Yéso aogoisaga nyɔngɔ á keyé k'eyamani
( Ɔna phɔtɔ Mat 19.1-12; Lóka 16.18)
10
1 Yéso atoki ye oa, áoga ka nji nɛngbo á Yudhɛ́a kubhi á Yɔɔdháni. Kó, usɛsɛ á bakpa bâ goto odhondana bhíbhí akɛ, áokpanga goto goisaga bíndɔ dáɛmbani ně. 2 Oa, ka baPhaisáiɔ báombhiimisia ka tombaga akɛ. Bɔ, báomuisia be: «Ɛɔphi nɛsu asosi gea mǒko án'yɛ nkakɛ?» 3 Yéso áǒsikisia: «Ɛɔphi ndea Mósa anososi bo?» 4 Báogea: «Mósa dásosi dundua á baobá́ á keyé, mpɔ mǒko áon'ya nkakɛa.» 5 Yéso â gǎkɛ ǒngodea te: «Mósa dánodundui ɛɔphi ndɔ ka nyɔngɔ á mɔ̌ anu akpɛ. 6 Ka nkpangeɔ á conja á mokonda, Mokonga dánconji mǒko na nkeb. 7 Ka nyɔngɔ indɔ unge, mǒko antoande abhakɛ n'amakɛ, báojukana na nkakɛ. 8 Bɔbhu babɛ bâ ye tɔ kobá nyama moci, ka ubhisa gea te, báná ye bakpa babɛ, a ye gǎkɛ nkpa moci. 9 Cɔ, nnde Mokonga ajukanisi, bakpa bákakatanisɛmbɛ.» 10 Mbenɔ nde dábátú ye k'endu, bagoigi bâ goto omuisia Yéso ka nyɔngɔ ndɔ. 11 Mpɔ, áǒsikisia: «Aoba nkpa n'an'yé nkakɛ, áomuka bangbo, agi ndiu iɛbɛ ka phɔa á nke mmbɔ á mosá. 12 A gǎkɛ oba nke n'atoki k'eyamani, áoga ɔɔmana, ámbé agi iɛbɛ.»Yéso ebhisii baniki njaga
( Ɔna phɔtɔ Mat 19.13-15; Lóka 18.15-17)
13 Mbusa á wa, báombhikia Yéso na baniki babhɔbhɔa ka gea, yɛ ébhisiɛ njaga. Bagoigi bâ gǎkɛ ǒimisia. 14 Yéso aɔni ye bo áɔbɛa, áǒngodea te: « Ódeketani baniki bábhɔbhɔa bábhikɛ mɔtɛmɔ. Bókǒimisiɛmbɛ nga, koboamɛ ndea Mokonga andiu á bakpa bunde bákengeani na bɔ. 15 Nenongodi doni gea, mmbe kábeeki nyɔngɔ á koboamɛ ndea Mokonga bea miki abhɔbhɔa, kángiɛku tanda kó. » 16 Mpɔ, Yéso áǒkotoa baniki ndɔ, áobhisa njaga gǔ abɔ.
Yéso aɔyɔngaga na ntɔi moci
( Ɔna phɔtɔ Mat 19.16-30; Lóka 18.18-30)
17 Mbenɔ nde Yéso dámɛi tamba nɛkɛ, nkpa moci áombhikia mbangɔ, áongbukia muanku, áomuisia: «Mphangigi anjanja, negeɛ bo, nebɛ na enda á mɛyɔ?» 18 Yéso áonsikisia te: «Ɔmɔɔphani Ntɔa-anjanja ka bo? Mokonga sasa akɛ tɔndɔ aámbé aanjanja. Nkpa nna gǎkɛ anjanja. 19 Cɔ, oúbha ɛɔphi ndee:
Kómoɛmbɛ nkpa,
kótunganɛmbɛ,
kóúbɛmbɛ,
kón'yɔngɛɛ mɔnɔ nkpa mbɛa,
kóndhemɛgɛmbɛ nkpa,
m'banga abhakɔ, n'amakɔc.»
