Yesus man nangbini Samaria
3:22-36
4
Urakng-urakng Parisi dah nangngar, kadeꞌ Yesus labih manyak namu murit man maptis dari pada Yohanes. 2 Padahal sabanarnya Yesus babaro inaꞌ maptis, tapi murit-murit-Nya nang maptis. 3 Gara-gara hal koa Ia pun ningalatn propinsi Yudea man mulakng agiꞌ kaꞌ propinsi Galilea.4 Tapi Ia arus ngalintasiꞌ daꞌerah Samaria. 5 Lalu sampelah Ia kaꞌ sabuah kota nang badama Sikar kaꞌ propinsi Samaria, samak tanah nang di Yakup mareꞌatn deꞌe kaꞌ anaknya Yusup.a 6 Diꞌkoa ada sumur Yakupb. Yesus kalatihatn kaꞌ pajalanan koa, lalu Ia duduk kaꞌ tapi sumur koa. Ari koa kurang labih jam dua balas siakng. 7 Lalu ataknglah nangbini Samaria tagah nyenokaꞌ aiꞌ. Kata Yesus kaꞌ ia: “Bareꞌ de aku aiꞌ cocok.” 8 Jukut murit-murit-Nya dah ampus kaꞌ kota koa mali makanan. 9 Nangbini Samaria koa bakata kaꞌ Ia: “Aku heran! Kitaꞌkan urakng Yahudi ngahe mintaꞌ aiꞌ cocok kaꞌ aku urakng Samaria?” (Jukut urakng Yahudi inaꞌ bagaul man urakng Samaria).c 10 Sahut Yesus: “Sakiraꞌnya kao nauꞌan pamareꞌ Allah man sae Aku nang mintaꞌ aiꞌ cocok kaꞌ kao, pasti kao mintaꞌaꞌ aiꞌ cocok kaꞌ Aku. Man Ia mareꞌaꞌ aiꞌ kaidupatn kaꞌ kao.” 11 Kata nangbini koa kaꞌ Ia: “Kitaꞌ inaꞌ bapansenok man sumur nian miah dalapm; dari mae Kitaꞌ namuaꞌ aiꞌ idup koa? 12 Yakup eneꞌ uyut kami, mareꞌ kami kolam nian. Ia babaro naap aiꞌ cocoknya kaꞌ dian; lekoa ugaꞌ anak-anaknya man ayamannya. Ahe keꞌ Kitaꞌ mikir Kitaꞌ labih bakoasa dari Yakup?” 13 Lalu sahut Yesus: “Tiap urakng nang nyocok aiꞌ dari kolam nian kaausatnnaꞌ agiꞌ. 14 Tapi sae jaꞌ nang nyocok aiꞌ nang Ku-bareꞌ kaꞌ ia, ia inaꞌ aus agiꞌ salama-lamanya. Tapi sabaliknya aiꞌ nang Ku-bareꞌatnnaꞌ kaꞌ ia, jajiaꞌ mata aiꞌ nang ngalir kaꞌ dalapm diriꞌnya. Mata aiꞌ koa mareꞌaꞌ idup nang salamanya kaꞌ ia kaꞌ koa.” 15 Nangbini koa bakata kaꞌ Yesus: “Kadeꞌ lekoa, bareꞌlah aku aiꞌ koa. Jaji aku inaꞌ aus agiꞌ man inaꞌ palalu mulakng kaꞌ dian agiꞌ untuꞌ naap aiꞌ.” 16 Kata Yesus kaꞌ ia: “Ampuslah, saruꞌ lakinyu man mulaknglah kaꞌ keatn.” 17 Sahut nangbini koa: “Tapi aku inaꞌ balaki.” Sahut Yesus kaꞌ ia: “Sidi banar katanyu kadeꞌ kao inaꞌ balaki. 18 Jukut kao dah suah soteꞌ tidur man lima urakng nanglaki. Tapi nanglaki nang idup man kao ampeatn bukeꞌlah lakinyu.” 19 Kata nangbini koa: “Ampeatn aku baru sadar kadeꞌ Tuan saurakng nabi. 20 Eneꞌ uyut kami nyambah Allah kaꞌ panamukng nian. Tapi kitaꞌ urakng Yahudi madah kadeꞌ Yerusalem tampat urakng-urakng arus nyambah Allah.” 