Yéso angi ka Yɛusalɛ́ma
( Ɔna phɔtɔ Mat 21.1-11; Lóka 19.28-40; Yoáni 12.12-19)
11
1 Bii Yéso na bagoigi nɛkɛ bábhiimisi Yɛusalɛ́ma, ande gea te nci á na Bhɛtɛphágɛ na Bhɛtanía bhíbhí á mamba á Mijɛitúni, Yéso áǒteka bagoigi nɛkɛ babɛ, 2 áǒgea: «Gǎni ka nji nde a mosá anu. Bo ye okidia kó, bondhondande mponjo á mponda na bám'bɔi, nkpa na kákambimbɛ mɔnɔ gǔ akɛ. Nkodani bómbhikɛ ně koni. 3 Cɔ, aobá́ nkpa n'anoúsi gea: ‹Bogi bo ka bo?› Ngodeani te: ‹Mɔkɔta ana siki á kambea gǔ akɛ, ansikisande oani kɛ̌kɛ nde.›»4 Báoga, báondhonda mponjo á mponda ka ntanga, na bám'bɔi bhíbhí á kǐo, báonkoda. 5 Ka bakpa nde dábatú oa, báǒbuisia te: «Boonkoda mponda ndɔ ka bo?» 6 Báǒsikisia bíndɔ Yéso dɛ́tɔ̌mi. Mpɔ, bakpa ndɔ báobeekea, bángɛ ně. 7 Bii bámbhikii ye Yéso na mponda ndɔ, báobhisa ngɔ́mbɛ́ nɛbɔ gǔ akɛ, mpɔ Yéso áoikidia ua. 8 Bakpa básii, báɔɔyia ngɔ́mbɛ́ nɛbɔ k'aphe, bunɛngbo gǎkɛ kasa nde dábateni na cikob. 9 Bakpa bunde dábatú otamba mosá á Yéso, na bunde dábatú mbusa akɛ, báoemba akpɛ gea,
Obhebhɔ oo!
Bosegi ka mmbe abhiki k'ina á Mɔkɔta.
10 Bosegi ka kidia á koboamɛ ndea tatasu Dhaúdhi.
Obhebhɔ átaiɛ na kobha! c
11 Yéso áokidia ka Yɛúsalɛ́ma. Akidi ye, áongia sub'endu á Mokonga. Aɔɛnjia kema bhui ko. Bii esa agɔgɔmani gǎkɛ, áojuana, áoja na Bhɛtanía, kimoci na bagoigi nɛkɛ nkama na babɛ (12).
Yéso asɛmɛigi me
( Ɔna phɔtɔ Mat 21.18-19)
12 Abi ye mama i, bii Yéso na bagoigi dábatú otoka na Bhɛtanía, Yéso áokwa na nja. 13 Aɔɔna danga, kasa á me nde báɔɔphana tinid. Áoga kɔɔnjia bhíbhí nga, dátúoúbha te agɔmbi. Akidi ye, â tɔ ɔɔna kasa kanga á mbuka nga, dákátú matu á gɔmba i. 14 Mpɔ, Yéso áongodea me ndɔ te: «Nkpa káeɛka ye tanda mbuka akɔ.» Bagoigi báɔɔka sɛmɛaga ndɔ.
Yéso ěbiigi basombisigi nkumba subi á endu ndea Mokonga
( Ɔna phɔtɔ Mat 21.12-17; Lóka 19.45-48; Yoáni 2.13-22)
15 Mbusa, Yéso na bagoigi nɛkɛ, báokidia ka Yɛusalɛ́ma. Yéso áongia k'endu ndea Mokonga, áǒbeaga basombisigi na basombigi-nkumba. Aokpungbumisaga mɛja ndea baanganisigi-bangɔae, na mbata ndea basombisigi-bamboe. 16 Dáoimisia gea ka bakpa bákakumbɛ nkumba na nyɛ́nya ně ka ntanga á endu ndea Mokonga. 17 Mpɔ, áɔ̌phɛa be: « Subi á buku Mokonga agǐe,
‹Báɔphanande endu nɛmɔ, endu ɛ́mɛmi á Mokonga ka batɔa ka nji bhui.› Cɔ, benu bókóketi u k'ɔma á ɛsɔmɛanaga á bakukubaf?» 18 Bii batobei-phɛa bangbóngbó na baphangigi-ɛɔphi báɔki ye bo, báokaba aphe sina nde bámoande Yéso kau. Nga, dábatú om'banga Yéso ka nyɔngɔ nde, bɔphɛi nɛkɛ dɛ́bɔngɛi usɛsɛ á bakpa básii phɛ̂. 19 Abi ye ɔgɔgɔ, Yéso na bagoigi nɛkɛ báotoka ka kenombe ndɔ.