20 Nkpa ndɔ, áonsikisia Yéso te: «Mphangigi, dékpangi amba ɛɔphi ndɔ bhui ka koniki ani.» 21 Yéso áonenga, áonkonda phɛ̂. Aongodea: «Ouki tɔ kema moci: Gǎ, ósombisɛ kema bhui nde o ne, ɔ́bhɛdɛ bangɔa i, óbophɛ batɔa-buyɛnɛ, mbusa i, obande n'ɛtɔi ásii na kobha. Mpɔ bhika, ómobeɛ.» 22 Nkpa ndɔ aɔki ye nyɔngɔ ndɔ, áophinda kiki, áoga n'abɛi nga, dátú n'ɛtɔi ásii phɛ̂.
23 Mpɔ Yéso áǒenga bagoigi nɛkɛ nde dábantimbi, áǒngodea te: «Aa! Aákpɛ ka batɔi ngia abɔ ka koboamɛ ndea Mokonga.» 24 Ka nyɔngɔ á boabhi ndɔ, bagoigi báoyayama. Yéso â goto ǒngodea te: «Eya, baniki amɔ ngia ka koboamɛ ndea Mokonga aákpɛ! 25 Cɔ, nna akpɛ ka ngamia ngia akɛ k'aphɛ á muphe, bíndɔ aákpɛ ka ntɔi ngia akɛ ka koboamɛ ndea Mokonga.» 26 Bagoigi bâ goto oyayama phɛ̂, báouisianaga: «Cɔ, nkpa sina mmbe aamande ka měma?» 27 Yéso áǒenga jaa! Áǒgea: «Ka bakpa, kátɔtɔkɛanɛku, tɔndɔ mɔtɛ á Mokonga. Nga, kema bhui a gǎkɛ aɔtɔtɔkɛana mɔtɛ akɛ.» 28 Mpɔ, Pɛ́tɛɛ áongea: «Cɔ, besu bedeketi kema bhui ka nyɔngɔ á bea akɔ.» 29 Yéso áonsikisia te: «Eya! Nenongodi doni gea, nkpa nde adeketi endu nɛkɛ, bamunamakɛ, baaoakɛ, amakɛ, abhakɛ, banakɛ na ciko nɛkɛ, ka nyɔngɔ ani na ka phɔa á Mbino Anja, 30 Mokonga amophande goto kema ndɔ bhui mɔngɔ mia moci (100) ka matu nde be phɔ́tɔ oenda, kabɛ endu, bamunamakɛ, bawakɛ, bamakɛ, banakɛ na ciko, abande phɔtɔ na tambaga. Mpɔ, ka matu nde abhikaeka, abande na enda á mɛyɔ. 31 Bakpa básii bunde ba k'esa nde gǔ á badhabɔ, bábande kusi abɔ na bunde ba kusi, bábande gǔ.»
Yéso aɔtɔ̌mia ka mɔngɔ á ko isaɔ nyɔngɔ á kukwa na jujuka akɛ ka kukwa
( Ɔna phɔtɔ Mat 20.17-19; Lóka 18.31-34)
32 Yéso na bagoigi nɛkɛ bátoki ye oa, báotaia na Yɛusalɛ́ma. Yéso áɔ̌mɛɛa mosá. Bagoigi nɛkɛ báoba na kɔbɔbɔkɔ. Bakpa nde dábatú ǒbea, báobanga phɛ̂. Yéso â goto ɔ̌bhɛda bagoigi nɛkɛ nkama na babɛ (12), áokpanga tɔ̌mia abɔ nyɔngɔ nde atɔtɔkɛanande ka phɔakɛ. 33 Aǒgea: «Cɔ, betái na Yɛusalɛ́ma. Kó, eme Muna-Nkpa bámobhisande ka njaga á batobei-phɛa bangbóngbó na baphangigi-ɛɔphi. Bátenande nyɔngɔ á kukwa ani, báomobhisa ka njaga á bakpa nde báná baYúdha. 34 Bɔ, bámotondeande, báomosuia soki, báomobinda na gbutu, báomomoa. K'esa á ko isaɔ mbusa i, néojujuka ka kukwa.»