21 Sahut Yesus: “Weꞌ pucayaꞌlah kaꞌ Aku, waꞌtunya atakngngaꞌ, kadeꞌ kitaꞌ nyambahaꞌ Allah Apaꞌ bukeꞌ kaꞌ panamukng nian ato kaꞌ Yerusalem. 22 Kitaꞌ urakng Samaria nyambah Allah nang inaꞌ kitaꞌ kanal sedangkan kami urakng Yahudi nyambah Allah nang kami kanal, barang kasalamatan atakng dari bangsa Yahudi. 23 Tapi waꞌtunya atakngaꞌ man dah atakng ampeatn, urakng-urakng nang banar-banar nyambah Allah Apaꞌ, nyambahaꞌ Ia man koasa Roh-Nya man ajaran nang banar. Urakng-urakng nang nyambah lekoalah nang di Apaꞌ maoꞌiꞌ. 24 Allah koa Roh, jaji sae jaꞌ nang nyambah-Nya arus nyambah-Nya man kuasa Roh Kudus man ajaran banar dari Allah.” 25 Nangbini koa bakata: “Aku nauꞌan kadeꞌ Mesias nang disabut Karistus, Raja Panyalamat koa atakngngaꞌ. Kadeꞌ Ia atakng, Ia ngesahatnnaꞌ samua hal kaꞌ kami.” 26 Lalu Yesus bakata kaꞌ ia: “Akulah Mesias koa, nang tagah ngomong man kao ampeatn.”
27 Waꞌtu murit-murit dari kota mulakng kaꞌ Yesus, ia kaꞌ koa kaheranan neleꞌ Yesus tagah ngomong man saurakng nangbini. Tapi inaꞌ saurakng pun nang batanyaꞌ kaꞌ nangbini koa: “Uweꞌ, ngagoꞌ ahe kitaꞌ kaꞌ dian?” Ato pun batanyaꞌ kaꞌ Yesus: “Ahe nang Kitaꞌ ngomongkatn man nang bini koa?” 28 Lalu nangbini koa ningalatn tapayatnnya diꞌkoa man bajalatn capat-capat mulakng kaꞌ kotanya man bakata kaꞌ urakng-urakng diꞌkoa: 29 “Injeꞌ, neleꞌ urakng nang madahatn sigana ahe nang dah kumanjawat deꞌe. Kamungkinan Ia koa Karistus, Raja Panyalamat?” 30 Jaji urakng-urakng kaꞌ kota koa pun ampus neleꞌaꞌ Yesus.
31 Waꞌtu nangbini Samaria koa masih kaꞌ kota, murit-murit-Nya bakata kaꞌ Ia: “Paꞌ Guru, injeꞌ diriꞌ makatn” 32 Tapi Yesus bakata kaꞌ ia kaꞌ koa: “Kaꞌ Aku ada makanan nang inaꞌ kitaꞌ tauꞌatn.” 33 Jaji murit-murit-Nya batanyaꞌ-tanyaꞌ sekoꞌ man nang lainnya: “Ahe keꞌ ada urakng nang ngincangan Ia makanan?” 34 Yesus bakata: “Makanan-Ku, manjawat kamaoꞌan-Nya nang ngiripm Aku man nyalasaiatn pakarajaatn nang di-Nya mareꞌatn kaꞌ Aku. 35 Inaꞌ keꞌ kitaꞌ bakata: ampat bulatn agiꞌ sampe mosem bahanyi? Tapi Aku bakata kaꞌ kitaꞌ: teleꞌlah sakulilikngnyu man teleꞌlah uma-uma nang dah kuning man dah masak untuꞌ dianyi. 36 Urakng nang bahanyi dah mulaiꞌ narimaꞌ upahnya man ngomoꞌan urakng-urakng nang ngampuꞌ idup nang sabatolnya man idup nang salamanya. Jaji ampeatn, nang nanam man nang bahanyi sama-sama karepoatn. 37 Banarlah pakataan urakng-urakng nian: ‘Nang saurakng nanam, nang lain agiꞌ bahanyi.’ 38 Aku nyuruh kitaꞌ ampus nganyi uma nang bukeꞌ kitaꞌ ngarajaatnnya. Urakng lain nang ngarajaatnnya, man kitaꞌ atakng nganyi asil pakarajaatn dangan.”