Yéso aogoisaga nyɔngɔ á ɛmɛmi
( Ɔna phɔtɔ Mat 21.20-22)
20 Mama i kam'bimba, bii Yéso na bagoigi dábatú ɔnyɛ́nya k'aphe, báɔɔna me ndɔ Yéso dásɛmɛigig n'aɔmi na migi akɛ bhui. 21 Mpɔ, Pɛ́tɛɛ áokanisia bii Yéso dánsɛmɛigi me ndɔ. Aongodea te: «Mphangigi, enga phɔ me ndɔ ɔnsɛmɛigima, aɔmi bhuakɛ pɔ!» 22 Mpɔ Yéso áǒngodea bagoigi te: «M'beekeani Mokonga. 23 Nenongodi doni, aobá́ nkpa n'angodi mamba nde, áogea: ‹Toka wa, óguiɛ subi óbenge.› aobá́ na nna na ngaka ka měma akɛ n'abeeki gǎkɛ te, boabhi nɛkɛ atɔtɔkɛanande, abande tɔ bo. 24 Ka bondɔ unge nenongodi te, aobá́ na bɔɔmɛma kema, beekeani gea te, bo ye tɔ ně nga, Mokonga anophande. 25 A phɔtɔ oba na bomame ka mɛma á Mokonga, na bona nyɔngɔ na nkpa, ímani bojede nde banogi ně ka gea te, Abhanu mmbe a na kobha áimɛ phɔtɔ bojede nɛnu. [ 26 Cɔ, agǎkɛ oba na bókóoíma bojede nde bakpa bánogi ně Abhanu mmbe a na kobha káímɛku tanda bojede nenuh]»
Ianaga ka nyɔngɔ á cina á kɔkɔta ndea Yéso
( Ɔna phɔtɔ Mat 21.23-27; Lóka 20.1-8)
27 Mbusa, Yéso na bagoigi nɛkɛ, bâ goto oga na Yɛusalɛ́ma. Bii Yéso dátú otamba ka ntanga á endu á Mokonga, bakɔta á batobei-phɛa, baphangigi-ɛɔphi na bagbɛga, báombhikia Yéso, 28 báomuisia te: «Ka kɔkɔta sina nde ɔɔtɔtɔkisa kema nde? Ani mmbe akophi kɔkɔta ndɔ?» 29 Yéso áǒsikisia: «Nenoúsiande tɔ musiɔ moci. Bo yé omosikisia, mpɔ néonoúbhisa cina á kɔkɔta nde nɛɔtɔtɔkisa na kema ndɔ. 30 Ani mmbe amophi Yoáni M'batisi kɔkɔta á batisa? Kɔkɔta ndɔ atoki na kobha? Atoki ka bakpa? Cɔ, ómosikisiani!» 31 Mpɔ, báoianaga ngǔngu abɔ, báogea: «Aoba na begi, atoki na kobha, yɛ asoúsiande te: ‹Bókóm'beeki ka bo?› 32 Aoba na begi gǎkɛ atoki ka bakpa, kabɛ anja.» Nga, usɛsɛ á bakpa bɔbhu dábatúoúbha gea te, Yoáni ande mɔtu-nyɔngɔ doni. 33 Ka bondɔ, báonsikisia Yéso: «Békéoúbha.» Mpɔ, Yéso áǒngodea te: «Eme gǎkɛ, kénongodeɛku cina á kɔkɔta nde nɛɔtɔtɔkisa na kema ndɔ.»