Ɛmɛmi á Yakɔ́bɔ na Yoáni ka Yéso
( Ɔna phɔtɔ Mat 20.20-28)
35 Mbusa, Yakɔ́bɔ na Yoáni bana-Jɛbhɛdháiɔ, báobhika bhíbhí á Yéso báongea: «Mphangigi, bekondi ɔ́tɔtɔkisɛ kasu ɛmɛmi nde bɛkɔmɛmande.» 36 Yéso áǒgea: «Kema sina nde bokondi nɛ́tɔtɔkisɛ ka phɔanu ?» 37 Báonsikisia: «Mbenɔ nde obande ka koboamɛ nɛkɔ á boombia, beekea gea ka besu moci áikɛ ka njaga akɔ á mǔku na moci ka njaga á nkei.» 38 Yéso áǒngodea: «Bókóúbha kema nde bɔmɛmi. Cɔ, bɔtɔkande noa ka kibɛ nde nenoande na bophiphiande bánobatisɛ k'obatisɔ nde bámobatisanded?» 39 Báonsikisia te: «Bɛtɔkande.» Mpɔ, Yéso â gǎkɛ ǒgea: «Ande doni! Bonoande ka kibɛ ndɔ nenoande na phiphia óbatisɔ nde bámobatisandee. 40 Ka nyɔngɔ á ika ka njaga ani á mǔku kabɛ njaga ani á nkei, nna gǎkɛ eme aámbé nena kɔkɔta i. Ɔma ndɔ andiu tɔ ka bakpa nde Mokonga aebɔngisiigi.»
41 Bagoigi nɛngbo nkama (10) báokpanga ɛ́bɛ̌a Yakɔ́bɔ na Yoáni bii báɔki ye bo. 42 Mpɔ, Yéso áɔɔbɔphana bɔbhu áǒgea te: «Boúbha bii baamɛ á ka mokonda nde, báɔbhɛdaneaga kɔkɔta nɛbɔ akpɛ gǔ á bakpa nde bákusi abɔ na bii bai-nji báǒtambisaga bakpa na kɔkɔta nɛbɔ. 43 Cɔ, nna gǎkɛ bo sɔsɔbɛ anu. Mmbe akondi ábɛ mɔkɔta sɔsɔbɛ anu, ábɛ ndiu mbhɛdanigi nɛnu, 44 mmbe aokonda bá mɔkɔta nɛnu, ábɛ nkɔbɛ á benu bɔbhu. 45 Nga, eme Muna-Nkpa, kébhiki ka gea bakpa bámɔbhɛdaneɛgɛ. Nebhiki ndiu ka bhɛdaneaga abɔ na bhisa á enda ani k'ophendɔ ka amisa á bakpa básii.»
Yéso anamisi keímeíme Bhaatimáiɔ
( Ɔna phɔtɔ Mat 20.29-34; Lóka 18.35-43)
46 Mbusa á oa, báokidia ka Yɛíkɔ. Yéso na bagoigi nɛkɛ, kimoci na usɛsɛ á bakpa dábaotabanga kenombe ndɔ. Ka juana abɔ, keímeíme moci ina akɛ Bhaatimáiɔ, muna Timáiɔ dáiki ka mpɛphɛ á aphe n'aɔmɛmaga. 47 Bii aɔki ye gea, Yéso ntɔa na Najalɛ́ti aámbé aɔnyɛ́nya, áokpanga yɔnga n'ɛsɔ akpɛ: «Yéso mosuko á Dhaúdhi o! Ómokuia ngomi!» 48 Bakpa básii báonkeea, ka gea te áphɔngɛ. Yɛ, â gǎkɛ otetemisa yɔnga akpɛ phɛ̂: «Mosuko á Dhaúdhi o! Ómokuia ngomi!» 49 Yéso áomama, áogea: «Mɔphanani.» Báɔmɔphana keímeíme, báongea: «Cɔ, bhisa měma akɔ, ómesia, áɔkɔɔphana!» 50 Keímeíme áophuia bhɔngɔ nɛkɛ á gǔ, áǒjukumisa, áoga kubii Yéso aɔ. 51 Mpɔ, Yéso áomuisia te: «Cɔ, okondi negeɛ ka phɔakɔ bo?» Keímeíme áonsikisia te: «Mphangigi, nekondi nɛ́ɔnaphɛ goto.» 52 Yéso áongodea: «Gǎ, beekea nɛkɔ akoamisi.» Kɛ̌kɛ ndɔ, â goto ɔɔnapha, áom'bea Yéso k'aphe.