39 Rami urakng Samaria dari kota koa pucayaꞌ kaꞌ Yesus, barang nangbini koa basaksi: “Ia nang madahatn kaꞌ aku, sigana ahe nang dah kumanjawat deꞌe.” 40 Takaꞌ urakng-urakng Samaria koa batamu man Yesus, ia kaꞌ koa mintaꞌ kaꞌ Yesus biar Ia badiapm man ia kaꞌ koa. Jaji Yesus badiapm kaꞌ diꞌkoa dua ari lamanya. 41 Man ajaran-ajaran Yesus manjawat siaꞌ manyak urakng nang pucayaꞌ. 42 Urakng-urakng kaꞌ koa bakata kaꞌ nangbini koa: “Kami pucayaꞌ, tapi bukeꞌ agiꞌ di ahe nang nyu ngataatn. Kami pucayaꞌ kaꞌ Ia takaꞌ kami dah nangngar-Nya babaro man kami nauꞌan kadeꞌ Ia nang nyalamatatn sigana talino.”
Yesus mulakng agiꞌ kaꞌ propinsi Galilea
4:43-45
43 Dah lakaꞌ dua ari Yesus badiapm kaꞌ kota Sikhar propinsi Samaria, Ia mulakng agiꞌ kaꞌ propinsi Galilea. 44 Yesus babaro dah bakata kadeꞌ saurakng nabi inaꞌ dihormatiꞌ kaꞌ tampat asalnya babaro.d 45 Tapi takaꞌ sampe kaꞌ Galilea, urakng-urakng kaꞌ koa nyambut-Nya, barang ia kaꞌ koa dah neleꞌ samua hal nang dah Nya ngarajaatn kaꞌ Yerusalem kaꞌ gawe Paskah urakng Yahudi koa.e
Yesus nyamuhatn anak pagawai istana
4:46-54
(Mat. 8:5-13; Luk. 7:1-10)
46 Lalu Yesus mulakng agiꞌ kaꞌ Kota Kana kaꞌ propinsi Galilea, kaꞌ kota koa Yesus suah nyajiatn aiꞌ biasa jaji aiꞌ anggur.f
Man kaꞌ kota Kapernaum kaꞌ samak kota Kana koa, ada saurakng pagawai istana nang anaknya tagah sakit. 47 Takaꞌ ia nangngar kadeꞌ Yesus dah atakng dari propinsi Yudea kaꞌ propinsi Galilea, ampuslah ia kaꞌ Yesus lalu bapintaꞌ biar Ia ampus man nyamuhatn anaknya barang anaknya koa amper mati. 48 Tapi Yesus bakata kaꞌ pagawai istana man urakng diꞌkoa: “Kadeꞌ kitaꞌ inaꞌ neleꞌ tanda man hal-hal ajaip nang luar biasa, kitaꞌ inaꞌ pucayaꞌ.” 49 Pagawai istana koa bakata: “Tuan capatiꞌlah ampus man aku sanapeꞌ anakku mati.” 50 Tapi sahut Yesus kaꞌ ia: “Pulaknglah anak kitaꞌ dah samuh.” Urakng koa pucayaꞌ kaꞌ pakataatn Yesus, lalu pulakng. 51 Kaꞌ tangah maraga, palayan-palayannya atakng kaꞌ ia man nyampeatn kabar: “Anak kitaꞌ dah samuh.” 52 Ia batanyaꞌ kaꞌ palayan-palayan koa jam sangahe kamudaꞌ koa samuh: “Kira-kira jam satu siakng tumareꞌ dongoꞌnya ilang.” 53 Lalu apaꞌ kamudaꞌ koa taringat kadeꞌ kaꞌ waꞌtu koalah Yesus bakata: “Anak kitaꞌ samuh.” Jaji pagawai istana koa man samua kaluarganya pucayaꞌ kaꞌ Yesus.
54 Koalah hal ajaip nang kadua nang di Yesus manjawat kaꞌ Galilea takaꞌ Ia pulakng dari Yudea.