम वरि लगभग ग्यारह किलो मीटर सँगीञ रे दोहो एना। ¹⁴ हेंकींञ नआँ होया तना हेना राः बिसेय तेकींञ बरता चलो: दोहो एनु, ¹⁵ अवुर हेंकींञ बरताऊ अवुर होंबोर ओड़ेंग तोलोग ईसु हो हेंकींञ थरे मेज केन ते हेंकींञ सुदाय सेनतेडा। ¹⁶ लेकिन हेंकीञ ईसु अलो कींञ चिन्होवीय लगड भगवान हेंकींञ राः नंजेरीय बंद तडा। ¹⁷ ईसु हेंकीञीय होंबोर तेडा, “ची टेबोः सेनयड तींग तेबा बरताः तना ?” तहाँ हेंकींञ मन उदास केनते कींञ चड़ाँ बगी यनु। ¹⁸ नआँ अँजोम केते हेंकीञ मेंडे रे मियाँ होड़ क्लियोपास मेनते कू ञुमू तडीय हेनी कहनी तेडा, “ एरूसेलेम सहर रे मेजकेन ते दोहोन तन हेंकू मेंडे रे अनाम भर दरवा दरवा बितो केना हेना टेबोः मेनेम पपाड़ी तना जहानू।”

¹⁹ हेना वरि ईसु हेंकीञींय होंबोर तेडा, “ची ची टेबोः ख ?” हेना वरि हेंकींञ ईसु थरे कींञ कहनी तेडा, “नासरत सहर रेनिय ईसु राः टेबोः हवे, नेय एयसा होड़ दोहो एना, जो कुछीय करो तेडा, अवरिय कहनिय दोहो एनु, हेना भगवान अवुर सींड़ होड़कू राः मड़ंग रे सींड़ कू वरि बडेअय भगवान रेनिय टेबोः लाय हेनी हवे, मेनाअय ती:वड कू दोहो एनु। ²⁰ बड-बडे याजक कू अवुर अबु रेनकू अधिकारी मिरतू दंड कू ओवय लगड एर पकड़ो केडीय ते रोमी सरकार थरे कू जिमा तेडिया, अवुर हेंकू कुरूस रेकू एर ठोको गोजतेडिया। ²¹ अले इसरायली रेनकू नेनी दुसमन कू वरि बंचो लेआ मेनते ले असरा तना। नआँ सींड़ घटना बितो केनते तीसरा दिन हवे। ²² अवुर तेसींञ एक दम ञींदा ते अले मेंडे रे कुछ कोड़ी कू मरघटी वरि सेन मिड़ाः केनते कू लाय अकबको गोत्तेड लेआ; ²³ हेंकू लास मेने कू ञँमगड दो हाँ: तेकू लाये दोहो एनु, अले सरगदूत कुले ञेंलवाडा, हेंकू लाय तेडा ईसु जिवत गिआ यू मेनते ! ²⁴ हेना वरि अना ले गतिकू मेंडे रे कुछ होड़कू मरघटी ञेंञेल कू सेनेना अवुर जेयसे कोड़ी कू लाय तेडा हेनेन घयते हेंकू हो लास मेने कू ञँमगाडा।”

²⁵ हेना वरि ईसु हेंकींञ थरेय कहनी तेडा, “ अपे तिमीन बोको होड़कू हवे ! भगवान रा: कगद रे भगवान राः टेबोः लाय हें कू जो कुछ कू ओल केडा, हेना रे बिसवासे लगड अपे तिमीन कठिन लगो: तना ! ²⁶ भगवान राः कागद रे हाँ:ते ओलकेना मसीहा दु:खीय रीमा अवुर बड़ा आदर इजेत राः साथ ते सरग रेय सेनुआँ।” ²⁷ हेना वरि ईसु मूसा अवुर भगवान राः टेबोः लाय हेंकू रा: कागद रे ओल केना दुबीत जेड़ीत वरि सींड़ भगवान रा: कागद वरि अनेज राः बिसेय ते ओल केना, हेना टेबोः राः मतलोब तुहो हेंकीञींय समझो तेडा।

²⁸ हेनेन तोलोग हेंकू गाँव कू तया: बंचोय दोहो एनु, तहाँ ईसु अवुर मड़ंग हनतेय चलोः तना मेनते कींञ अड़ींग एना। ²⁹ तहाँ हेंकींञ हाँ:ते कहनी केते कींञ टेको तेडिया, “अलींञ सुदाम दोहोनू, निहो दो अंधरा: तना, अवुर बेर हो मुलूक तेय डुबो यना।” हेना वरि हेंकींञ सुदा दोहोन लगड भितर हनतेय बोलो एना। ³⁰ हेना वरि हेंय हेनेन कींञ सुदा जोमु: लगाडिय दुड़ूब एना, तहाँ हेंय रोटी सबके ते भगवान धन्यावादीय ओवाडिया, अवुर टोविज केते हेंकीञींय ओवाड दोहो एनु। ³¹ तहाँ हेंकींञ राः नंजेर झीझयानू, अवुर हेन तोलोग हेंकींञ ईसु कींञ चिन्हो गोत्तेडियू, अवुर हेंय हेंकींञ नंजेर वरि फेरीय छपीत यनु।

