9
1 Mpɔ, Yéso â phɔtɔ ǒngodea te: «Nenongodi doni, ka bakpa nde bá oani, bákákuɛku na bákáɔni koboamɛ ndea Mokonga bii akidiande na bukpɛkpɛ.»Ékětia á keongi á Yéso
( Ɔna phɔtɔ Mat 17.1-13; Lóka 9.28-36)
2 Mbusa á b'esa ngia á njaga (6), Yéso áɔmbhɛda Pɛ́tɛɛ, Yakɔ́bɔ na Yoáni. Áɔ̌sɔndɔɛa gǔ á mamba nde akoi. Báoba sasa abɔ. Oa, keongi á Yéso áǒketia mosá abɔ. 3 Bhɔngɔ nɛkɛ â phɔtɔ ophenuaga, áoba abhu phɛ̂. Bhuumana i, bákáɔnimbɛ mɔnɔ kau ka mokonda ndea. 4 Mpɔ, bagoigi báɔ̌bɔna Ɛlía na Mósa na báoabha na Yéso. 5 Ka bondɔ, Pɛ́tɛɛ áongodea Yéso te: «Mphangigi, aánjá ka besu ika á oa. Bɛ́phɛkɛ ngbangba isaɔ, moci k'ɔbɛ, moci ka Mósa, moci goto ndea Ɛlía.» 6 Pɛ́tɛɛ dákáubhi nnde ayɔngi nga, yɛ na badhakɛ, dábatú na kɔbɔbɔkɔ phɛ̂. 7 Mpɔ, egugu áɔbhika, imbiɔ i áǒgbukumia. Báɔɔka ɛsɔ n'aotoka subi i gea: «Mmbe ande miki nɛmɔ ékondi, mɔ̌kani yɛ.» 8 Kɛ̌kɛ ndɔ, bagoigi báotimanaga, bákámɔ̌nɛ ye nkpa bangbo, bâ tɔ ɔmɔ̌na Yéso, n'ajigi ye tɔ sasa akɛ na bɔ. 9 Na bá phɔ́tɔ odhidha mamba, Yéso áɔ̌phɛa bagoigi gea, bákantɔmiɛ mɔnɔ nkpa kema ndɔ báɔni na ka bii yɛ Muna-Nkpa ajujukande ka kukwa. 10 Bagoigi báoamba nyɔngɔ ndɔ. Mpɔ bâ gǎkɛ ousianaga: «Yɔnga imbɔ á jujuka ka kukwa, ana kantíti sina?»
11 Mpɔ, báomǔsia Yéso: «Eke nde baphangigi-ɛɔphi bági te, Ɛlía abhikande phɔ mosáb?» 12 Yéso áǒsikisia te: «Eya, Ɛlía abhikande phɔ́ k'aphe á bɔngisiaga goto ánja kema bhui. Cɔ, eke nde buku á Mokonga adigimisi phɔtɔ gea te, eme, Muna-Nkpa, netambagande ásii, báomotondeac? 13 Nenongodi ndiu gea, Ɛlía a ye kidi, bakpa bâ gǎkɛ ogea kema bhui ka phɔakɛ bíndɔ dábakondi. Nndɔ dátú bíndɔ buku á Mokonga ayɔngi ka phɔakɛd.»