³² हेंकींञ अनाकींञ-अनाकींञ कहनी ओड़ेग एना, “हेंय होर ते अलंग सुदाय बरता एना, भगवान रा: कगद रे करे ओल केना, हेना रा: मतलोब तुहोय समझो लंग दोहो एनु, दो अलँग अपन मन रे मेने लंग खुसी गन किदो ?” ³³ हेनेन तोलोग हेंकींञ रिमकेनते एरूसेलेम हनते कींञ मिड़ा: सेनेना, अवुर हेंकू गारह झन पेरेरित अवुर एटाः कुहो हेंकू सुदा जवर तन तोलोग कींञ सेन ञँमतेड कुआ। ³⁴ अवुर हेंकू हेकींञ बाहोड़ थरे कू लाय तेडा, “परभु सहिचो मेतेय जियो रिमकेना, अवुर सिमोन थरेय देखर एना।” ³⁵ तहाँ हेकींञ होर तेकू बरता एना हेना हेंकू कींञ लाय वडू, अवुर हेकींञ रोटी टोविज तोलोग का: तेकींञ चिन्हो तेडिया हेना होकींञ लाय तेडा।

चेला कुताय ईसु कू ञेंल तेडा

(मत्ती 28:16-20; मरकुस 16:14-18; उहाना 20:19-23; प्रेरितों के काम 1:6-8)

³⁶ नआँ घयते हेंकू कहनी यडु, हेनेन तोलोग परभु ईसु मसीह हेंकू बंदे रेय मेज चड़ाँ यनु अवुर हेंकू थरेय कहनी तेडा, “अपे सांति ञाँमुऊ:” मेनतेय जोहार वड कुआ। ³⁷ तहाँ हेंकू अक-बको यन तेकू बोरो तेडा, अवुर भूत ले ञेंलयाडा मेनते कू अड़ींग एना।

³⁸ हेना वरि हेंय हेंकू थरेय कहनी तेडा, “ची लगड पे बोर तना ? अपे अपन मन रे ची लगड मेने पे बिसवास यडा ? ³⁹ इंञ ती कटा रे छेदा केडा पे ञेंलू, इंञ ईसु हवे। इंञ छुयों सोंञ पे, कहेकि जेयसे इंञ थरे पे ञेंलयाडा घयते भूत कू थरे जील अवुर जाँग मेने दोहोना।” ⁴⁰ नेन घयते कहनी केते अनेज तीत कटातीय ती़:वड कुआ।

⁴¹ तहाँ हेंकू खुसी राः मार ते मेने कू सरि गडा, अवुर हेंकू अकबको यन दोहो एनु, तहाँ हेंकुय होंबोर तेडा, “अपे थरे ना रे जोमेआँ कनारा चीज इदाना किदो कोवाआ?” ⁴² हेना वरि हेंकू रपा: तडिया हकू टुटका कू ओवाडियू, ⁴³ अवुर हेंय तिला केते हेंकू मड़ंग रेय जोमतेडा। ⁴⁴ मियाँ घड़ी रे हेंय हेनेन कू थरेय कहनी तेडा, “इंञ अपे सुदा दोहोएन तोलोग नआँ घयतेंञ लाय तेडा, सही मेते जेतना टेबोः मूसा राः नियम अवुर भगवान राः टेबोः लाय हेंकू रा: कागद अवुर भजन सहिंता राः कागद रे इंञाँ: बिसेयते ओल केना, हेना सींड़ उतरोआ।” ⁴⁵ हेना वरि हेंय भगवान राः कागद रा: टेबोः जेरे लगड हेंकू बुदहीय ओवड कू दोहो एनु। ⁴⁶ अवुर हेनेन कू थरेय कहनी तेडा, “हाँ:ते ओल केना, मसीहा दुखीय रिमा, अवुर तीसरा दिन गोज केन कू मेंडे रेय जियो रिमुआँ, ⁴⁷ अवुर एरूसेलेम वरि बोहड़ीं केते सींड़ जात कू थरे हेनी ञुँमू ते मन बदलो रा: और पाप वरि माफी ञँमु: हेना रा: परचार होयाआ। ⁴⁸ अपे नआँ सींड़ टेबोः रा: गोवाही एम कू हवे। ⁴⁹ अवुर अँजोम पे, पवितर आत्मा एमेय लगड अपुंञ जबान केडा, हेना इंञ अपे हलीतेंञ ओवापेआ, अवुर भगवान वरि सक्ति अनायीन ञाँम मेन दिन नेन सहर रेपे दोहोनू।”

ईसु सरग हनतेय चलो एना

(मरकुस 16:19-20; प्रेरितों के काम 1:9-11)

⁵⁰ तहाँ हेंय एरुसलेम वरि बयतानियाह गाँव अँगामिय गो:तेड कुआ, अवुर हेंय अनेज ती सुहरू केते हेंकू आसीसिय ओवड कुआ, ⁵¹ अवुर आसीसिय ओवड कुसी ईसु हेंकू वरिय अलग यनु, अवुर हेंकू रा: देखते देखत भगवान सरग हनतेय रिम गो: तेडिया। ⁵² तहाँ हेंकू धन्यावाद वडियू अवुर अखीर खुसी केनते एरूसेलेम हनते कू मिड़ा: मेजेना। ⁵³ अवुर हेंकू रोज दिन मंडिल रेकू जवर को:ते भगवान राः कू स्तुति महल रेकू दोहो एना।