Yéso anamisi miki n'ana kukwa á bansombo
( Ɔna phɔtɔ Mat 17.14-21; Lóka 9.37-43a)
14 Bii Yéso na bagoigi ndɔ basaɔ bábhiki ye bhíbhí á badhabɔ bagoigi, báɔɔna usɛsɛ á bakpa na báetimbi. Baphangigi ɛɔphi dábatú opua n'abɔ. 15 Bii usɛsɛ á bakpa ndɔ bámɔ̌ni Yéso, báoagatana, báobhika mbangɔ ka sesea akɛ. 16 Yéso áǒbuisia bagoigi nɛkɛ te: «Boopua n'abɔ ka nyɔngɔ eke?» 17 Mpɔ, nkpa moci sɔsɔbɛ á usɛsɛ á bakpa áonsikisia Yéso te: «Mphangigi, nekobhikii na miki nɛmɔ nga, ana kukwa á bansombo á ko kauma. 18 Ɔma bhui nde kukwa ndɔ aontena, áomaka ka odo, phuu áonjuanaga miki, áoea minyɔ, nyama akɛ áotendemana. Netóengodi bagoigi nɛkɔ báephuiɛ bansombo ndɔ, bákátɔkɛ.» 19 Yéso áǒngodea te: «Ɔɔ, benu ɛbɔkɔti á kanga a beekea nde ca! Ka mbenɔ kungaani nde neikande na benu? Ka mbenɔ kungaani nde nenophiphiande? Cɔ, mbhikani kani na miki ndɔ.» 20 Báombhika na yɛ mɔtɛ á Yéso. Miki ndɔ amɔ̌ni ye Yéso, kɛ̌kɛ ndɔ bansombo báonsuga miki akpɛ phɛ̂, áogua ka odo, áɔ̌gɛngɛaga na phuu n'aonjuanaga. 21 Yéso áomuisia abha-miki ndɔ te: «A ye iphi na kukwa nde?» Abha-miki áonsikisia te: «Kukua nde ankpangi ka koniki. 22 Mɔngɔ ásii, dátú phɔtɔ ontenaga bo, áomaka ka nsa, na subi á ibo gea, ákuɛ. Cɔ, a gǎkɛ oba n'ɔtɔkande ka kema, beodengemisigi, ósokuia ngomi na ósoengɛ.» 23 Yéso áonsikisia te: «Ogi te, aobá́ n'ɔtɔkande ka kema ka bo? Cɔ, kema bhubhui aɔtɔtɔkɛana ka nkpa nde ana beekea.» 24 Kɛ̌kɛ ndɔ, abha-miki áoyɔnga akpɛ gea te: «Eya, nebeeki! Omoenga ka ngaka nde ne phɔ́tɔ ně.»
25 Yéso áɔ̌bɔna usɛsɛ á bakpa n'aoyamea. Ka bondɔ, áǒkea bansombo, áǒgea: «Benu bansombo á ko kauma na bunde á kanga ɔkapha nde ca! Nenososi, juanani subi á miki nde. Bókósikiɛmbɛ ye ka yɛ.» 26 Bansombo ndɔ báonsuga phɛ̂, áokoga. Mpɔ, báotoka subi akɛ. Nyama á miki ndɔ áotendemana bea nkpa n'aku, bakpa báokanisia te aku. 27 Yéso â gǎkɛ ɔmbhɛda ka njaga, áomesa. Miki áomama. 28 Yéso áoja mɔtɛ akɛ, bagoigi nɛkɛ báomuisia ka mpɛphɛ: «Nyɔngɔ sina nde besu békétɔtɔkisi phuia á bansombo subi á miki nde?» 29 Yéso áǒsikisia te: «Nkókó á bansombo ndɔ bánáotoka kanga á mɛma á Mokonga.»
Yéso atɔ̌mi goto nyɔngɔ á kukwa na jujuka akɛ ka kukwa
( Ɔna phɔtɔ Mat 17.22-23; Lóka 9.43b-45)
30 Bátoki ye oa, Yéso na bagoigi nɛkɛ báɔmɛɛa, báɔnyɛ́nyɛa ka Galiláiae. Dábage ka bɔsɔmɛa, ka nyɔngɔ nde Yéso dákákondi gea bakpa báúbhɛ. 31 Cɔ, nyɔngɔ nde Yéso dáǒgoisaga bagoigi nɛkɛ aunge: «Eme, Muna-Nkpa, bámongisande ka njaga á bakpa bunde bámomoande. K'esa á ko isaɔ mbusa á kukwa ani, ne jujukande.» 32 Bagoigi dábáká gǎkɛ oengekisa kantíti á yɔnga ndɔ. Báobanga usia akɛ.
Ani mmbe abande gǔ á badhakɛ?
( Ɔna phɔtɔ Mat 18.1-5; Lóka 9.46-48)
33 Mbusa, báokidia ka Kapɛɛnaúmu. Báoika subi á endu. Mpɔ Yéso áǒbúsia bagoigi nɛkɛ te: «Botú ɔyɔngaga k'aphe gǔ eke?» 34 Bagoigi bâ gǎkɛ ɔphɔnga nga, dábatúopua k'aphe gea te: «Ani mmbe a gǔ á badhakɛ?» 35 Mpɔ, Yéso áoika ka odo, áɔ̌bɔphana bagoigi nɛkɛ nkama na babɛ (12)f, áǒngodea te: «Aoba nkpa n'aokonda bá mɔkɔta, abande nkɔbɛ á bɔbhu, ɛ̌bhɛdaneagande bɔbhu.» 36 Mbusa, Yéso áɔm'bhɛda miki abhɔbhɔa, áomesa sɔsɔbɛ abɔ dhɛ! Áonkotoa, áǒgea: 37 «Nkpa nde ansesi miki abhɔbhɔa bea mmbe, ka nyɔngɔ á ina ani, amosesi eme. Cɔ, nkpa ayé omosesea, kámosesi tɔ eme, ansesi phɔtɔ mmbe amoteki.»
Nkpa nde nna m'bibia á Yéso ande ka bakpa nɛkɛ
( Ɔna phɔtɔ Lóka 9.49-50)
38 Mbusa á oa, Yoáni áongodea Yéso te: «Mphangigi, bɛmɔ̌ni nkpa moci n'aobeaga bansombo k'ina akɔ, bě gǎkɛ onimisia, nga yɛ nna ka besu.» 39 Yéso â gǎkɛ ongea te: «Kónimisiɛmbɛ. Nga, nkpa nn'aɔtɔtɔkisa ketangaɔ k'ina ani, mbusa i, áɔyɔnga ajede ka phɔani. 40 Ka bondɔ, aobá́ nkpa na nna m'bibia nɛsu, ámbé a ndiu nkpa nɛsu.»
41 «Aoba nkpa n'anophi kibɛ moci á ibo á konoa ka nyɔngɔ nde bonde bakpa ndea Kiísito, nenongodi doni gea, nkpa ndɔ kaukɛku ophendɔ nɛkɛ.»
Bókóngiɛmbɛ ka bojede
(Ɔna phɔtɔ Mat 18.6-9; Lóka 17.1-2.)
42 A gǎkɛ oba nkpa n'abhisi ephiphi ajede gea te, ka baniki bunde bámobeeki bábɛtɛkanɛ kau, akeni bám'bɔɛɛ nkpa ndɔ n'ɛtɛ ángbó ka kingo, bámakɛ k'obenge.
43 A gǎkɛ oba n'ande njaga akɔ aunge aokogusa ka bojede, tena u cɛ! Nga, aanja phɛ̂ ngia ka enda á mɛyɔ na ona njaga moci tɔndɔ, kɔnyɛ́nya bá na njaga ibɛ mbusa i, óoga ně na Gɛɛnanji á basí, bunde báotambaga k'ɛɛmbɛ á nsa. Nsa ndɔ nn'aoimika. [ 44 Kó, ana banguja nde bákáokua, aphɔtɔ na nsa nde nna tanda koimika.g] 45 A phɔtɔ oba n'ande ecinji akɔ aunge aokogusa, tena u cɛ! Nga, aanja k'obɛ ngia ka enda á mɛyɔ n'ona kidɔti kɔnyɛ́nya bá á n'ecinji ibɛ, mbusa i, báokomaka ně ka Gɛɛ́na. [ 46 Kó, ana banguja nde bákáokua, aphɔtɔ na nsa nde nna tanda koimika.h] 47 A phɔtɔ oba, n'ande iso akɔ moci, aunge aokogusa, phuia u, ómakɛ danga. Nga, aanja k'obɛ ngia ka koboamɛ ndea Mokonga n'iso moci, kɔnyɛ́nya bá n'iso ibɛ, báokomaka ně ka Gɛɛ́na, 48 oma nde ana banguja nde bákáokua, aphɔtɔ na nsa nde nna tanda koimikai.